തുമ്പപ്പൂ റീലോഡഡ്

മൂന്നു ചിറകുള്ള വിത്ത്

2011-11-19T14:04:00.001-06:00

ഇരുമ്പില്‍ഇരുമ്പുരയുന്ന ശബ്ദത്തോടെ

കിതച്ചുനില്‍ക്കുന്നവണ്ടിക്കകത്ത്

മൂന്നുചിറകുള്ള വിത്തായി ഞാന്‍

തിരുമൈലായില്‍

രണ്ടിനുംമൂന്നിനുമിടയിലെപ്പോഴോ

ചുംബനങ്ങളേറ്റുണരുന്നരാവുകളില്ലാതെ

അവനവന്‍തുരുത്തുകളില്‍

ഒടുങ്ങിത്തീര്‍ന്നുകൊണ്ടിരിക്കുന്നു

കടലോരങ്ങളില്‍ കഥ

2011-08-31T12:36:00.007-05:00

മറ്റാരും കൂട്ടിനില്ലാത്ത ഒരു വൈകുന്നേരം കടല്‍ക്കരയില്‍ കാറ്റുകൊള്ളാന്‍ ഇറങ്ങിയതായിരുന്നു ഞാന്‍. വലിയ തിരക്കാണ് ബീച്ചില്‍. ആളൊഴിഞ്ഞ ഒരറ്റത്തേക്ക് ഞാന്‍ നടന്നു നീങ്ങി. ഇപ്പോള്‍ ആള്‍ക്കൂട്ടം ഏതാണ്ട് പൂര്‍ണമായും അകലെയാണ്. വൃത്തി തീരെ കുറവെങ്കിലും ഏകാന്തത കൂടുതല്‍ സ്വീകാര്യമായതിനാല്‍ ഞാനവിടെ ഇരിപ്പുറപ്പിച്ചു. ചിതറിയ ഏതൊക്കെയോ‌ ചിന്തകള്‍ മനസിലെത്തി. ഏറെ നേരം അങ്ങിനെ ഇരുന്നു കാണണം. ബോറടിച്ചു തുടങ്ങുന്നു. ഞാന്‍ ആള്‍ക്കൂട്ടം തിങ്ങിയ ഭാഗത്തേക്ക് കണ്ണോടിച്ചു.

ദൂരെ നിന്നും രണ്ടു രൂപങ്ങള്‍ ഇങ്ങോട്ട് നടന്നടുക്കുന്നു. നടക്കുകയല്ല ഓടുകയാണെന്ന് തോന്നുന്ന വിധത്തിലാണ് ചലനം. രൂപങ്ങളിലൊന്നു പുരുഷനും ഒന്നു സ്ത്രീയുമായി പരിണമിച്ചു. രണ്ടു പേരും പരിഭ്രമത്തിലാണെന്ന് മുഖവും ചലനങ്ങളും വിളിച്ചു പറയുന്നുണ്ട്.

സംഭാഷണം കേള്‍ക്കാന്‍ സാധിക്കുന്നില്ലെങ്കിലും ഇരുവരും തമ്മില്‍ എന്തോ തര്‍ക്കം നടക്കുകയാണെന്ന് ഊഹിക്കാം. അയാളുടെ നടത്തിന്റെ വേഗം കൂടിക്കൂടി വരുന്നു. ഇടക്കിടെ അവള്‍ അയാളെ പിറകില്‍ നിന്നും പിടിച്ചു നിര്‍ത്താന്‍ ശ്രമിക്കുന്നുണ്ട്. അയാള്‍ വഴങ്ങാതെ ഒഴിഞ്ഞുമാറിക്കൊണ്ടിരിക്കുന്നു.

രൂപങ്ങള്‍ ഇപ്പോള്‍ വളരെ അടുത്തെത്തി. ഞാന്‍ സൂക്ഷിച്ചു നോക്കി. മുപ്പതുകളില്‍ എവിടെയോ ആവണം രണ്ടു പേരും. പൊക്കം കുറഞ്ഞ് താടി വെച്ച അയാള്‍ വിലക്കുറഞ്ഞ ഷര്‍ട്ടും പാന്റ്സും ധരിച്ചിരിക്കുന്നു. കയ്യില്‍ ഒരു ചെറിയ കറുത്ത ബാഗുണ്ട്, കല്യാണബ്രോക്കര്‍മാര്‍ കൊണ്ടു നടക്കുന്ന തരത്തില്‍ ഉള്ള ഒന്ന്. ഇരുകാലുകള്‍ക്കും വ്യത്യസ്ത നീളം എന്ന് തോന്നിക്കുന്ന വിധം താളം തെറ്റിയ നടത്തം. സിനിമകളില്‍ സ്ഥിരമായി കാണാറുള്ള ഏതോ സഹനടനെ ഓര്‍പ്പിക്കുന്നു അയാളുടെ രൂപം.

അവരുടെ വസ്ത്രവും വിലക്കുറഞ്ഞത് തന്നെ. ഇളം പച്ചനിറം. ഡിസൈനൊന്നുമില്ല. മുന്താണി പിറകിലൂടെ ചുറ്റിയെടുത്ത് മുന്‍വശത്ത് ഇടതുഭാഗത്തായി അരയില്‍ ഉറപ്പിച്ചിരിക്കുന്നു. സുന്ദരമല്ലാത്ത ചുണ്ടുകള്‍. എന്നാല്‍ തുടുത്ത കവിളുകള്‍. ഇടത്തെക്കവിളില്‍ പഴയ ഏതോ മുറിവിന്റെ പാട്.

ഞാനിരിക്കുന്നതിനും അല്പം മുന്നിലായി അവരുടെ ചലനങ്ങള്‍ നിലച്ചു. ഇപ്പോഴവരുടെം സംഭാഷണം അവ്യക്തമായിട്ടാണെങ്കിലും എനിക്ക് കേള്‍ക്കാം.

“ഏട്ടാ ഞാന്‍ പറേണത് കേക്ക്"

“ഞ്ഞൊന്നും പറേണ്ട.”

“ഞാനെന്ത് ചെയ്തെന്നാ?”

" ആദ്യത്തെ പ്രാവശ്യം തന്നെ നെന്നോട് ഞാന്‍ പറഞ്ഞതല്ലേ അവന്റോടെയുള്ള നെന്റെ എടപാട് നിര്‍ത്തണമെന്ന്. എല്ലാം അറിഞ്ഞിട്ടും നെന്നെ ഞാന്‍ ഇട്ട് കളഞ്ഞില്ലല്ലോ. രണ്ട് കയ്യും നീട്ടി സ്വീകരിച്ചതല്ലേ? ന്നിട്ടും പിന്നേം എന്തിനാ ഞ്ഞ് പോയത്?”

മറുപടിയില്ല. കുലടയായ സ്ത്രീ. ഞാന്‍ മനസില്‍ പറഞ്ഞു. അവളുടെ ഭര്‍ത്താവായിരിക്കണം ഇത്. പരപുരുഷബന്ധം അറിഞ്ഞിട്ടും ക്ഷമിച്ച ഭര്‍ത്താവിനെ വീണ്ടും ഇവള്‍ വഞ്ചിച്ചതാവണം പ്രശ്നം. ഞാനവരുടെ മുഖത്തേക്ക് ശ്രദ്ധിച്ച് നോക്കി. ഇപ്പോള്‍ അവളെ നോക്കുമ്പോള്‍ കണ്ണുകളിലും മൂക്കിലും ചുണ്ടുകളിലുമെല്ലാം അശ്ലീലം നിറഞ്ഞിരിക്കുന്നതായി തോന്നുന്നു. കവിളിലെ ആ മുറിവില്‍ പോലും എന്തോ ഒരു ചീത്തത്തമില്ല്ലെ?

“ഏട്ടന്‍ വേണ്ടാത്തതൊന്നും ചെയ്ത് കളേരുതു"

“ഞ്ഞൊന്നും ഇനി പറയണ്ട. ഞാന്‍ ചത്താല്‍ പിന്നെ അനക്കെന്ത് വേണെങ്കിലും ആവാലോ.”

അയാള്‍ വീണ്ടും കടലിനെ ലക്ഷ്യമാക്കി ചലിക്കാന്‍ തുടങ്ങി. ഇപ്പോള്‍ എനിക്ക് പേടിയായിത്തുടങ്ങി.

“ങ്ങള് കടലീച്ചാടിയാ ദൈവത്താണെ ഞാനും കുടെച്ചാടും"

“ഓ പൊലയാടി മോള്‍ടെ വര്‍ത്താനം കേട്ടാല്‍ കെട്ടിയോനോട് ഒടുക്കത്തെ സ്നേഹമാന്ന് തോന്നും. ഞാന്‍ ചത്താല്‍ ഞ്ഞെന്താ ചെയ്യാന്നെനിക്കറിയാടീ അസത്തേ"

ഇത്രയും പറഞ്ഞ് അയാള്‍ കടലിലേക്ക് ഓടിയകലുന്നതും അവള്‍ അയാളെ പിന്തുടരുന്നതും ഭീതിയോടെ കണ്ടു നില്‍ക്കാനേ എനിക്ക് കഴിഞ്ഞുള്ളൂ. ദൈവമേ ഇനിയെന്താണ് സംഭവിക്കുക? ഞാനെന്താണ് ചെയ്യേണ്ടത്?

വെള്ളത്തില്‍ അവര്‍ പിടിവലി നടത്തുന്നതു വാക്‌‌യുദ്ധം തുടരുന്നതും ഇപ്പോഴും കാണാം. കടലിരമ്പത്തില്‍ ഒന്നും കേള്‍ക്കാന്‍ വയ്യെങ്കിലും.

അയാളതാ അവളെ തള്ളിമാറ്റി ആഴക്കടലിലേക്ക് ഇറങ്ങിച്ചെല്ലുന്നു. ഇപ്പോള്‍ അയാളെ കാണാനേയില്ല. ശരീരചലനങ്ങളില്‍ അവളുടെ പരിഭ്രമം ഇവിടെ നിന്നു പോലും മനസിലാക്കാം. ഒരു നിമിഷം. ഇപ്പോള്‍ അവളെയും കാണാന്‍ ഇല്ല. എന്റെ ശ്വാസം നിലച്ചുപോയോ?

പെട്ടെന്ന് പിറകില്‍ നിന്നാരോ ചുമലില്‍ തോണ്ടിയ പോലെ തോന്നി. വൈദ്യുതാഘാതമേറ്റെന്നെ വണ്ണം ഞാന്‍ ഞെട്ടിയെഴുന്നേറ്റു തിരിഞ്ഞ് നോക്കി. കടല വില്‍ക്കുന്ന ഒരു ദൈന്യബാല്യം. വേണ്ടെന്ന് പറയുന്തോറും അവന്‍ കൂട്ടാക്കാതെ എന്റെ വസ്ത്രത്തില്‍ പിടിച്ചു വലിച്ചുകൊണ്ടേയിരുന്നു. ഒടുവില്‍ മറ്റു മാര്‍ഗങ്ങളില്ലാതെ അഞ്ചു രൂപാത്തുട്ടിനു പകരം അവന്‍ തന്ന ഒരു കൂടു കടല വിറയല്‍ മാറാത്ത കൈകളില്‍ സ്വീകരിച്ചു.

അവര്‍ അപ്രത്യക്ഷമായ ഭാഗത്തേക്ക് വീണ്ടും ഞാന്‍ കണ്ണു പായിച്ചു. വെള്ളത്തിനു മുകളില്‍ പരിഭ്രാന്തരായെന്ന വണ്ണം ചിതറിപ്പറക്കുന്ന ഏതാനും കടല്‍ക്കാക്കകളൊഴികെ ഒരു നിഴലു പോലും അനങ്ങുന്നില്ല. എന്റെ കൈകള്‍ യാന്ത്രികമായി പൊതിയില്‍ നിന്നും ഏതാനും കടലകളെടുത്തു വായ്ക്കകത്തേക്കെറിഞ്ഞു. ഒരു തുള്ളി ഉമിനീരുപോലും വായ്ക്കകത്ത് അവശേഷിച്ചിട്ടില്ല എന്നെനിക്ക് മനസിലായത് അപ്പോഴാണ്. നിലക്കടലക്കഷ്ണങ്ങള്‍ തൊണ്ടയ്ക്കത്ത് കുരുങ്ങി ഞാന്‍ ചുമക്കാന്‍ തുടങ്ങി. ദേഷ്യത്തോടെ പൊതി ദൂരേയ്ക്ക് വലിച്ചെറിഞ്ഞു.

കടലില്‍ എന്തോ ഒരു നിഴലനങ്ങുന്നത് പോലെ? അതെ അതയാളാണ്. അയാള്‍ തിരിച്ചു നീന്തി കരയിലേക്ക് കയറി. ഒന്നും സംഭവിച്ചിട്ടില്ലയെന്ന ഭാവത്തില്‍ എന്റെയരികിലൂടെ നടന്നു പോകുന്നു. എന്തോ ഒരു പ്രേരണയാലെന്ന പോലെ ഞാന്‍ അയാളെ പിന്തുടര്‍ന്നു. പിറകില്‍ എന്റെ കാലൊച്ചകള്‍ കേട്ടിട്ടാവണം അയാള്‍ തിരിഞ്ഞു നോക്കി.

“അവള്‍ നേരത്തെ കയറിപ്പോയി" വികാരരഹിതനായി എന്നോടിത്രയും പറഞ്ഞ് അയാള്‍ വേഗത്തില്‍ നടന്ന് അകലെ മറഞ്ഞു.

ഞാനാകെ ഞെട്ടിത്തരിച്ചു നിന്നു. അപ്പോള്‍ മുന്നെയും എന്റെ സാന്നിദ്ധ്യം അയാള്‍ ശ്രദ്ധിച്ചിരുന്നോ? ആ സ്ത്രീ എപ്പോഴാണ് തിരികെ കയറിപ്പോയത്? എന്തു കൊണ്ട് ഞാനത് ശ്രദ്ധിച്ചില്ല? കടല വില്‍ക്കുന്ന പയ്യനുമായി സംസാരിച്ചപ്പോള്‍? ഇപ്പോള്‍ മാത്രം കരയ്ക്കു കയറിയ അയാള്‍ എങ്ങിനെയറിഞ്ഞു?

ഞെട്ടല്‍ മാറിയതും അയാള്‍ പോയ ദിക്കിലേക്ക് ഞാന്‍ ഓടി. റോഡില്‍ ഒരു വാഹനത്തിനരികില്‍ അയാളതാ. വാഹനത്തില്‍ നിന്നും ഒരു ചുവന്ന ചുരിദാര്‍ ധരിച്ച ഒരു സ്ത്രീ ഇറങ്ങി വന്ന് അയാള്‍ക്ക് ഒരു തോര്‍ത്തു നല്‍കി. ഇരുവരും വാഹനത്തിനകത്തു കയറി. ഞാനോടിയടുത്തെത്തും മുന്നെ വാഹനം പൊയ്ക്കഴിഞ്ഞിരുന്നു.

ഇപ്പോള്‍ കണ്ട ചുവന്ന ചുരിദാര്‍ ധരിച്ച സ്ത്രീ നേരത്തെ കണ്ട സ്ത്രീയായിരുന്നോ? മുഖം വ്യക്തമല്ലായിരുന്നു. ഇത്രയും പെട്ടെന്ന് അവര്‍ വസ്ത്രം മാറിയോ?

എന്തു ചെയ്യണമെന്നറിയാതെ ഞാന്‍ വീണ്ടും കടപ്പുറത്തേക്കോടിച്ചെന്നു. അകലെ തിരകള്‍ക്കു മുകളില്‍ കടല്‍ക്കാക്കകള്‍ അപ്പോഴും ചിതറിപ്പറക്കുന്നുണ്ടായിരുന്നു.

കാളിയമര്‍ദ്ദനം

2011-08-22T00:12:00.003-05:00

ആയിരം ഫണങ്ങളില്‍ നിന്നും ഉഗ്രവിഷം ചീറ്റുന്ന കാളിയന്‍. ഭീകരരൂപി. കണ്ണന്റെ കാല്‍ച്ചുവടുകള്‍ കാളിയന്റെ പടങ്ങളില്‍ ആഞ്ഞാഞ്ഞു പതിച്ചു. ഓരോ കാല്‍വെയ്പ്പിലും ഒരു പര്‍വതം തന്റെ ശിരസ്സില്‍ പതിയ്ക്കുന്ന വേദനയാല്‍ കാളിയന്‍ അലറിക്കരഞ്ഞു.

കാളിയമര്‍ദ്ദനം

പ്രധാനമെന്നു തോന്നിയ പേജുകളില്‍ ഗൗതമി മഞ്ഞയും ചുവപ്പും പേജ് മാര്‍ക്കുകള്‍ ഒട്ടിക്കാന്‍ തുടങ്ങി.

സ്വഗൃഹത്തില്‍ നിന്നും കാളിയന്‍ തള്ളിപ്പുറത്താക്കപ്പെടുന്നതാദ്യമല്ല. ദിനവും ബലി കഴിക്കപ്പെടുന്ന സര്‍പ്പങ്ങള്‍ക്കായി ശബ്ദമുയര്‍ത്തിയ നാള്‍ മുതല്‍ എന്നും കാളിയന്‍ വേട്ടയാടപ്പെട്ടിരുന്നതായി മനസിലാക്കാം.

മായ ഇപ്പോഴും മേശമേല്‍ തല ചായ്ച്ചുറങ്ങിക്കൊണ്ടിരിക്കുന്നു. ഗൗതമി ശബ്ദമുണ്ടാക്കാതെ അവ‌‌ള്‍ക്കരികിലേക്ക് നീങ്ങി. പാതി മാത്രം അടഞ്ഞിരിക്കുന്ന ചുണ്ടുകള്‍ക്കിടയില്‍ നിന്നും ഉമിനീര്‍ പുറപ്പെട്ട് കവിളിലൊരു നേര്‍ത്ത ചാലു തീര്‍ത്ത ശേഷം താഴേയ്ക്കിറ്റു വീഴുന്നു. ഇപ്പോഴും പൊടിക്കുഞ്ഞു തന്നെയവള്‍ സംശയമില്ല. രാത്രികള്‍ പലതും ഉറങ്ങാതിരുന്നു പുസ്തകങ്ങളോടു മല്ലിട്ടതിന്റെ ബാക്കിയാവണം അസമയത്തെ ഈയുറക്കം. അവള്‍ പതുക്കെ ചൂണ്ടുവിരലിനാല്‍ മായയുടെ കവിളില്‍ നിന്നും ചുണ്ടുകളില്‍ നിന്നും ഉമിനീര്‍ വടിച്ചെടുത്തു ദൂരേക്കു കുടഞ്ഞു. ആ നിമിഷം ഗൗതമിക്ക് തന്റെ മുലക്കച്ചകള്‍ നനഞ്ഞതായി തോന്നി.

“വിഷസര്‍പ്പമാണ് കാളിയന്‍. ”

നന്ദഗൃഹത്തിനു വെളിയില്‍ ചേര്‍ന്ന ചര്‍ച്ചയില്‍ രാമന്റെ ശബ്ദം ഉയര്‍ന്നു.

"അപകടകരമാം വിധം അപായസാധ്യതയുള്ള കാളകൂടവിഷമാണ് കാളിയന്റെ പത്തിയിലുള്ളതെന്ന് നമുക്കറിയാം. നമ്മുടെ കുഞ്ഞുങ്ങ‌‌ളും ഗോവൃന്ദവും മറ്റെല്ലാവരും മരണത്തില്‍ നിന്നും അകലെയല്ലാതായിണിപ്പോള്‍. അപകടമാണ്. അവരെ രക്ഷിക്കേണ്ടതുണ്ട്.”

നീണ്ട കരഘോഷങ്ങളോടെ ഗോപവൃന്ദം രാമന്റെ വാക്കുകളെ എതിരേറ്റു.

രാമന്റെ നീലിച്ച മിഴികള്‍ അലസമാണെന്ന് ഒറ്റ നോട്ടത്തില്‍ തോന്നുമെങ്കിലും അവ കൃഷ്ണനിലേക്കിടയ്ക്കിടെ എത്തിച്ചേരുന്നതും ചില നിമിഷങ്ങള്‍ അവിടെ സ്ഥിരമായിരിക്കുന്നതും ദൂരെ നിന്നും രാധ ശ്രദ്ധിക്കുന്നുണ്ടായിരുന്നു. അവന്റെ ചിന്തകള്‍ വായിച്ചെടുക്കുക അത്ര ദുഷ്കരമായിരുന്നില്ല. കാളിയന്റെ പതനത്തിലും നദിയുടെ അധിനിവേശത്തിലും രാമനുള്ള താല്പര്യമെന്തെന്നുള്ളത് വൃന്ദാവനത്തിലെ ബഹുഭൂരിപക്ഷത്തിനും അവ്യക്തമാണ്. ഗോവിന്ദന് ഇക്കാര്യത്തില്‍ അത്ര നിര്‍ബന്ധബുദ്ധിയില്ലായിരുന്നുവെന്ന് പലരും വിശ്വസിക്കുന്നു. ഒരു ന്യൂനപക്ഷമൊഴികെ.

മായയുടെ കണ്ണുകളില്‍ നിന്നും ഉറക്കം പൂര്‍ണമായി വിട്ടൊഴിഞ്ഞിട്ടില്ല. തന്റെ വിരലുകളിലെ നേരിയ വിറയല്‍ മായ ശ്രദ്ധിക്കുന്നുണ്ടോയെന്ന് ഗൗതമി ഒളികണ്ണിലൂടെ ശ്രദ്ധിച്ചു. അപ്പോഴേക്കും ഗൗതമിയുടെ ചിന്തകള്‍ മായയില്‍ നിന്നും വിഷ്ണുവിലേക്കെത്തിയിരുന്നു. വിഷ്ണു. അവന്‍ തന്നെ തളര്‍ത്തും. മൃതപ്രായയാക്കും. പ്രാപിക്കും. മേലാസകലം നോവേറ്റുകിടക്കുന്ന തന്റെ ശരീരത്തില്‍ ഒരു ഭ്രാന്തനെപ്പോലെ മുഖം ചേര്‍ത്തു കിടക്കും. മുല പറിച്ചെറിയും.

"സത്യത്തില്‍ നദിയില്‍ കാളിയന്‍ താമസമാരംഭിക്കുന്നത് യാദവര്‍ പശുക്കളുമായി ഗ്രാമത്തിലെത്തുന്നതിനും ഏറെക്കാലം മുന്‍പാണ്. ആ അര്‍ത്ഥത്തില്‍ യാദവരാണ് കയ്യേറ്റക്കാര്‍.” കിതച്ചുകൊണ്ട് ഗൗതമി വഴിയിലും മായയോട് സംസാരം തുടര്‍ന്നുകൊണ്ടേയിരുന്നു.

“വംശഹത്യക്കെതിരെ ശബ്ദമുയര്‍ത്തി എന്ന കാരണത്താല്‍?”

“അതെ. ഗരുഡശാസനത്തിനെതിരെ ശബ്ദിക്കുക അത്ര ചെറിയ കുറ്റമായിരുന്നില്ല ഒരിക്കലും. നദിയില്‍ കാളിയനെത്തിച്ചേരുന്നതിനുള്ള കാരണം അതു തന്നെ. ഗരുഡനേറ്റ ശാപം ഒരു താല്‍ക്കാലികാശ്വാസമായെന്ന് മാത്രം"

ഗൗതമിയുടെ മനസിൽ വീണ്ടും മായയെത്തി. പരിഭ്രമവും ഭയവും വിയര്‍പ്പുമണികളായി തന്റെ കഴുത്തില്‍ ഒലിച്ചിറങ്ങുന്നത് ഗൗതമി തിരിച്ചറിഞ്ഞു. മായ ശ്രദ്ധിക്കുന്നുണ്ടാവുമോ? അവളുടെ ചിന്തകളിൽ ഇപ്പോൾ താനായിരികുമോ?. തങ്ങൾക്കു പിരിയേണ്ടയിടം എത്താറാവുന്നു. ഇതിനു മുൻപൊരിക്കലും ഇരുവഴികൾ പിരിയുന്നതിത്ര പരിഭ്രമം ഉളവാക്കിയിട്ടില്ല.

“വൈകീട്ട് വീട്ടിലേക്ക് വന്നു കൂടെ? ” മായയുടെ ശബ്ദം.

“വിഷ്ണു ഒരു പ്രശ്നമാണ്" പാതി വരിയിലൊതുങ്ങിയ മറുപടി നല്‍കി, ഗൗതമി ദൂരേക്ക് നടന്നകന്നു. തനിക്കു പിറകിൽ മായയുടെ സുന്ദരമായ കണ്ണുകൾ ഏറെ നേരമായി തന്നെത്തന്നെ പിന്തുടരുന്നുവെന്ന് ഗൗതമിക്ക് തോന്നി.

നേരം പുലര്‍ന്നു തുടങ്ങുന്നതേയുള്ളൂ. മണല്‍ത്തരികളിലൂടെയുള്ള ഓരോ കാല്‍വെയ്പും നാരായണനു വേദനയാണ്. കഠിനമായ വാതം ദുര്‍ബലപ്പെടുത്തിയ അംഗങ്ങള്‍ സ്വതവേ തന്നെ അനസരണാശീലമില്ലാത്തവയാണ്. തണുപ്പ് വേദനയുടെ പെരുക്കമേറ്റുന്നു. ഈ നദിയുടെ മാറിലെവിടെയോ ഒരു വിഷസര്‍പ്പം ഉറങ്ങിക്കിടപ്പുണ്ടാവാണം. അതിന്റെ ഉഗ്രവിഷത്തിന്റെ സ്ഫുരണങ്ങളാവണം തളര്‍വാതമായി തന്റെ ശരീരത്തില്‍ അടിഞ്ഞുചേര്‍ന്നിരിക്കുന്നത്. ഹേ മുരളീധരാ, നിന്റെ തൃപ്പാദങ്ങള്‍ എന്തേ അവന്റെ പത്തിയില്‍ ആഞ്ഞുപതിക്കുന്നില്ല? അസ്ഥികള്‍ തുളയ്ക്കുന്ന വേദനയില്‍ നിന്നുമെന്നാണ് മോചനം ? നാരായണൻ പുഴയിലേക്ക് നോക്കി. നദിയിൽ ഇന്നേരം മീൻ തുള്ളുന്ന സമയമാണ്. തുടങ്ങേണ്ടത് മത്സ്യത്തിൽ നിന്നു തന്നെ. അതാണ് കവികല്പന. അത് തന്നെയാവണം മാധവേച്ഛയും. എത്രയും വേഗം നവമഥുരയിലെത്താം. എഴുതിയാൽ തീരാത്ത കവിതകൾ ഒഴുകാതെയൊഴുകുന്ന നദിയായ് ഒഴുകുന്ന നവമഥുരയിൽ മറ്റൊരു കാവ്യം പിറന്നൊഴുകേണ്ടതുണ്ട്.

"നീയാരാണ് രാധ?“

നദീതീരത്ത് അതുവരെ കനത്തു നിന്നിരുന്ന നിശ്ശബ്ദതയെ രാമന്റെ ശബ്ദം ഭഞ്ജിച്ചു.

നദിയിലേക്ക് ചാഞ്ഞു നില്‍ക്കുന്ന നീലക്കടമ്പു വൃക്ഷത്തിന്റെ ഏറ്റവും താഴ്ന്ന കൊമ്പിലിരുന്ന് ഓളങ്ങളെ മനോഹരിതയാര്‍ന്ന തന്റെ പാദങ്ങളാല്‍ തഴുകുകയായിരുന്നു രാധ. പീതാംബരം മാറില്‍ പുതച്ചിരിക്കുന്നു. പുഞ്ചിരിച്ചു കൊണ്ടവള്‍ രാമനെ നോക്കി.

"എന്തു പറ്റി ഗോപന്‍, എന്താണുണ്ടായത്?”

സന്ധ്യാസൂര്യന്റെ ചെമപ്പ് രാധയുടെ കവിളിലും കഴുത്തിലും കര്‍ണങ്ങളിലും തിളക്കമാവുന്നു. ഇമകള്‍ അടഞ്ഞുപോവാതെ അവളെ നോക്കുവാന്‍ നല്ല പ്രയാസം തോന്നി രാമന്.

"എന്തിനീ നിഗൂഢത? ചിലര്‍ക്ക് നീ കണ്ണന്റെ പതിനഞ്ചുകാരിയായ കാമുകിയാണ്. ഒരു നഗരത്തില്‍ നീ വിവാഹിതയായ സ്ത്രീയെന്ന് അറിയപ്പെടുന്നു. മറ്റൊരിടത്ത് ഒരു കുഞ്ഞിന്റെ അമ്മകൂടിയാണ് നീ. നാല്പതു കഴിഞ്ഞ വിധവയാണെന്നാണ് ഇനിയൊരു ഗ്രാമത്തിലെ വാര്‍ത്ത."

രാധയുടെ കാല്‍വണ്ണകള്‍ ഓളങ്ങളെ അലക്ഷ്യമായി ഭേദിച്ചുകൊണ്ടേയിരുന്നു. ചില നേരങ്ങളില്‍ മൗനങ്ങള്‍ മറുപടികളാവാറുണ്ട്.

നീലക്കടമ്പിനു മുകളില്‍ നിന്നെവിടെ നിന്നോ ഒരു പക്ഷി അതിദ്രുതം താഴേക്കു കുതിച്ചു രാധയുടെ പാദസരങ്ങളില്‍ തൊട്ടില്ലയെന്ന മട്ടില്‍ നദിയുടെ മാറില്‍ വീണില്ലാതായി. രാമന്റെ മിഴികള്‍ വിടര്‍ന്നു. നദിയില്‍ നിന്നും കാളിയനുയര്‍ന്നു വന്നീ നിമിഷം അവളെ വിഴുങ്ങിയിരുന്നെങ്കില്‍ എന്നവനാഗ്രഹിച്ചു. അവന്റെ മിഴികള്‍ ജലോപരിതലത്തില്‍ നിന്നും രാധയുടെ മധുരക്കരിമ്പിന്റെ മനോഹാരിതയാര്‍ന്ന കാല്‍വണ്ണകളിലൂടെ മുകളിലേക്ക് സഞ്ചരിച്ചു. അല്‍പം മുന്‍പ്‌‌ നീലക്കടമ്പിനു മുകളില്‍ കണ്ട രാധയെ അവിടെയിപ്പോള്‍ കാണാനില്ല. പകരം നീലാംബരമണിഞ്ഞ മറ്റൊരു രാധ. അവളുടെ മാറോട് ചേര്‍ന്ന് ഒരു കൈക്കുഞ്ഞ്. പരപുരുഷന്റെ സാന്നിദ്ധ്യത്തെക്കുറിച്ച് അല്പം പോലും ബോധവതിയല്ലെന്ന മട്ടില്‍ അവള്‍ തന്റെ മുലകളെ വസ്ത്രങ്ങളില്‍ നിന്നും സ്വതന്ത്രമാക്കി കുഞ്ഞിന്റെ ചോരിവായ്‌‌ക്കുള്ളില്‍ തിരുകി. ഉള്ളിന്റെയുള്ളില്‍ ഒളിപ്പിച്ചതെങ്കിലും ഏതൊരു പുരുഷന്റെയും സ്വപ്നം - എന്നെങ്കിലും ബാല്യം തിരികെ നേടാനുള്ള മോഹം - രാമനിലും ഉണരുന്നത് രാധയ്ക്ക് അപ്പോള്‍ തിരിച്ചറിയാം. രാധയുടെ മാറില്‍ ഒട്ടിച്ചേര്‍ന്നു കിടക്കുന്ന രൂപത്തെ രാമന്‍ സൂക്ഷിച്ചു നോക്കി. അവന്റെ ഇനിയും ഭൂതലസ്പര്‍ശമേല്‍ക്കാത്ത കാലടികള്‍ക്കു കാര്‍മേഘവര്‍ണമുണ്ടോ?

“ഒരു മാതാവെങ്കില്‍, ഒരു ഭാര്യയെങ്കില്‍, കേട്ടറിഞ്ഞ കഥകളെല്ലാം സത്യമായിരുന്നെങ്കില്‍ നീയെന്തിനു കണ്ണന്റെ പുല്ലാങ്കുഴല്‍ വിളികള്‍ക്കു കാതോര്‍ക്കുന്നു? രാത്രികളില്‍ രാസക്രീഢകള്‍ തേടിയലയുന്നു? സ്വന്തം പുരുഷന്റെ സുരക്ഷിതത്വത്തില്‍ നിന്നെന്തിനു പുറത്ത് പോകുന്നു?”

"അതാണെനിക്കിഷ്ടം."

ഇടയന്റെ കൈക‌‌ള്‍ മൂര്‍ച്ചയേറിയൊരു കല്ലിനായി നനഞ്ഞ മണലില്‍ തിരഞ്ഞുകൊണ്ടിരുന്നു.

വിയര്‍ക്കുന്ന ശരീരവുമായി ഗൗതമി ഉമ്മറപ്പടികള്‍ ഓടിക്കയറി. അലസമായ മിഴികളുമായി പടിമേല്‍ പാതിയുറക്കം നടിക്കുന്ന വിഷ്ണുവിനെയവള്‍ കണ്ടു. താനെത്തിയതറിഞ്ഞില്ലെന്ന മട്ടാണ്.

മുറിയിലെത്തി മേല്‍വസ്ത്രങ്ങള്‍ അഴിച്ചുമാറ്റി. തന്റെ വിരലുകള്‍ക്കിപ്പോഴും മായയുടെ ഉമിനീരിന്റെ ഗന്ധമുണ്ടെന്ന് ഗൗതമി കൗതുകത്തോടെ തിരിച്ചറിഞ്ഞു. വിരലിന്റെ ഗന്ധം ആസ്വദിച്ചു എത്ര നേരം ആ നില്‍പു നിന്നെന്നറിയില്ല, പൊടുന്നനെ പിന്നില്‍ വിഷ്ണുവിന്റെ സാന്നിദ്ധ്യം അവളറിഞ്ഞു. വര്‍ഷങ്ങളേറെയായതിനാലാവണം അവന്റെ ഒരു നേരിയ ചലനം പോലും തിരിച്ചറിയാന്‍ താന്‍ പ്രാപ്തയായിരിക്കുന്നു. ഈ നിമിഷം തന്റെ കഴുത്തില്‍ വീഴുന്ന അവന്റെ ശ്വാസവായു തന്റെ നേര്‍ക്കുള്ള ചോദ്യമാണെന്നും അതെന്തെന്നും അവള്‍ക്കറിയാം.

“എന്റെയിഷ്ടം അതായിരുന്നു."

മറുപടി അവനെ ചൊടിപ്പിക്കുമെന്നറിയാഞ്ഞല്ല. വേദന ഇന്നൊരാനന്ദമായി മാറുന്നുണ്ടെന്നു തോന്നുന്നു. അതോ മായയെന്ന ഔഷധത്തിന്റെ നീറ്റലറിയാന്‍ മുറിവുകള്‍ തനിക്കു വേണമെന്നത് കൊണ്ടോ? മുറിവുകള്‍ ആഗ്രഹമാകുന്നുണ്ടോ?

അവന്റെ ബലിഷ്ഠമായ ഇടതുകൈ പിറകിലൂടെ ഇപ്പോള്‍ കെട്ടിവരിഞ്ഞിരിക്കുന്നത് തന്റെ ഗര്‍ഭപാത്രത്തിനു മുകളിലൂടെയാവും. മറുകൈ കഴുത്തിനല്‍പം താഴെ പിടി മുറുക്കിയിരിക്കുന്നു. നിമിഷങ്ങളോരോന്ന് കഴിയുന്തോറും തന്നെ ചുറ്റിവരിഞ്ഞ കൈകള്‍ക്ക് മുറുക്കമേറുന്നു. ശ്വാസകോശങ്ങള്‍ വായുവിനായി ധൃതിപ്പെടുന്നു.

അന്നേരം നദീതീരം പതിവില്ലാത്ത വിധം ജനനിബിഡമായിരുന്നു. പതിഞ്ഞ ശബ്ദങ്ങളായി ആകുലതകള്‍ അവിടെ മുഴങ്ങി നില്‍പുണ്ടായിരുന്നു. ആറ്റിലേയ്ക്കച്യുതാ ചാടല്ലേയെന്ന് ചിലര്‍. വിനോദമാണു വേണ്ടതെങ്കില്‍ കാട്ടിലെ പൊയ്കയില്‍ പോയി നീന്താമല്ലോയെന്ന് വേറെ ചിലര്‍. പുഞ്ചിരിയില്‍ മറുപടിയൊതുക്കിയ ജനാര്‍ദ്ദനന്‍ നീലക്കടമ്പു ലക്ഷ്യമാക്കി വേഗത്തില്‍ നടന്നു. തളിരില പോല്‍ മൃദുലമായ പാദങ്ങള്‍ ഒറ്റ നിമിഷം കൊണ്ട് മണലില്‍ നിന്നും കദംബത്തിലേക്കു കുതിച്ചു. കേശവന്റെ ഭാരം താങ്ങാനരുതാതെ നീലക്കടമ്പു വൃക്ഷം ആടിയുലഞ്ഞു. ഒരു നിമിഷം. ഓളങ്ങള്‍ ഇളകിമറിയുന്ന നദിയുടെ മാറിലേക്ക് മാധവന്‍ അതിവേഗം എടുത്തു ചാടി. ദിഗന്തങ്ങള്‍ പൊട്ടുമാറുള്ള ശബ്ദത്തിനകമ്പടിയോടെ കാര്‍വര്‍ണന്റെ ശരീരം ജലോപരിതലത്തെ ഭേദിച്ചു.

മാധവസന്നിധിയില്‍ നാരായണന്‍ തന്നെത്തന്നെ മറന്നു പാടുകയായിരുന്നു. ഗാനം നദി പോലൊഴുകി.

അഥ ദിക്ഷു വിദിക്ഷു പരിക്ഷുഭിത-
ഭ്രമിതോദരവാരിനിനാദഭരൈഃ
ഉദകാദുദഗാദുരഗാധിപതി-
സ്ത്വദുപാന്തമശാന്തരുഷാന്ധമനാഃ
ഫണശൃംഗസഹസ്രവിനിഃസൃമര
ജ്വലദഗ്നികണോഗ്ര – വിഷാംബുധരം
പുരതഃ ഫണിനം സമലേകയഥാ
ബഹുശൃംഗിന അഞ്ജനശൈലമിവ

നീര്‍പ്പരപ്പിനടിയില്‍ ജീവവായു തേടി ഗൗതമി ചുമച്ചു. കിതച്ചു. ആഞ്ഞാഞ്ഞു ശ്വാസം ഉള്ളിലേക്കെടുത്തു. ജീവവായു നിഷേധിക്കപ്പെട്ട ശരീരം വന്യമായി പിടഞ്ഞു. തനിക്ക് മൽസ്യച്ചിറകുകൾ മുളച്ചിരുന്നെങ്കിൽ എന്നവളാഗ്രഹിച്ചു. വിഷ്ണുവിന്റെ കൈകൾ മായയുടെ കഴുത്തി ഞെരിഞ്ഞമർന്നു.
പൊലയാടിമോൾ വിഷം തുപ്പിയിവിടെ മരിച്ചു വീഴണം. വിഷ്ണു വീണ്ടും തന്റെ കരങ്ങൾ ആഞ്ഞു മുറുക്കി. മായ ജീവശ്വാസമായി തന്റെ കോശങ്ങളിലേക്കൊഴുകിയെത്തുമെന്ന് അന്നേരവും ഗൗതമിയ്ക്കു തോന്നി.
ഭൂഗുരുത്വം നഷ്ടമായ ഒരു ശില കണക്കെ ഗൗതമിയുടെ ശരീരം ജലത്തിന്നഗാധതയിൽ ഒഴുകി നടന്നു. പ്രളയമിതാ എത്തിച്ചേർന്നിരിക്കുന്നു. എവിടെ പേരാലിലകൾ? തനിക്ക് പുനർജ്ജനിക്കുവാൻ സമയമായിരിക്കുന്നു.

അനന്തരം:
നന്ദീതീരത്തു തടിച്ചു കൂടിയ ജനങ്ങൾ കൈകൂപ്പി മാധവനെ വണങ്ങി. അവിടെ നടക്കുന്ന മഹാൽഭുതം എവ്വണ്ണമെന്ന് വർണിക്കുവാൻ ആയിരം നാവുള്ളോനു പോലും സാധിക്കില്ലെന്ന് ഓരോ ഇടയനും ഗോപികയും മനസിൽ നിനച്ചു.
ആയിരം ഫണങ്ങളില്‍ നിന്നും ഉഗ്രവിഷം ചീറ്റുന്ന കാളിയന്‍. ഭീകരരൂപി. കണ്ണന്റെ കാല്‍ച്ചുവടുകള്‍ കാളിയന്റെ പടങ്ങളില്‍ ആഞ്ഞാഞ്ഞു പതിച്ചു. ഓരോ കാല്‍വെയ്പ്പിലും ഒരു പര്‍വതം തന്റെ ശിരസ്സില്‍ പതിയ്ക്കുന്ന വേദനയാല്‍ കാളിയന്‍ അലറിക്കരഞ്ഞു.

അധിരുഹ്യ തതഃ ഫണിരാജഫണാന്‍
നനൃതേ ഭവതാ മൃദുപാദരുചാ
കളശിഞ്ജിതനൂപുര മഞ്ജുമിളത്
കരകങ്കണസങ്കുല സംക്വണിതം

-----------------------------------------------------------------------------------------------
1. scattered intertextual references: ചെറുശ്ശേരി, മേല്‍പത്തൂര്‍, പെമ്മേണ (കുട്ടിസ്രാങ്ക്), രമേശൻ നായർ
2. നന്ദി: ഒരുപാടുപേർക്ക്, ഒരുപാട് വിവരങ്ങൾക്കും സഹായങ്ങൾക്കുമായി

കണ്ടെടുക്കല്‍

2011-07-05T15:27:00.002-05:00

വിരിഞ്ഞതൊരു കുഞ്ഞു പൂവ്.
മാത്തുക്കുട്ടിച്ചായന്റെ കടയുടെ ഇങ്ങേ കിഴക്കുവശത്ത് തന്നെ.
കടയെന്ന് പറയുമ്പോള്‍ നാലു പഴയ സൈക്കിള്‍ടയറുകളില്‍ പൊക്കിനിര്‍ത്തിയൊരു ചെറിയ പെട്ടിക്കട.

പല്ലിലൊമ്പതും ചുമന്ന അടയാളങ്ങള്‍ മാത്രമായെങ്കിലും
പൂവിനെ നോക്കി മാത്തുക്കുട്ടിച്ചായന്‍ ചിരിക്കുമ്പോള്‍ അതൊരു ശേലാണ്.

വഴിയേ പോയ പശുക്കളിലൊരെണ്ണം മൂക്കു കൊണ്ടുഴിഞ്ഞു നോക്കി.
ബ്‌‌ര്ര്‍ര്‍ ശബ്ദത്തില്‍ ഒന്നു പുച്ഛിച്ച് അവളുടെ നാക്ക് പച്ചപ്പുകളിലേക്ക് പോയി.

അയിഷുക്കുട്ടിയ്ക്ക് സ്കൂളുണ്ട്.
പുറത്ത് പുത്തനൊരു ബാഗും കയ്യില്‍ മൈലാഞ്ചിപ്പാടുമുണ്ട്.
"മണമുണ്ട്.”
അയിഷുക്കുട്ടി ഉറപ്പിച്ച് പറഞ്ഞു.
എല്‍സയ്ക്കത്ര വിശ്വാസം പോര!

മാത്തുക്കുട്ടിച്ചായന്‍ മോണ കാട്ടി പിന്നെയും ചിരിച്ചു.
പൂവു നാണിച്ചു.
അയിഷുക്കുട്ടിയും എല്‍സയും നാണിച്ചു.

“മണമുണ്ട്" അയിഷുക്കുട്ടി ഒന്നു കൂടെ ഉറപ്പിച്ചു പറഞ്ഞു.
എല്‍സ പിണങ്ങി.

സൂര്യനെ നോക്കി
ശലഭത്തെ ധ്യാനിച്ച്
വിടര്‍ന്നു നിന്ന പൂവിനു
നിറങ്ങള്‍ ഏഴുണ്ടായിരുന്നെന്നത്
പിന്നീടറിഞ്ഞ കഥ!

കടയിന്നില്ലെങ്കിലും മാത്തുക്കുട്ടിച്ചായന്‍ ഇപ്പോഴും പൂവിനരികില്‍ത്തന്നെ കാണുമെന്ന് അയിഷുക്കുട്ടിയ്ക്കറിയാം.
അല്ലെങ്കിലെന്തിനാണവള്‍ എ‌‌ന്നും മുടങ്ങാതെ പൂവിനെയുമ്മ വെയ്ക്കുന്നത്?

ഖല്‍ബില്‍ തീ പടരുന്ന കാലം

2011-01-27T06:16:00.003-06:00

എനിക്കോര്‍മയുണ്ട്.
മഴവില്ലു പോലെ വളഞ്ഞ മേല്പാലത്തിന്റെ
കൈവരികളോട് ചേര്‍ന്നു നിന്ന് നമ്മളാദ്യം ചുംബിച്ചത്.
പാതിയടഞ്ഞും, കണ്ണുകള്‍ -
പരിഭ്രമത്താല്‍ പാതി തുറന്നും.

അന്ന് ഖല്‍ബില്‍ തീ പടരാന്‍ തുടങ്ങിയതല്ലേയുള്ളൂ.
അന്ന് ഖല്‍ബില്‍ തീ പടര്‍ന്നു തുടങ്ങിയതല്ലേയുള്ളൂ.

നിലാവുദിച്ചില്ലെങ്കില്‍
നക്ഷത്രങ്ങളെ കണ്ടുകിടന്നുറങ്ങാന്‍
നമ്മള്‍ തീര്‍ച്ചയായും പോകും.

മഞ്ഞേറ്റുകിടക്കുന്ന പുല്‍ത്തകിടികള്‍
പുഴവക്കുകളിലിനിയും ബാക്കിയുണ്ടോ എന്നറിയില്ല,
വരമ്പുകളിലെ വാകമരങ്ങള്‍ ഈയിടെ പൂക്കാറുണ്ടോയെന്നും.

എങ്കിലും
എല്ലാവരും മറന്ന,
ആരാധകരുപേക്ഷിച്ച
ഒരു ചാപ്പല്‍ നാം കണ്ടെത്താതിരിക്കില്ല.
ചുവരുകള്‍ നരച്ചതെങ്കിലും,
രൂപക്കൂടില്‍
കൊഴിഞ്ഞ കാലത്തിന്റെ
ശില്‍പങ്ങള്‍ മാത്രം ബാക്കിയുള്ളതെങ്കിലും ...
കുന്തിരിക്കത്തിന്റെ മണമിനിയും കെടാതെ
നിറഞ്ഞുനില്‍പുണ്ടാവുമവിടെ.

കുര്‍ബാനകള്‍ വേണ്ട നമുക്ക്;
കാസ വീഴ്താനല്പമിടം മാത്രം മതി.

നീയും ഞാനും ദൈവവും അവിടെ വെച്ചില്ലാതാവുന്നു.
കാലം നമ്മെയോ നാം കാലത്തെയോ കണ്ടെടുക്കുന്നു.
പിന്നെ
മണ്ണിനും ഋതുക്കള്‍ക്കും ആകാശത്തിനും അതീതമായി
ഉള്ളിലെ തീ മാത്രം അവശേഷിക്കും

ഉമ്മകളിലൂടെ കടലോളം പോന്ന ആഴങ്ങള്‍ അവളെന്നോട്‌ പറഞ്ഞത്

2010-06-14T12:32:00.013-05:00

പറയുവാനുള്ളതെല്ലാം ഉമ്മകള്‍ കൊണ്ടായിരുന്നു അവളെന്നോട് പറഞ്ഞിരുന്നത്. അതിനര്‍ഥം അവള്‍ ഊമയായിരുന്നെന്നോ ഞാന്‍ ബധിരനാണെന്നോ അല്ല. പറഞ്ഞു പഴകിയതും പഴകിപ്പറഞ്ഞതുമായ വരികള്‍ക്ക് സംവേദനശക്തി നഷ്ടപ്പെട്ടുവെന്ന് ഞങ്ങള്‍ക്ക് തോന്നിക്കാണണം. അത്രമാത്രം!

ആദ്യത്തെ നനുത്ത ഉമ്മ
കടലോളം പോന്ന ആഴത്തെ
സൂചിപ്പിക്കുന്നതായിരുന്നു.

നീയെന്റേതാണെന്നും, വാചാലമായ മൗനങ്ങള്‍ രാഗമാണെന്നും, രാവുകള്‍ പ്രണയം വിരിയുന്ന പൂമരമാണെന്നും പറഞ്ഞത് കവിളില്‍ അവളുടെ മൂര്‍ച്ചയേറിയ വെളുത്ത പല്ലുകളമര്‍ത്തിക്കൊണ്ടായിരുന്നു. മറുപടിയുടെ നീറ്റല്‍ നീലനിറമുള്ള പാടുകളായി ഇന്നുമുണ്ടാവണം അവളുടെ കഴുത്തില്‍!

ഉല്‍സവപ്പിറ്റേന്ന്
കാവില്‍ വള്ളിപ്പടര്‍പ്പുകള്‍ക്കിടയില്‍
ഉമ്മകളുടെ ഉല്‍സവമായിരുന്നു!

പള്ളിനീരാട്ടിനു ശേഷം , ഉറക്കത്തിലേക്കു വീഴും മുന്‍പേ മുന്നേ ഭഗവതി തുറന്നുവിട്ട യക്ഷിയും മറുതയും ഭൂതഗണങ്ങളും നല്‍കിയ സുരക്ഷിതത്വത്തില്‍, വഴിക്കച്ചവടക്കാര്‍ ഉപേക്ഷിച്ചുപോയ പൊട്ടിയ ചുവന്ന വളച്ചില്ലുകള്‍ക്കും കാറ്റൊഴിഞ്ഞ ആപ്പിളുബലൂണുകള്‍ക്കും മുകളില്‍ അവള്‍ മനസ് തുറന്ന് സംസാരിച്ചതൊക്കെയും ഉമ്മകളിലൂടെത്തന്നെ. നനഞ്ഞ്, അമര്‍ന്ന്, ആഴത്തില്‍, വേഗതയില്‍.

അവളല്ലാതൊരുവളുണ്ടെന്ന തോന്നലില്‍
പറയാനുള്ളതെല്ലാം പറഞ്ഞുതീര്‍ത്തത്
ഉമ്മകള്‍ നിഷേധിച്ചുകൊണ്ടായിരുന്നു.

അവസാനമായി നല്‍കിയ വരണ്ട ചുംബനം മാത്രം
വാക്കുകളിലും മൗനങ്ങളിലുമൊതുങ്ങാതെ,
പൊള്ളലുകളും മുറിവുകളുമായി,
നീറിയും നീറ്റിയും
തലച്ചോറിലെവിടെയോ ഇന്നും തിണര്‍ത്തുകിടക്കുന്നു.

മെസ്സി നോവെന*

2010-06-10T05:12:00.006-05:00

ലയണല്‍ മെസ്സിയായ തമ്പുരാനേ
നിന്റെ നാമം വാഴ്ത്തപ്പെടേണമേ...
ലീഗ് ഫുട്ബോളില്‍ എന്ന പോലെ വേള്‍ഡ് കപ്പിലും
നിന്റെ ഗോളുകള്‍ പിറക്കേണമേ...
ഇംഗ്ലണ്ടിന്റെ ഫൌളുകള്‍ ഞങ്ങള്‍ പൊറുത്തു കൊടുക്കുന്നത് പോലെ
ഞങ്ങളുടെ ഫൌളുകള്‍ക്ക് ഞങ്ങളോടും പൊറുത്ത് തരേണമേ...
മെസ്സിയുടേയും മറഡോണയുടേയും അര്‍ജ്ജന്റീനയുടേയും നാമത്തില്‍ ....
ആമേന്‍ !

*ടൈറ്റില്‍ ദേവദാസ് വിയെമ്മിന്റെ :)

അടുത്തിരിക്കുന്ന വിന്‍ഡോ സീറ്റുകാരന് ഈ സ്റ്റോപ്പില്‍ ഇറങ്ങിയാലെന്താണ്?

2010-06-05T14:17:00.003-05:00

1. നൊസ്റ്റാള്‍ജിയ:

ജനല്‍ക്കമ്പിയില്‍ നിന്നും മുകളിലേക്കിറ്റ് വീഴുന്ന
ഒരു മഴത്തുള്ളി -

ചുണ്ടില്‍ നിന്നും കത്തിത്തുടങ്ങി
വായുവില്‍ എരിഞ്ഞുതീരുന്ന ഒരു സിഗരറ്റ് കുറ്റി.

2. റഫറന്‍സ്:
ഫൂക്കോയുടെ സ്പെല്ലിങ്ങ് അന്വേഷിച്ചത്
പുസ്തകം വായിക്കാനൊന്നുമായിരുന്നില്ല.
വിക്കിപ്പീഡിയയില്‍ ഒന്നു പരതാന്‍

എന്റെ ചിന്തകളെ റീഗ്രസീവ് എന്ന്
സംബോധന ചെയ്തവന്റെ തന്തക്ക് വിളിക്കാന്‍...
എന്തിനും ഒരു റഫറന്‍സ് ഉണ്ടായിരിക്കുന്നത് നല്ലതാണ്!

3. വിക്ക്:
വിക്ക് സച്ചിദാനന്ദന്റെ ഒരു കവിതയുടെ പേരാണ്.

4. യാത്ര:

ഇടിച്ചു കയറിയാണ് അരികിലെങ്കിലും ഒരു സീറ്റ് തരപ്പെടുത്തിയത്
അടുത്തിരിക്കുന്ന വിന്‍ഡോ സീറ്റുകാരന് ഈ സ്റ്റോപ്പില്‍ (എങ്കിലും)
ഇറങ്ങിയാലെന്താണ്?

YMCAയില്‍ ഇറങ്ങിയാല്‍ രസികന്‍ മില്‍ക് ഷര്‍ബത് കുടിക്കാം
അല്ലെങ്കില്‍ പാരഗണില്‍ നല്ല ഉച്ചയൂണ് ലഭിക്കും
വെസ്റ്റ് ഹില്ലിലും ഇറങ്ങാമല്ലോ.
ബംഗ്ലാദേശ് കോളനിയില്‍ ഇപ്പോഴും കഞ്ചാവ് കിട്ടുമെന്നാണറിവ്...

സീറ്റിനടുത്ത് ഒരു ഭാരിച്ച സഞ്ചിയും പിടിച്ച് നിക്കുന്ന
ആ താടിക്കാരന്റെ നെറ്റിയില്‍ നിന്നും
വിയര്‍പ്പിന്റെ മണികള്‍ ഇറ്റ് വീഴുന്നത് എന്റെ പുതിയ
ലിവൈസ് ജീന്‍സിലേക്കാണ്!
നാശം പിടിക്കാന്‍!

അടുത്തിരിക്കുന്ന വിന്‍ഡോ സീറ്റുകാരന്
കാപ്പാടിറങ്ങിയാല്‍ പോലും
ബീച്ചിലെ മദാമ്മമാരുടെ വെളുത്ത തുടകളെ കാണുവാന്‍ കഴിയും.

ഇല്ല കൊയിലാണ്ടിയെത്തി.
ഇനി വടകരവരെയും അയാളെഴുന്നേല്‍ക്കുമെന്ന് തോന്നുന്നില്ല.
പയ്യോളിയിലെങ്കിലും?

അടുത്തിരിക്കുന്ന ആ വിന്‍ഡോ സീറ്റുകാരന്‍...
അയാള്‍ തലശ്ശേരിയെങ്കിലും ഇറങ്ങിയാല്‍ മതിയായിരുന്നു!

ഒരു പകല്‍, ഒരു വഴി നിങ്ങളോട്‌ ചെയ്യുന്നത്

2010-04-26T13:27:00.001-05:00

വഴിയരികുകള്‍ ഭയം നല്‍കുന്നതാണ്
ഒറ്റപ്പെടലുകള്‍ തുടങ്ങുന്നതിവിടെ നിന്നാണല്ലോ

എന്നത്തെയും പോലെ നിങ്ങളുടെ കാലുകള്‍ വേഗത്തില്‍ ചലിക്കുന്നു
പിരിയുന്നൊരു വഴി, പിറകില്‍ നിന്നൊരു ശബ്ദം
വെറുതെ കടന്നുപോവുന്നൊരു മോട്ടോര്‍ ബൈക്കെന്ന് കരുതരുത്
പിരിഞ്ഞിഴഞ്ഞ് പോവുന്ന വഴിയുടെ തുടക്കം മാത്രമാണത്.
നിങ്ങള്‍ ആടിയുലയുന്ന ഒരു പെന്‍ഡുലമാവാന്‍ ഇനിയധികം സമയമില്ല.

ഒരടി മുന്നോട്ട്, പിന്നെയും രണ്ടടി പിറകോട്ട്
നിങ്ങള്‍ക്കറിയാം ഈ വഴി ചെന്നെത്തുന്നതെവിടെയാണെന്ന്.

പാമ്പുജീവിതം

2010-03-21T09:41:00.002-05:00

ഇഴഞ്ഞിഴഞ്ഞിഴഞ്ഞ്...

മരപ്പൊത്തിലൊളിക്കുന്ന തവളയിൽ മാരകവിഷം കുത്തിവെച്ച്
ഫണം വിടർത്തി
ചുണ്ടെലിക്കുഞ്ഞിനെ ചുരുട്ടിയെടുത്തെറിഞ്ഞ്

വേലിപ്പടർപ്പുകളിൽ ഭയം വിതറി
കിണറ്റിൻ‌ കരയിലും തോട്ടുവക്കിലും

വഴുക്കി വഴുക്കി വഴുക്കി.

ഒടുക്കം മൂക്കളയൊലിപ്പിച്ചുവന്ന ഒരു മുറിട്രൌസറുകാരൻ
വാലിൽത്തൂക്കിയെടുത്തൊരേറായിരുന്നു.
നൂറായി നുറുങ്ങിയ കശേരുക്കൾ
പച്ചമാംസത്തിൽ നീറ്റലായിപ്പടർന്ന്.

ഓർത്തു
വെറും പാമ്പുജീവിതം!

കൈപ്പള്ളി ഇത് കാണണ്ട!

2010-03-15T06:05:00.001-05:00

മിത്തുകളും സന്കല്പങ്ങളും ആചാരങ്ങളും കാലത്തിനനുസരിച്ച് - പ്രത്യേകിച്ചും മാസ് മീഡിയയുടെ വരവോടെ - എപ്രകാരം ഇവൊല്യൂഷനു വിധേയമാകുന്നു എന്നറിയാന്‍ എതിരന്‍ കതിരവനോട് ചോദിച്ചാല്‍ മതി. മാവേലി, കുട..., കുപ്പി... എന്ന അതിയാന്റെ പോസ്റ്റ് ഇനിയും വായിക്കാത്തവര്‍ വായിച്ചു നോക്കുക [ ലിന്ക്].

ഇതിപ്പോള്‍ പറയാന്‍ കാരണം കേരളത്തിലെ ഹിന്ദുഭക്തിഗാനങ്ങളുടെ ഭാവത്തിലും രൂപത്തിലുമെല്ലാം വന്ന മാറ്റങ്ങള്‍ ശ്രദ്ധിച്ചപ്പോള്‍ ഉണ്ടായ ചിന്തകളാണ്. ഭക്തി എന്ന ഭാവം സംഗീതത്തില്‍ എങ്ങിനെയാണ് സമന്വയിപ്പിക്കുന്നത് എന്നത് ഒരു കടന്കതയാണ്. എഴുപത് എണ്പത് കാലഘടത്തില്‍ പുറത്തിറങ്ങിയ ഭക്തിഗാനങ്ങളില്‍ അധികവും 'മെലഡി' എന്ന് പൊതുവെ വിലയിരുത്തപ്പെടുന്ന ഗണത്തില്‍പ്പെടുന്നവയായിരുന്നുവെന്ന് തോന്നുന്നു. ഒരു നേരമെന്കിലും കാണാതെ വയ്യെന്റെ മുതല്‍ രാധതന്‍ പ്രേമത്തോടാണോ വരെയുള്ള ഗാനങ്ങള്‍ക്കെല്ലാം പതിഞ്ഞ താളവും ഫിലോസഫിക്കല്‍ ആയ ലിറിക്കുകളുമായിരുന്നു എന്ന് ഓര്‍മയുണ്ട്. ശരീരത്തിനയിത്തം കല്പിക്കപ്പെട്ട യേശുദാസിന്റെ ശബ്ദത്തിനയിത്തം ഒരമ്പലത്തിലും അക്കാലത്തുണ്ടായിരുന്നില്ല എന്നതും നല്ല ഓര്‍മയുണ്ട്.

സിനിമാഗാനങ്ങള്‍ ഭക്തിഗാനങ്ങളുടെ സ്ഥാനം ഏറ്റെടുക്കാന്‍ തുടങ്ങിയതെന്നാണെന്നറിയില്ല. ഭക്തി പ്രധാനപ്രമേയമായ സിനിമയില്‍ ഭക്തിഗാനം തന്നെയായ 'പളം നീയപ്പായും ' മറ്റും അമ്പലങ്ങളില്‍ അതിരാവിലെ ലൗഡ് സ്പീക്കര്‍ വഴി കേള്‍പ്പിച്ചിരുന്നതില്‍ അസ്വാഭാവികതയുണ്ടെന്ന് പറയാനും കഴിയില്ലല്ലോ. എന്നാല്‍ സിനിമയില്‍ കഥാപാത്രങ്ങളുടെ മാനസികപിരിമുറക്കും അവതരിപ്പിക്കുന്നതിനായി സൃഷ്ടിച്ച 'ജാനകീജാനേ രാമാ' ക്ഷേത്രങ്ങളിലും ആശ്രമങ്ങളിലും സ്ഥിരം സാന്നിദ്ധ്യമായത് രസകരമായ മാറ്റമായിരുന്നു.

ഇവോല്യൂഷന്‍ ഒരു continuous process ആണ്. തമിള്‍ സിനിമകളിലെ അടിപൊളി ഡപ്പാം കൂത്ത് പാട്ടുകളുടെ ഈണങ്ങള്‍ ഭക്തിഗാനങ്ങള്‍ക്ക് അതേ പടി ഉപയോഗിക്കാമെന്ന് മനസിലായത് രണ്ടായിരാമാണ്ടിനു ശേഷം മധു ബാലകൃഷ്ണന്റെ ആലാപനത്തില്‍ പുറത്തിറങ്ങിയ അയ്യപ്പഭക്തിഗാനങ്ങള്‍ കേട്ടപ്പോഴാണ് [ ഗണപതിക്കൊരു നാളികേരമയ്യപ്പാ (ആര്‍ക്കോട്ടെ ഭൂപതി നാനെഡാ), പേട്ട തുള്ളി പാട്ടുപാടി (നെഞ്ചം തുടിക്ക്ത് ജെമിനി ജെമിനി) മുതലായവ ഉദാഹരണം‌‌)].

സംഗീതത്തില്‍ ഭക്തി എന്ന ഭാവം എങ്ങിനെ കൊണ്ടുവരാം /തിരിച്ചറിയാം എന്ന് ആദ്യമായി സംശയം തോന്നിയത് ഈ പാട്ടുകള്‍ കേട്ടപ്പോഴാണ്. ഇവയുടെ തമിഴ് ഒറിജിനലുകള്‍ കേള്‍ക്കുമ്പോള്‍ 'ഇതൊക്കെ പാട്ടാണോ ദേവരാജന്മാഷുടെ പാട്ടല്ലെ പാട്ട്' എന്ന് ഗദ്ഗദകണ്ഠരായവര്‍ തന്നെ ലിറിക്കൊന്നു മാറ്റി കറുപ്പുടുത്ത മധുബാലകൃഷ്ണന്റെ പടം ഫ്രണ്ട് കവറായി ഇറങ്ങിയ കാസറ്റില്‍ നിന്നും ഇതേ ഈണങ്ങള്‍ കേട്ടപ്പോള്‍ അവയെ കയ്യടിച്ചു പ്രോല്സാഹിപ്പിച്ചു. നോക്കണേ രസം.

ഈ ഗണത്തില്‍ പെട്ട ഏറ്റവും പുതിയ സംഗതിയുടെ ലിന്ക് ഒരു സുഹൃത്ത് അയച്ചു തന്നെ ഏതോ സിനിമയില്‍ ജഗതി പറയും പോലെ "ഇതൊരു പഴേ തമിള്‍പാട്ടല്ലേ" എന്ന് ചോദിച്ചപ്പോഴാണ് ഈ കഥകള്‍ വീണ്ടു ഓര്‍മ വരുന്നത്.
ഇത് കേട്ടിട്ടും കണ്ടിട്ടും ഇല്ലാത്തവര്‍ താഴെ വീഡിയോ കാണുക. അവതാര്‍ കണ്ട ശേഷം ഇത്രയും മികച്ച സ്പെഷല്‍ എഫക്ട് ഒരു വീഡിയോവില്‍ കാണുന്നത് ആദ്യമായാണ്. രാധാമാധവനൃത്തങ്ങളുടെ കൊറിയോഗ്രാഫിയൊക്കെ ഒരു ദാണ്ഢിയ ടച്ചില്‍ ആയിരുന്നു പണ്ട് കാണാറ്. ഇന്നതും മാറി നല്ല സിനിമാസ്റ്റൈല്‍ സ്റ്റെപ്പുകള്‍ ആയി.

കൈപ്പള്ളി ഇത് കാണാതിരുന്നാല്‍ മതിയെന്നാണ് ഇപ്പോള്‍ കൃഷ്ണനോടുള്ള ഏകപ്രാര്‍‌‌ഥന. ബ്ലഡീ മല്ലു ഗ്രാഫിക് ഡിജൈനര്‍മാരേയും അനിമേഷന്‍കാരേയും എല്ലാം കൂട്ടത്തോടെ തെറി വിളിച്ചു കളയും. ഈ വീഡിയോവില്‍ ബാക്ഗ്രൗണ്ടായി ഇട്ടിരിക്കുന്നത് പഴയ വിന്ഡോസ് എക്സ്.പിയിലെ ഡിഫോള്‍ട് വാള്‍പേപ്പറായിരുന്ന 'ബ്ലിസ്സ്' അല്ലേയെന്നും വ‌‌ര്‍ണ്യത്തിലാശന്ക!

സ്കൗട്ടന്‍!

2010-02-14T22:40:00.001-06:00

കസിനന്‍ അനീഷന്‍ ഭയങ്കരനാണ്‌. ജനിച്ചപ്പോഴേ കൊടും ഭീകരന്‍. രണ്ടാം ക്ലാസില്‍ കണക്ക് പരീക്ഷക്ക് അമ്പതില്‍ അമ്പതും വാങ്ങി അച്ചാച്ഛന്റെ ഗുഡ് സര്‍ടിഫിക്കറ്റ് വാങ്ങിയന്‍. കുടുംബത്തിലെ ഏറ്റവും വലിയ ബുദ്ധിമാന്‍ എന്ന് പരക്കെ അംഗീകരിക്കപ്പെട്ടവന്‍!

അഞ്ചാം ക്ലാസ് മുതലേ സ്കൌട്ടിന്റെ അസുഖം ഉണ്ട്. എന്ന് വെച്ചാല്‍ ഉപദ്രവകാരിയാണ് എന്നല്ല. ആഴ്ചയില്‍ ഒരു ദിവസം സ്കുള്‍ യൂണിഫോമിനു പകരം നീല സ്കൌട്ട് യൂണിഫോം ധരിച്ചു സ്കുളില്‍ പോവും. അന്ന് വൈകീട്ട് ബി.കെ.നായര്‍ മെമോറിയല്‍ സെന്‍ട്രല്‍ ജയിലിന്റെ അകത്തു നിന്നും ചില ഒച്ചയും ബഹളങ്ങളും കേള്‍ക്കാം എന്ന് മാത്രം. ഏക്‌ ഏക്‌ ഏക്‌ ദോ ഏക്‌.. ബായേം മുട്ട് ... വിശ്രാം..

നാട്ടുകാര്‍ക്ക് അത്രയേ ഉപദ്രവമുള്ളൂ എങ്കിലും വീട്ടുകാര്‍ക്ക് കാര്യങ്ങള്‍ അത്ര എളുപ്പമായിരുന്നില്ല. എന്തിനും ഏതിനും സ്കൌട്ട് നിയമാവലി ഉരുവിടുക, അര്‍ദ്ധരാത്രി ഉറക്കത്തില്‍ എഴുന്നേറ്റ് സ്കൌട്ട് ഗീതങ്ങള്‍ ഉറക്കെ പാടുക (കോറസായി അകലെ നിന്നും സ്ഥലത്തെ പ്രധാന കുടിയന്‍ ചാത്തുക്കുട്ടി അവര്‍കളുടെ ഗാനമേളയും ഒഴുകിയെത്തും) , വീട്ടില്‍ പുല്ലു മേയാന്‍ വരുന്ന നാല്‍ക്കാലികളെ സ്കൌട്ട് പ്രതിജ്ഞ പഠിപ്പിക്കുക എന്നതാണ് ഇഷ്ടന്റെ സ്ഥിരം നമ്പരുകള്‍.

രാവിലെ ചായ ഇടാന്‍ നേരത്ത് പഞ്ചസാര ഔട്ട്‌ ഓഫ് സ്റ്റോക്ക്‌ ആണെനുന്നു കണ്ടെത്തുന്ന പുഷ്പേച്ചി "ഡാ അനീഷേ ഞ്ഞാ സുധാരന്റെ പീട്യെ പോയ്‌ അഞ്ഞൂറ് പഞ്ചാര വാങ്ങിച്ചോണ്ട് വാ എന്ന് " പറയുമ്പോള്‍, "അമ്മാ എ സ്കൗട് ഈസ് എ മിതവ്യയശീലന്‍ " എന്നൊക്കെപ്പറഞ്ഞ് ഒഴിഞ്ഞ്മാറാന്‍ പുള്ളി ബഹുമിടുക്കനാണ്‌. ( പുഷ്പേച്ചി - ടിയാന്റെ മമ്മി)

ജനാര്‍ദ്ധനങ്കുട്ട്യാട്ടനു ( ടിയാന്റെ പപ്പ) ക്ഷമ സാധാരണയിലും അല്പം കുടുതല്‍ ആയതിനാല്‍ ഇഷ്ടന്‍ അധികം പരിക്കുകള്‍ കൂടാതെ കഴിഞ്ഞു പോയി എന്ന് മാത്രം.

അക്കാലത്ത് ( ഇക്കാലത്തും ) ഗ്രാമപ്പഞ്ചായത്തിലെ മിക്ക വീട്ടുകാരും നേരിട്ടിരുന്ന പ്രധാനപ്രതിസന്ധികളില്‍ ഒന്ന് പ്ലാവില്‍ നിന്നും ഒരാള്‍പ്പൊക്കത്തിലും മുകളില്‍ നില്‍ക്കുന്ന ചക്കയെ എങ്ങിനെ താഴെ എത്തിക്കാം എന്നതായിരുന്നു. പ്രത്യേകിച്ചും പച്ചച്ചക്കയാണെങ്കില്‍ കുഴഞ്ഞത് തന്നെ. തെങ്ങുകയറ്റത്തൊഴിലാളികളെ തേങ്ങ ഇടാന്‍ കിട്ടണമെങ്കില്‍ തന്നെ ബി.എസ്.എന്‍.എല്‍ കണക്ഷനില്‍ യൂറ്റ്യൂബ് വീഡിയോ കാണുമ്പോലെയാണ്‌. സമയത്തിനു വന്നാലായി വന്നില്ലെങ്കിലായി. അപ്പോഴല്ലേ ചക്ക പറിക്കാന്‍ വരുന്നത്.!

ഇനി എങ്ങാനും വന്നു പോയാല്‍ തന്നെ ചക്കക്ക് ടി.എ. ഡി.എ എന്നിവയ്ക്ക് പുറമേ കൂലിയായി പുറമേ ചക്ക വേറൊന്നും പ്രതിഫലമായി കൊടുക്കേണ്ടി വരും. " ചക്ക എന്ത് കൊണ്ടൊരു കിട്ടാക്കനി "എന്ന വിഷയത്തില്‍ പ്രബന്ധം അവതരിപ്പിക്കാന്‍ തയ്യാറായി നില്‍ക്കുന്നവരായിരുന്നു പഞ്ചായത്ത് മുഴുവനും എന്നു ചുരുക്കം!

പുഷ്പേച്ചിക്ക് പെട്ടെന്നൊരു ദിനം ചക്കപ്പുഴുക്ക് ഉണ്ടാക്കി തത്ര പതിക്കും പതീമാതാവിനും സല്പുത്രന്മാര്‍ക്കും പുത്രിക്കും സല്‍ക്കരിക്കേണം എന്നു തോന്നിയത് ഒരു വലിയ കുറ്റമൊന്നും ആയിരുന്നില്ല. ഒരു മോഹം തോന്നി അത്ര മാത്രം.
ജനാര്‍ദ്ദനന്‍ ഇളയച്ഛനെ വീട്ടില്‍ അങ്ങനെ കാണാന്‍ കിട്ടാന്തന്നെ പ്രയാസമാണ്‌. നാട്ടിലെ സകല സാംസ്കാരികപരിപാടികള്‍ക്കും പുള്ളിയുടെ സാന്നിദ്ധ്യം അനിവാര്യമാണെന്ന് അന്നാട്ടില്‍ ആര്‍ക്കാണറിയാത്തത്?

അഞ്ചലി ആര്‍ട്സ് ആന്റ് സ്പോര്‍‌ട്സ് ക്ലബിന്റെ ആഭിമുഖ്യത്തില്‍ നടത്തുന്ന സെവന്‍സ് ഫുഡ്ബോള്‍ മാച്ചിന്റെ റഫറി ആരാ? - ജനാര്‍ദ്ദനങ്കുട്യാട്ടന്‍.
കൊയിലാണ്ടി സബ്ജില്ലാ സ്കൂള്‍കലോല്‍സവത്തിന്റെ മുഖ്യഭാരവാഹി? - ജനാര്‍ദ്ദനങ്കുട്ട്യാട്ടന്‍

അന്നത്തെ ദിവസം ഇന്ത്യാ ഓസ്ട്രേലിയ വണ്‌ഡേ മാച്ച് ഉള്ളതൊന്നു കൊണ്ട് മാത്രമാണ്‌ പുള്ളിയെ വീട്ടില്‍ കണ്ടത് തന്നെ. അപ്പോഴാണ്‌ തന്റെ ചക്കമോഹം പുഷ്പേച്ചി അവതരിപ്പിക്കുന്നത്.

"എന്താ പ്രിയേ?" പരുങ്ങി നില്‍ക്കുന്ന സഹധര്‍മ്മിണിയോട് സ്ക്രീനില്‍ നിന്നും കണ്ണെടുക്കാതെ ജനാര്‍ദ്ധനങ്കുട്ട്യാട്ടന്‍ ആരാഞ്ഞു

"ഹന്ത കാന്താ, അന്ത ചക്ക.'' പുഷ്പേച്ചി നമ്രമുഖിയായി

ചക്കപ്പുഴുക്ക് ഒരു വശത്ത് ഇന്ത്യ-ഓസ്ട്രേലിയ മറുവശത്ത് ... ജനാര്‍ദ്ധനങ്കുട്ട്യാട്ടനു ഡൈലമ്മയുടെ ഉച്ചകോടി!

ചക്കയെങ്കില്‍ ചക്ക. മാച്ചിനെ ഉപേക്ഷിച്ച് ജനാര്‍ദ്ധനങ്കുട്ട്യാട്ടന്‍ കൊക്കയുമെടുത്ത് ചക്ക പറിക്കാന്‍ ഇറങ്ങി. എന്നാല്‍ കാര്യത്തിന്റെ ഒരു വിഷമസ്സിതി മനസിലാക്കാന്‍ പുള്ളി അല്പസമയം എടുത്തു. കൊക്കയ്ക്ക് മുകളില്‍ കത്തി ഉറച്ചു നില്‍ക്കുന്നില്ല!

അപ്പോഴാണ്‌ പുഷ്പേച്ചിക്ക് ഒരു നമ്പറ് തോന്നിയത്. നോക്കിയിരിക്കുന്ന അനീഷിനെ നോക്കി പുഷ്പേച്ചി വരുണാസ്ത്രം പ്രയോഗിച്ചു. "ഡാ നീ വലിയ സ്കൗട്ട്കാരനല്ലേ. അത്ര വലിയ സ്കൗട്ടൊക്കെ ആണെങ്കില്‍ ഇങ്ങോട്ട് വന്നാ ചക്ക പറിച്ച് കാണിക്ക് ".

ക്രിക്കറ്റ് മാച്ചുള്ളപ്പോള്‍ ജെ.സി.ബി. പിടിച്ചാലും സീറ്റില്‍ നിന്നനങ്ങാത്ത ദേഹമണ്‌. പക്ഷേ ഇതിപ്പോള്‍ സാഹചര്യം അങ്ങനെയല്ല.അഭിമാനത്തിലാണ്‌ അമ്മ കൈ വച്ചിരിക്കുന്നത്. ബാക്കി എന്തും അനീഷന്‍ സഹിക്കും പക്ഷേ തന്റെ സ്കൗട്ട് സത്വത്തെ ചോദ്യം ചെയ്യുന്നത് മാത്രം! " സ്കൗട് ഇസ് കര്‍‌ട്ടിയസ്, സ്കൗട് ഈസ് ഒബീഡയന്റ്" എന്നു ഉറക്കെ വിളിച്ചു പറഞ്ഞും കൊണ്ട് അനീഷന്‍ ചാടിയിറങ്ങി.

"ഗിവ് മീ ദ പ്രോബ്ലം സ്റ്റേറ്റ്മെന്റ്" അനീഷന്‍ അറബിയില്‍ അലറി.

" പ്ലക്കിങ്ങ് ദാറ്റ് ചക്ക ഈസ് ദ ഓണ്‍‌ലി പ്രോബ്ലം" ജനാര്‍ദ്ദനങ്കുട്ട്യാട്ടനും അറബി പരിജ്ഞാനം പുറത്തെടുത്തു.

"ദാറ്റ് ഈസ് നോട് എ പ്രോബ്ലം അറ്റ് ഓള്‍. നമുക്ക് ക്ലൊവ് ഹിച്ചുണ്ടല്ലോ". അനീഷന്റെ ഉള്ളിലെ സ്കൗട്ടന്‍ പുറത്ത് ചാടി.

സ്കൂളില്‍ സ്കൗട് മാഷ് പഠിപ്പിച്ച ഐറ്റമാണ്‌. ഹൗ റ്റു നോട് എ ക്ലൗവ് ഹിച്ച്. കൊക്കയില്‍ കത്തിയോ കൊടുവാളോ കെട്ടാന്‍ ക്ലൗ ഹിച്ച് ഉപയോഗിച്ചാല്‍ മതി. ചക്ക പ്ലക്കിങ്ങ് വില്‍ നോട് ബി എ പ്രോബ്ലം എനി മോര്‍!

എന്ത് കുന്തമായാലും കുഴപ്പമില്ല ചക്ക ലാന്‍ഡ് ചെ‌‌‌‌യ്താല്‍ മാത്രം മതി.. ജനാര്‍ദ്ദനങ്കുട്ട്യാട്ടാന്‍ നയം വ്യക്തമാക്കി.

"എട് കൊടുവാള്‍." അനീഷന്‍ കൊടുവാള്‍ കൊക്കയുടെ അറ്റത്ത് വെയ്ക്കുന്നു കയറെടുക്കുന്നു. കെട്ടുന്നു. ക്ലവു ഹിച്ച് റീഫ് നോട്ട് ആകെ ബഹളം തന്നെ.

ഒടുവില്‍ കൊക്കയും കൊടുവാളും ക്ലൗ ഹിച്ചും ആകാശത്തേക്ക്. അനവധി കണ്ണുകളും അതിനൊപ്പം ആകാശത്തേക്ക്. അതു വഴി പ്ലാവിലേക്ക്. തൂങ്ങിക്കിടക്കുന്ന സുന്ദരന്‍ ചക്കയിലേക്ക്.

കൊക്ക ചക്കയെ തൊട്ടു. കൊടുവാള്‍ ചക്കയുടെ കണ്ണിയില്‍ ഉടക്കി.

"ഹര ഹര മഹാദേവാ..." തലേ ദിവസം വീല്‍ ഭക്തിവന്ദനം ഓം നമഃശ്ശിവായ സീരിയലില്‍ കേട്ട മുദ്രാവാക്യം ഉറക്കെ മുഴക്കി അനീഷന്‍ ഒറ്റ വലി.

ചക്ക താഴെ വീണില്ല.

കൊക്കയും അനീഷും പുറകിലോട്ട് മലന്നു.. ക്ലൗ ഹിച്ച് കെട്ടിയ കയര്‍ ഊര്‍ന്നു താഴെ വീണു പ്ലാവിന്റെ ചുവട്ടില്‍ ഒരു ചുരുട്ടമണ്ഢലിയെപ്പോലെ ചുരുണ്ടുകിടന്നു. പുഷ്പേച്ചിയുടെ പുതിയ മലേഷ്യന്‍ കൊടുവാള്‍ ചക്കയ്ക്കു മുകളില്‍ 60 ഡിഗ്രീ ലാറ്റിറ്റ്യൂഡില്‍ ഞാന്നു കിടന്നു.

"പടച്ചോനേ എന്റെ പുത്യേ കൊടുവാള്‍, അവന്റെ ഒടുക്കത്തെ ഒരു ക്ലൗ ഹിച്ച്" എന്നുറക്കെയലറിക്കൊണ്ട് കൊക്കയുമെടുത്ത് അനീഷന്റെ പുറകെയോടുന്ന പുഷ്പേച്ചിയെ നോക്കി ജനാര്‍ദ്ദനങ്കുട്ട്യാട്ടന്‍ ആത്മഗതം നടത്തി " ആ ക്ലൗ ഹിച്ച് ഒരു കൗ ബ്ലീച്ചായീ"

അനന്തരം :

അന്നു രാത്രി കിട്ടാത്ത ചക്കപ്പുഴുക്കിനെയും മത്തിക്കറിയേയും മറന്ന് ജനാര്‍ദ്ദനങ്കുട്ട്യാട്ടനും മറ്റംഗങ്ങളും കഞ്ഞി ചുട്ട പപ്പടവും കൂട്ടി വലിച്ചു കുടിച്ചു.
അനീഷന്‍ പിന്നെ വീട്ടില്‍ സ്കൗട്ടിനെക്കുറിച്ചുരിയാടിയിട്ടില്ലത്രെ!
ഇന്ത്യ എന്നത്തെയും പോലെ ഓസ്ട്രേലിയയോട് മാന്യമായി തോറ്റു.
വീല്‍ ഭക്തിവന്ദനം ഓം നമഃശ്ശിവായ സീരിയലില്‍ ഹരഹരമഹാദേവമന്ത്രം അനുസ്യൂതം തുടര്‍ന്നു.
രാത്രികാലങ്ങളില്‍ സ്ഥലത്തെ പ്രധാനകള്ളുകുടിയന്‍ ചാത്തുക്കുട്ടിയുടെ ഗാനമേള തുടര്‍ന്നും കേള്‍ക്കാമായിരുന്നു എന്ന് തദ്ദേശവാസികള്‍.

മംഗളം!
ശുഭം!

പദാവലി:

കൊക്ക -Hook
ചക്ക - ജാക്ഫ്രൂട്ട്
ക്ലൗ ഹിച്ച് - ദൈവത്തിനറിയാം
ബി.കെ.നായര്‍ മെമ്മോറിയല്‍ സ്കൂള്‍ അലിയാസ് ജയില്‍ - സ്ഥലത്തെ പ്രധാന യു.പി സ്കൂള്‍
മത്തി - ചാള
ബ്ലീച്ച് - ചമ്മല്‍

പ്രേമിച്ചു പണ്ടാരം അടങ്ങൂ!

2010-02-13T13:34:00.006-06:00

കുടുതല്‍ എന്ത് പറയാന്‍.
Let Kishor and Lata covey it in a better way!

എല്ലാ കമിതാക്കള്‍ക്കും പ്രണയദിനാശംസകള്‍.

എനിക്ക് നിങ്ങള്‍ക്ക് തരാന്‍ സ്ഥിരം ഉപദേശങ്ങള്‍ ഒന്നും ഇല്ല ( പ്രണയം മാങ്ങയാണ്‌ ചക്കയാണ്, യഥാര്‍ത്ഥ പ്രേമം മരിച്ചു... etc .etc. )

എനിക്കൊന്നേ പറയാന്‍ ഉള്ളു.. നിങ്ങള്‍ക്കിഷ്ടം ഉള്ളയാളെ പ്രേമിച്ചു പണ്ടാരം അടങ്ങൂ. ഇന്നത്തെ ദിവസം അയാളോട് ഒന്നിച്ചു ചിലവഴിക്കൂ. Be together. Hold his/her hands in yours. Look in the eyes and say 'I love you' (and mean it!). Give him/her a gift. എന്നിട്ട് കെട്ടിപ്പിടിച്ചു ഉമ്മ വെക്കൂ (അത് കൊണ്ട് എന്തെങ്കിലും ഇടിഞ്ഞു പൊളിഞ്ഞു വീഴുന്നെങ്കില്‍ അങ്ങ് വീഴട്ടെ).

പിന്നല്ല!

ഞാൻ, നീ , ത്രിൽ, ചില ബോറൻ മെറ്റഫോറുകൾ

2010-01-15T00:15:00.004-06:00

ചില പ്രണയങ്ങൾ മണൽത്തരിയുടേതെന്ന പോലെയാണ്.
പാദസ്പർശനങ്ങളായിരിക്കും
രാത്രിസ്വപ്നങ്ങളിൽ നിറയെ.

നെറ്റിയിൽ ചുംബിക്കാനാഗ്രഹമില്ലാഞ്ഞിട്ടല്ല.

“ഫെറ്റിഷ്, ഫെറ്റിഷ്“ എന്ന വിളികൾക്കിടയിൽ
ഉയരങ്ങളെപ്പേടിച്ച്
മഴയിൽ നനഞ്ഞും വെയിലിൽ പൊള്ളിയും
ഇടക്കിടെ കാൽക്കീഴിലമർന്നുമങ്ങനെ...

ചില പ്രണയങ്ങളാവട്ടെ കാറ്റിനെപ്പോലെയും
മുഴുത്ത മാറിടങ്ങളെ തഴുകുന്നതായിരിക്കുമിഷ്ടം.
വിരലുകളിൽ പൂമണമുണ്ടെന്നറിയാഞ്ഞല്ല.
കണ്ണുകളിൽ തണുത്ത ഉമ്മകൾ നൽകി
ഒലിക്കുന്ന വിയർപ്പിനെയൊപ്പിയെടുത്ത്.
വല്ലാതെ ബോറടിക്കും.

ഒരൊറ്റക്കുതിപ്പിൽ തീരണമെല്ലാം.
അല്ലെങ്കിലും കാത്തിരിപ്പ്
മഹാബോറാണ്.

നത്തിന്റെ കഥ, കടുവകളുടേയും.

2010-01-12T20:50:00.004-06:00

പണ്ട് പണ്ട് പണ്ട് ഒരു ചെളിക്കുണ്ടില്‍ ഒരു പന്നിയങ്ങനെ സുഖായി ചെളിവാരിപ്പൂശി കഴിയുകയായിരുന്നു. അതിലേ പോയ ഒരു കടുവയെക്കണ്ടപ്പോള്‍ പന്നിക്ക് ഒടുക്കത്തെ ഇളക്കം - അസൂയ, കുശുമ്പ്. നീയങ്ങനെ സുഖിക്കണ്ടയെന്നും പറഞ്ഞ് കടുവയുടെ ദേഹത്ത് ചെളി കുറേ തെറിപ്പിച്ചു. പന്നിക്കിട്ടൊരെണ്ണം കൊടുക്കേണ്ടതാണ് കടുവ. പിന്നെ പോട്ടെ ചെളിയുടെ നാറ്റം സഹിക്കാന്‍ പാടില്ല. അടിച്ചാല്‍ കടുവയുടെ കൈ നാറും. കടുവ അതിന്റെ വഴിക്ക് പോയി. ഇങ്ങനെ അതിലേ പോണ പല മൃഗങ്ങളുടേയും ദേഹത്ത് പന്നി ചെളി മാറി മാറി തെറിപ്പിച്ചുകൊണ്ടിരുന്നു. ആരും പ്രതികരിച്ചില്ല. ഇങ്ങനേ പോയ്ക്കൊണ്ടിരിക്കുമ്പോഴാണ് കുറേ തേനീച്ചകള്‍ ചെളിക്കുണ്ടിനടുത്ത് കൂടെ പോയത്. (ചുമ്മാ). ലിവന്റെ ഈ വികൃതി ഇങ്ങനെ വിട്ടാല്‍ പറ്റില്ലെന്നും പറഞ്ഞ് തേനീച്ചകള്‍ പന്നിക്കിട്ട് ഒറ്റക്കുത്തു വെച്ചു കൊടുത്തു. കാര്യം പന്നിയവകാശലംഘനമാണ്. എന്നാലും പന്നിക്കിട്ടായത് കൊണ്ട് ആരും ഒന്നും പറഞ്ഞില്ല.

പന്നിയാകട്ടെ കടുവ പറഞ്ഞിട്ടാണ് തേനീച്ച തന്നെ കുത്തിയത് എന്നും പറഞ്ഞ് കരച്ചിലോട് കരച്ചില്‍. കാര്യം പന്നിയാണെങ്കിലും കടുവയോട് വിരോധമുള്ള കുറേ കുറുക്കന്മാര്‍ അവസരം അങ്ങട് മുതലാക്കാന്‍ തന്നെ തീരുമാ‍നിച്ചു. കുറുക്കന്മാരും തുടങ്ങീലേ ജഹപൊഹ. അതുവരെ എല്ലാ മൃഗങ്ങളെയും യാ‍തൊരു മടിയും കൂടാതെ ഉപദ്രവിച്ചിരുന്ന കുറുക്കന്മാര്‍ക്ക് പെട്ടെന്ന് മൃഗാവകാശങ്ങള്‍ ഓര്‍മ വന്നു. നാടു മുഴുവന്‍ നടന്ന് പന്നിയവകാശത്തെക്കുറിച്ച് ഓരിയിടാന്‍ തുടങ്ങി.

നത്ത് പൊതുവേ പാവമാണ്. ഈ കുറുക്കന്മാര്‍ ഒക്കെ ചേര്‍ന്ന് ഓരിയിടുന്നത് കേട്ട് നത്തിനും ഒരിത്തിരി മനസില്‍ ചാഞ്ചാട്ടം വന്നു. പന്നിയവകാശത്തെക്കുറിച്ച് പറഞ്ഞും കൊണ്ട് കടുവക്കൂട്ടത്തില്‍ കയറിച്ചെന്നു. തേനീച്ചകളെ കടുവ പറഞ്ഞ് വിട്ടതല്ലേ ന്നും ചോദിച്ചു, പ്രശ്നം അവിടെത്തീരണ്ടതായിരുന്നു. അതും പോരാഞ്ഞ കടുവയെന്നാല്‍ സീബ്രക്കും സിംഹത്തിനും പെഴച്ചു പെറ്റ സന്തതികളാണെന്ന് ആലങ്കാരികമായി ഒരു കാച്ചും കാച്ചി. കടുവകളുടെ പൂര്‍വീകന്മാരായ സീബ്രകള്‍ക്കും ഇടക്ക് ചെളിയില്‍ കളിക്കണ സൂക്കേട് ഉണ്ടെന്നും കൂടെ ആയപ്പോ കടുവകള്‍ക്ക് സഹിക്ക്യോ? ഒറ്റ മാന്തങ്ങട് വെച്ച് കൊടുത്തു. (കൊടുക്കാൻ പാടില്ലാത്തതാണ്. നത്തല്ലേ. പോട്ടേന്ന് വെച്ചേക്കണം. നത്തിനും ഇല്ലേ നത്തവകാശം?)

എന്തായാലും പറഞ്ഞ് പറഞ്ഞെന്തായി.
കടുവ-സീബ്ര-സിംഹം-ചെളി പറഞ്ഞതിനല്ല നത്തിനു മാന്ത് കൊണ്ടതെന്ന് നത്തും പറയുന്നു കുറുക്കന്മാരും പറയുന്നു. പന്നിയെ കുത്താന്‍ തേനീച്ചയെ അയച്ചത് കടുവയാണെന്ന് പറഞ്ഞതിനാണത്രേ മാന്തിയത്.! ശ്ശെടാ മാന്തിയ കടുവയെക്കാള്‍ പ്രകോപനത്തെക്കുറിച്ച് നിശ്ചയം കുറുക്കന്മാര്‍ക്കോ. എന്താ കഥാ.. ഇതെന്താ വെള്ളരിക്കാക്കാടോ.?

എന്താ‍യാലും അട്യും പിട്യും ബഹളോം ഒക്കെ ആയി ഇപ്പോ കടുവേടേം നത്തിന്റെം ദേഹത്ത് മൊത്തം ചെളി ആയിന്നു പറഞ്ഞാല്‍ മതിയല്ലോ.

ഏതിനും, കഥയ്ക്കൊരു പരിസമാപ്തി വേണല്ലോ. പന്നി പണ്ടേ ചെളിയിലാണ്. പറഞ്ഞിട്ട് കാര്യമില്ല. എത്ര പേരുടെ ദേഹത്ത് ചെളി പറ്റുന്നോ അത്രയും പന്നിക്ക് സന്തോഷം. കുറുക്കന്മാര്‍ക്ക് അവരുടെ താല്പര്യങ്ങളും കാണും. കഥയ്ക്ക് പരിസമാപ്തി കടുവയും നത്തും കൂടെ അങ്ങ് തീര്‍ക്കണതാവും ബുദ്ധി അല്ലേ വായനക്കാരേ. കടുവേടെ കൂട്ടില്‍ പോയി ചൊറിഞ്ഞപ്പോ നത്തിനൊരു മാന്ത് കിട്ടി. നത്തതങ്ങട് ക്ഷമിക്യാ, കുറക്കന്മാരുടെ കൂട്ടത്തീന്ന് മാറി നില്‍ക്വാ, പന്നിയോട് പോയി പണി നോക്കാന്‍ പറയാ. കടുവകള്‍ക്കും ഉണ്ട് ചെയ്യാന്‍ കാര്യം. എന്തൊക്കെപ്പറഞ്ഞാലും മാന്തിയത് മഹാ മോശായിപ്പോയി. നത്തിനോട് അങ്ങ് മാപ്പ് പറഞ്ഞ് കോമ്പ്ലിമെന്റ്സാക്കിയേക്കാ... എല്ലാം കാണുന്ന ഒരു കാട്ടുമുത്തപ്പന്‍ ഉണ്ടെന്ന് നത്തിനും കടുവകള്‍ക്കും ഓര്‍മ വേണം. പന്നിക്കും കുറുക്കന്മാര്‍ക്കുമൊക്കെ എന്ത് കാട്ടുമുത്തപ്പന്‍?

അപ്പോള്‍ നത്തും കടുവകളും ഗോ റ്റു യുവര്‍ ക്ലാ‍സസ്!

മൂവീ നോട്സ് -2

2010-01-06T00:15:00.001-06:00

ബ്രിഡ്ജ്
ജീവിതങ്ങളെ പരസ്പരം ബന്ധിപ്പിക്കുന്ന കണ്ണികള്‍ ചിലപ്പോഴെങ്കിലും തിരിച്ചറിവുകള്‍ക്കും അപ്പുറത്തുള്ളതായിരിക്കും. സമൂഹത്തിലെ വിവിധ സോഷ്യോ-എക്കണോമിക് ബാക്ഗ്രൌണ്ടുകളിലെ ജീവിതങ്ങളെ തമ്മില്‍ പരസ്പരം ബന്ധിപ്പിക്കുന്ന പാലങ്ങള്‍ അഴുക്കുചാലുകളും ചവറ്റുകുട്ടകളും ഒക്കെയാവാം. ഉപേക്ഷിക്കപ്പെട്ടവരുടെ ജീവിതം എല്ലയിടങ്ങളിലും ഒന്നു തന്നെയാണ്.

ഒരുപാടു തലങ്ങളിലുള്ള വായന സാദ്ധ്യമാണെന്നത് സാങ്കേതികമായും മികവു പുലര്‍ത്തുന്ന റഷീദിന്റെ ബ്രിഡ്ജ് കഴിഞ്ഞ വര്‍ഷത്തെ മികച്ച സിനിമയുടെ സ്ഥാനത്തിനു അര്‍ഹമാക്കുന്നു.

പുറം കാഴ്ചകള്‍:
കാഴ്ചയും വീക്ഷണവും രണ്ടല്ലേ? ഓരോ മനുഷനും അവന്റേതായ വീക്ഷണങ്ങളുണ്ട് അവന്റെ കണ്‍‌വെട്ടത്തെ കാഴ്ചകളില്‍ നിന്നും രൂപപ്പെടുത്തിയിരിക്കുന്നവ. ദൂരയാത്രയില്‍ നിങ്ങളോടൊപ്പമിരിക്കുന്ന അപരിചിതന്‍ അസ്വാഭാവികമായ പെരുമാറ്റം പ്രകടിപ്പിച്ചാല്‍ നിങ്ങള്‍ എന്താവും ചിന്തിക്കുക?
വര്‍ഷങ്ങള്‍ക്കപ്പുറത്തെ നഷ്ടപ്രണയത്തിന്റെ വേദനയ്ക്ക് ഒരാളുടെ ജീവിതത്തില്‍ ഇന്നെന്തെങ്കിലും സ്ഥാനമുണ്ടോ?

ഹാപ്പി ജേണി:
ബാംഗ്ലൂരിലേക്കുള്ള രാത്രിബസ്സില്‍ കമിതാക്കളുടെ അനാശാസ്യം കണ്ടെത്തുന്ന നമ്മുടെ കണ്ണുകള്‍, കേരളത്തിലെ റൂട്ബസില്‍ സ്ത്രീകള്‍ നേരിടേണ്ടി വരുന്ന കടന്നുകയറ്റങ്ങള്‍ക്കെതിരെ സൌകര്യപൂര്‍വം കണ്ണടയ്ക്കുന്നു. ഉഭയസമ്മതപ്രകാരമുള്ള ലൈംഗികത അനാശ്യാസ്യവും ബസ്സില്‍ വെച്ചുള്ള തോണ്ടലും കമന്റടികളും സ്വാഭാവികമാവുന്നതിലെ അസ്വാഭാവികത നമ്മള്‍ കാണുന്നേയില്ല.
attacking is the best defense എന്നാണ് സംവിധായിക പറയുന്നത്

3 ഇഡിയറ്റ്സ്,
വളരുവാന്‍ വേണ്ടി തനിക്കൊരല്പം സൂര്യപ്രകാശം തരികയെന്നാണ് 3 ഇഡിയറ്റ്സിലെ ഗ്രാജ്വേഷന്‍ പൂര്‍ത്തിയാക്കാന്‍ കഴിയാത്ത സീനിയര്‍ വിദ്യാര്‍ത്ഥി വേദനയോടെ പാടുന്നത്. സമ്മര്‍ദ്ദമാണ് വിദ്യാര്‍ത്ഥികളെ പഠിപ്പിക്കാനുപയോഗിക്കേണ്ട രീതിയെന്ന് അദ്ധ്യാപകരും രക്ഷിതാക്കളും പലപ്പോഴും വിദ്യാര്‍ത്ഥികല്‍ തന്നേയും അംഗീകരിക്കുന്നുണ്ട്.
പുസ്തകം വള്ളിപുള്ളിവിടാതെ ഉരുവിടുന്ന അദ്ധ്യാപകനും അവ കേട്ട് നോട്ടെഴുതി എത് നോക്കി മനഃപാഠം പഠിച്ച് പരീക്ഷയ്ക്ക് അതേ പോലെ എഴുതുവെയ്ക്കുന്ന വിദ്യാര്‍ത്ഥികളും കുട്ടി ജനിച്ച് അഞ്ച് മിനിട്ടിനകം അവന്‍ എന്തായിത്തീരണം എന്ന് തീരുമാനിക്കുന്ന മാതാപിതാക്കളും നമുക്ക് ചിരപരിചിതമായ കാര്യങ്ങള്‍ മാ‍ത്രം.

അവതാരങ്ങള്‍ :
ആയിരം യുഗങ്ങളിലൊരിക്കല്‍ വരാറുള്ള അവതാരങ്ങളെയാണ് നമുക്ക് വേണ്ടത്. പേരിനോ ഭാഷയ്ക്കോ ഇടങ്ങള്‍ക്കൊ അതില്‍ വ്യത്യാസമില്ല. അന്ധവിശ്വാസങ്ങളെ പ്രോമോട്ട് ചെയ്യാന്‍ ശാസ്ത്രപദങ്ങളെ വ്യഭിചരിക്കുന്നതിന് കിഴക്കെന്നോ പടിഞ്ഞാറെന്നോ ഉള്ള വ്യത്യാസമൊന്നുമില്ല. പൂര്‍വീകരുടെ സംഭാഷണങ്ങള്‍ കേള്‍ക്കുന്ന മരത്തിന്റെ വേരുകളെ നാവികളുറ്റെ തലച്ചോറുമായി ബന്ധിക്കുന്നത് , മനുഷ്യന്റെ നാഢീവ്യൂഹങ്ങളിലെ സിനാപ്സ് പോലെ “എന്തോ“ ഒരു സംവിധാനമാണെന്ന് പറയുന്നത് കഥയിലെ ശാസ്ത്രജ്ഞ തന്നെയാണ്.

ജെയിംസ് കാമറൂണ്‍ പഴയ വീഞ്ഞ് പുതിയ കുപ്പിയില്‍ വില്‍ക്കുമ്പോള്‍ വീഞ്ഞിനു വീര്യമില്ലെന്ന് പ്രേക്ഷകനു തോന്നിയാല്‍ അത്ഭുതപ്പെടേണ്ടതില്ല.

നൊസ്റ്റാള്‍ജിയ
വയലാറിന്റെ ഗാനരചനയും ദേവരാജന്‍ മാഷിന്റെ സംഗീതവും വൃത്തത്തിലുള്ള കവിതയും എഴുപതുകളിലെ രാഷ്ട്രീയ പ്രബുദ്ധതയും നാട്ടിലെ പച്ചപ്പിനെക്കുറിച്ചുള്ള പ്രവാസിയുടെ ഗൃഹാതുരത്വം നിറഞ്ഞ ഓര്‍മകളും വികസനത്തെക്കുറിച്ചുള്ള ഹിപ്പോക്രാറ്റിക് നിലപാടുകളും. നൊസ്റ്റാള്‍ജിയ എന്നത് വെറുമൊരു തേങ്ങാക്കൊലയാണെന്ന് പത്മകുമാര്‍ പറയുന്നു.

തിരികെ ഞാന്‍ വരുമെന്ന് വാര്‍ത്ത കേള്‍ക്കാന്‍ കൊതിക്കുന്നവര്‍ ഗ്രാമത്തില്‍ കണ്ടെക്കുമെങ്കിലും തിരികെ ഒരു യാത്ര? ആര്‍ക്കുണ്ടതിനു സമയം, താല്പര്യം?

ഡിസ്നിയുടെ പ്രിന്‍സസ് ആന്‍ഡ് ഫ്രോഗ്
up പോലെയോ ക്രിസ്തുമസ് കരോള്‍ പോലെയോ കുതറയല്ല...
കളര്‍ഫുള്‍ ആന്‍ഡ് മ്യൂസിക്കല്‍....
പക്ഷേ ഡിസ്നിയുടെ സ്ഥിരം പാറ്റേണ്‍ ഫോളോ ചെയ്യുന്നു. ദ ഗുഡ്- ദ ബാഡ് ആന്‍‌ഡ് ഹാപ്പി എന്‍ഡിംഗ്സ്..
ഫെയറി ടെയിലിനെ പുതിയ കാലത്തേക്ക് പറിച്ച് നട്ടു. കുറച്ച് ട്വിസ്റ്റുകളും.
പക്ഷേ ഷെര്‍ക്ക് പോലെ വേറെ ഒരു തലത്തിലേക്ക് ചെല്ലുന്നില്ല. ആത്യന്തികമായി ഒരു ഫെയറി ടെയില്‍ ആയി അവശേഷിക്കുന്നു.
പുതിയ കാലത്തില്‍ കഥ പറയുമ്പോള്‍ മറ്റൊരു ലെവലിലേക്ക് എത്തിക്കാന്‍ ഉള്ള സ്കോപ് ഉണ്ടായിരുന്നു.

എന്നാലും ഒട്ടും ബോറടിക്കില്ല..
ഇന്‍ ഫാക്ട് പല സംഭവങ്ങളും നന്നായിട്ടുണ്ട്.
പിക്സാര്‍ ഫിലിംസ് കണ്ട ശേഷം ആനിമേഷന്‍ ഓഡിനറി ആയി തോന്നും.... എങ്കിലും മിന്നാമിനുങ്ങുകളെ ഒക്കെ വെച്ച് കളിച്ചത് സ്പെക്ടാക്കുലര്‍ തന്നെ...

വര്‍ണവിവേചനത്തിന്റെ പേരില്‍ വിവാദപുരുഷനായിരുന്ന ഡിസ്നിയുടെ പ്രൊഡക്ഷന്‍ ഹൌസില്‍ നിന്നും പുറത്തു വന്ന സിനിമയില്‍ മെയിന്‍ ഫീമെയില്‍ ക്യാരക്ടര്‍ കറുത്ത വര്‍ഗക്കാരി ആണെന്നത് ഒരു മധുരം.

ശ്ലോ(ശോ)ക കാൽ‌വിൻ

2009-10-12T19:00:00.005-05:00

മലയാളത്തിന്റെ കാര്യം പറഞ്ഞാൽ നമ്മളൊക്കെ പത്താം ക്ലാസും ഗുസ്തിയുമാണ്. ഏഴാം ക്ലാസിൽ വെച്ച് രത്നമ്മ റ്റീച്ചർ മുറ്റുവിന, പറ്റുവിന, പേരച്ചം, വിനയച്ചം എന്നൊക്കെ പറഞ്ഞപ്പഴേ മനസിലുറപ്പിച്ചതാണ് എന്നൊരു ചാൻസ് കിട്ടുമോ അന്നീ മലയാളപഠനം നിർത്തുമെന്ന്.

നന്മകളാൽ വിശുദ്ധമായ നാട്ടിൻപുറത്തെ (കോപ്പാ) ഉസ്കൂളുകളിൽ നിന്നും പത്താം ക്ലാസ് പാസാവും വരെ കാത്തിരിക്കേണ്ടി വന്നൂയെനിക്ക് സെക്കന്റ് ലാം‌ഗ്വേജ് കിണ്ടിയാക്കി മാറ്റാൻ.

ആയെന്നോട് മലയാളത്തിൽ, അതും സംസ്കൃതവൃത്തത്തിൽ, നാലു വരി പദ്യമെഴുതാൻ പറഞ്ഞാൽ എങ്ങിനെയിരിക്കും?

ഗുരുവിനൊക്കെപ്പിന്നെയെന്തുമാവാമല്ലോ. നോക്കണേ വസന്തയുടെ തിലകത്തിൽ പൂരിപ്പിക്കണമെന്ന്!
- - - - - - - - - - -
- - - - - - - - - - -
- - - - - - - - - - -
ലോകത്തിലിന്നുമിതുപോലെ മനുഷ്യരുണ്ടോ?

(എനിക്കും അതന്നെയാ ചോയ്‌ക്കാൻ ഉള്ളത്. ലോകത്തിലിന്നുമിതുപോലെ മനുഷ്യരുണ്ടോ? മനുഷ്യൻ ചൊവ്വേലേക്ക് ആനക്കുട്ടിയെ കയറ്റി അയക്കുന്ന യുഗാണ്... വസന്തതിലകം പോലും!)

നമ്മടെ ഉമേഷണ്ണനല്ലേ, പാവല്ലേ, ഒരു പോസ്റ്റിട്ടതല്ലേന്നു കരുതി സ്നേഹത്തിന്റെ പൊറത്ത് (വെറും സ്നേഹത്തിന്റെ പൊറത്ത് ) ഒരു പൂരണം അങ്ങട് കാച്ചിയെന്നൊരു തെറ്റേ ഞാൻ ചെയ്തൊള്ളൂ. ദോണ്ടെ ദിങ്ങനെ.

കാൻസർ ചികിത്സിക്കാൻ ലാടവൈദ്യം മുഴു
ഭ്രാന്തുകൾ മാറ്റിടാൻ മന്ത്രവാദം; നിധി
കുംഭങ്ങൾ പൊക്കുവാൻ തൊണ്ണൂറുലക്ഷം
ലോകത്തിലിന്നുമിതുപോലെ മനുഷ്യരുണ്ടോ?

അപ്പോ അതിനു വൃത്തം പോരാ ന്ന്! ഹും!

ന്നാ പിന്നെ വൃത്തമില്ലാഞ്ഞിട്ടാർക്കും ഉറക്കമില്ലായ്മ വേണ്ടാന്ന് കരുതി ഇട്ടു കൊടുത്തു വൃത്തത്തിലൊരെണ്ണം.

നീരിൽ പ്രസന്നമൊരു ഭാസുര തോറ്റുപോമാ
ക്ലാരിറ്റി കൂടിയ കമന്റിനൊടെന്നിരിക്കെ
ബ്ലോഗർക്കു സിമ്പിൾ കഥയിന്നു മനസ്സിലാക്കാൻ
ഈ പാവമാം ഗഡിയെ ചീതു പറഞ്ഞിടാമോ?

വൃത്തം ശര്യായപ്പോ അതിനർത്ഥം പോരാന്ന്.!!!!
(അര്‍ഥം അനര്‍ഥമായ് കാണാതിരുന്നാല്‍, അക്ഷരത്തെറ്റു വരുത്താതിരുന്നാല്‍.....ഇരുന്നാൽ... ഇരുന്നാലെന്താ? അവനനവനു കൊള്ളാം. )

വിട്വോ നമ്മള്... മീ ഹൂ സൺ? ഞാനാരാ മോൻ...

കാച്ചി വേറൊരെണ്ണം വൃത്തോം അർഥോം ഒപ്പിച്ചിട്ട്! (എന്റെ രണ്ടര മണിക്കൂർ ഹുദാ ഗവാ)

വോട്ടിന്നു വേണ്ടി ശശിമുണ്ടു ധരിച്ചിടാമെ-
ന്നാൽ കേന്ദ്രവാസമൊരു താജിൽകുറഞ്ഞ് പോരാ
ട്വീറ്റുമ്പൊ കോമഡി പശുക്കളെ പോലെയീ,ഭൂ
ലോകത്തിലിന്നുമിതുപോലെ മനുഷ്യരുണ്ടോ?

ദേണ്ടെ കേക്കണേ രസം. അപ്പോ അതിലു യതിഭംഗം വന്നത്രേ? (അതു പോരാഞ്ഞിട്ട് താജിലെ ‘ജാ‘ക്കെന്തോ കുരുവിന്റെ അസുഖമുണ്ടെന്ന്). ഇങ്ങേരെയൊക്കെ എന്താ ചെയ്യണ്ടതെന്ന് നിങ്ങള് തന്നെ പറ? ഏ ഏ?
നമ്മൾക്കെന്തോന്ന് യതി? ഹിമായത്തിലെങ്ങാണ്ട് എന്തോ ഒരു യതിയുണ്ടെന്ന് കേട്ടിട്ടുണ്ടെന്നല്ലാതെ.

സ്റ്റെപ്പിനി ശ്ലോകം ആയി ഒരു ലതച്ചേച്ചിയേയും ചേച്ചീടെ പ്രേമിച്ചൊളിച്ച് പോയ മോളെക്കുറിച്ചും ഒരെണ്ണം കൂടെ കാച്ചിയിരുന്നു. ദിങ്ങനെ...

ലാളിച്ചുപെറ്റലതയൻപൊടു ശൈശവത്തിൽ
ചേലൊത്ത ചേലകൾ നൽകീ പല വർണ്ണമെന്നാ
ലമ്മോ‍ളൊരുത്തനു ഛെ ലൈനതൊളിച്ചു പോയീ
ലോകത്തിലിന്നുമിതുപോലെ മനുഷ്യരുണ്ടോ?

സംഗതി അതിഫീകരപൂരണമായതിനാലാവണം.... വൃത്തത്തെക്കുറിച്ചോ അർത്ഥത്തെക്കുറിച്ചോ കമാ എന്നൊരക്ഷരം മിണ്ടീട്ടില്ല... ബൈ ദി വേ കമാ രണ്ടക്ഷരമല്ലേ? ആ അതെന്തോ ആവട്ടെ. പക്ഷേ എനിക്ക് കുമാരനാശാനോട് ചിലത് ചോദിക്കാൻ ഒണ്ട്. അല്ലാശാനേ ഈ ലാളിച്ചോണ്ടെങ്ങിനെയാ പെറുന്നത്? പെറ്റ ശേഷമല്ലേ ലാളിക്കണത്? ആ ഇപ്പോ പെങ്കുട്യോളൊക്കെ സ്വപ്നത്തിൽ ട്രയിനിൽ കിടന്നും പ്രസവിക്കും. അപ്പോ ലാളിച്ചോണ്ടും പ്രസവിക്കാമെന്നായിരിക്കും. വെറുതെയല്ല “ആശാനതിശയഗംഭീരൻ”* എന്നൊക്കെ എട്ടാം ക്ലാസിൽ പഠിക്കണ മരുമകനുണ്ണി ഇടക്ക് പാടണത് കേൾക്കുന്നത്! അതിശയമല്ലേ ഇതൊക്കെ! )

അർത്ഥമില്ല, വൃത്തമില്ല, യതിഭംഗിയില്ല, കണ്ഠശുദ്ധി പോരാ എന്നൊക്കെ ഹിസ് ഹൈനസ് അബ്ദുള്ളയിൽ വിരഹിണി രാധ ഗായകരെ വിലയിരുത്തും പോലെ എന്റെ അതിഗംഭീരപദ്യങ്ങളെ വിലയിരുത്തുന്നത് കണ്ട് സഹിക്കാൻ മേലാതിരിക്കുമ്പോഴാണ് നല്ല പൂവമ്പഴം പോലത്തെ ഒരു ചാൻസ് ഒത്തു വന്നത്.

അതിലേ പോയ ഒരു മാതൃഭൂമി വാർത്തയെ ഇതിലേ പോയ ചന്ത്രക്കാരൻ വെറുതെ ഒന്നു ചൊറിഞ്ഞത് കണ്ടപ്പം വക്കാരിക്ക് ഒടുക്കത്തെ കലിപ്പ്. അത് കണ്ട ഉമേഷണ്ണൻ അതിൽ ചെന്നെടപെടണ്ട വല്ല കാര്യോമുണ്ടോ? (മൊട കണ്ടാൽ യെടപെടാൻ ഇങ്ങോരു രായമാണിക്യൊന്നുമല്ലല്ല്!). അടി സ്ഥാനത്ത് കൊണ്ട വക്കാരി ഉമേഷണ്ണനെ പോസ്റ്റിലൂടെ ദേ തലങ്ങും വിലങ്ങും ഇട്ട് കൊട്ടുന്നു (പറയുന്നതിനു പ്രത്യേകിച്ച് അർത്ഥമോ അർത്ഥാപത്തിയോ ഒന്നുമില്ലെങ്കിലും).

ശ്ലോകമെഴുതിയ ശോകം മാറ്റാൻ ഇതല്ലേ ബെസ്റ്റ് ചാൻസ്! കൊടുത്തു ഗുരുവിനു തന്നെ ഒരെണ്ണം!

ക്ഷിപ്രം ശമിച്ചു ഹ! സിസിക്കുമഹന്ത കണ്ടാ-
വക്കാരിയെന്തൊരു കലിപ്പൊരു പോസ്റ്റുമിട്ടൂ
ഹമ്പോകമന്റിയൊരുമേഷിനു കിട്ടി കൊട്ടും
ലോകത്തിലിന്നുമിതുപോലെ മനുഷ്യരുണ്ടോ?

ഹൊ ഇപ്പോ എനിക്ക് സമാധാനമായി...,, ഇനിയെന്ത് പറയും എന്നൊന്ന് കാണണമല്ലോ!

വൃത്തമുണ്ടോ? - ഒണ്ട്.
അർത്ഥമില്ലേ? - അതല്ലേ ഉള്ളൂ.
യതിഭംഗം? - മിണ്ടരുത് തല്ലി റോട്ടിലിടും.

നമ്മള് വിചാരിച്ചാലും ഇവിടെ ചെലതൊക്കെ നടക്കും. ഹല്ല പിന്നെ!

അനുവിന്റെ ബന്ധു:
ദീപശിഖാകാളിദാസൻ എന്നൊക്കെപ്പറയുമ്പോലെ ബ്ലോഗശ്ലോകാകാൽ‌വിനാനന്ദ് എന്നെങ്ങാൻ എന്നെയും ഇനി ആരെങ്കിലും വിശേഷിപ്പിച്ചുകളയുമോന്നാ!

----
*“ആശാനാശയ ഗംഭീരൻ, ഉള്ളൂരുജ്ജ്വല ഗായകൻ, വള്ളത്തോൾ ശബ്ദസുന്ദരൻ” എന്ന് ശരിയായ രൂപം

രജനീകാന്തിനെ എനിക്കിഷ്ടമാണോ?

2009-09-28T22:20:00.001-05:00

ചില നടന്മാരുണ്ട്. മുടിഞ്ഞ സ്ക്രീൻപ്രസൻസ് ആയിരിക്കും. ഫ്രെയിമിൽ വേറെ എത്ര വേന്ദ്രന്മാരും വേന്ദ്രികളും ഉണ്ടെങ്കിലും കാണികളുടെ മൊത്തം നോട്ടവും അവരിലേക്കൊതുങ്ങും.

വിശ്വാസമായില്ലെങ്കിൽ അന്നിയനിലെ പ്രേമത്തിന്റെ ആനയെ വരക്കുന്നെ റെമോ പാട്ട് കണ്ടു നോക്കൂ. സുന്ദരിയായ യാന ഗുപ്തയെപ്പോലും ശ്രദ്ധിക്കാൻ നമ്മൾ മറന്ന് പോവുന്നില്ലേ വിക്രം എന്ന വിദ്വാന്റെ ലീലാവിലാസങ്ങൾ കാരണം?

രജനീകാന്ത് ഏതാണ്ടാ സൈസ് ഒരു സംഭവം ആണെന്ന് തോന്നുന്നു. ഇതുവരെ രജനീകാന്ത് നായകനായ ഒരു സിനിമ മുഴുവൻ ഇരുന്ന് കാണാൻ ഉള്ള മഹാഭാഗ്യം എനിക്കുണ്ടായിട്ടില്ലെങ്കിലും പുള്ളിയെ എനിക്കിഷ്ടമാണ്.

ബാഷയെന്ന സിനിമ കാണാൻ ഇരുന്നത് കോളേജ് ഹോസ്റ്റലിൽ വെച്ചായിരുന്നു. മാമാ മിയാ.! എന്തൊക്കെ ബഹളങ്ങളാരുന്നു...!

കോട്ടിട്ട ഒരു മുതലാളിയുടെ ഓഫീസ് മുറിക്കകത്തേക്ക് കൂസലില്ലാതെ കേറിച്ചെല്ലുന്ന രജനി.

യേൻ പേര് മാണിക്കം. എനക്ക് ഇന്നും ഒരു പേർ ഇരിക്ക്.
ഇന്റർകട്ട്.!
കൊളാഷ്...
ബാഷ! ബാഷ! ബാഷ (ബാക്ഗ്രൌണ്ടിൽ ടെർമിനേറ്ററിന്റെ തീം മ്യൂസിക് ഡീഡിം ഡിം ഡിം...)
ബോംബെയിലെ രജനീകാന്ത് ഡോണിന്റെ പല പല രംഗങ്ങളുടെ കൊളാഷ്.
പിന്നേം ഇന്റർകട്ട്....
ഞെട്ടിത്തരിച്ചിരിക്കുന്ന കോട്ടിട്ട മുതലാളി.

അമ്മച്ചീ നമിച്ച്....

സിനിമയുടെ പാതിവഴിയിലെപ്പോഴോ ഒറ്റക്കൈ കൊണ്ട് ബോംബ് ദൂരേക്കേറിഞ്ഞ് ഡിഫ്യൂസ് ചെയ്യുന്ന സീൻ എത്തിയപ്പോഴേക്കും കണ്ണുകൾ താനേ അടഞ്ഞ് പോയി... പിന്നെ പിറ്റേന്ന് നേരം വെളുത്തതാണ് ഓർമ.

ചന്ദ്രമുഖി തിയേറ്ററിൽ തന്നെ ചെന്ന് ഇരുന്നിട്ട് പോലും മുഴവൻ സമയം കണ്ണ് തുറന്നിരിക്കാൻ പ്രജ്ഞ അനുവദിച്ചില്ല :-/

തളപതി കാണാനായി ശ്രമിച്ചപ്പോഴും ഫലം തഥൈവ!

ഹാവിംഗ് സെഡ് ഓൾ ദീസ്, രജനീകാന്തിനെ എന്തൊക്കെയോ കാരണങ്ങൾ കൊണ്ട് എനിക്കിഷ്ടമാണ്. മുന്നേ പറഞ്ഞ സ്ക്രീൻ പ്രസൻസാണ് കാരണം എന്ന് തോന്നുന്നു. രജനീകാന്തിന്റെ എനിക്കേറ്റവും ഇഷ്ടപ്പെട്ട ഒരു വീഡിയോ താഴെ. ഇളയരാജയുടെ അതിഗംഭീരസംഗീതം. സുന്ദരിയായ ഖുശ്ബ്ബൂ.

കണ്ടിഷ്ടെപ്പെട്ടെങ്കിൽ ചെറിയൊരു പുഞ്ചിരിക്കായി താഴെയുള്ള വീഡിയോയും കാണാം. സ്റ്റാർ സിംഗർ അണ്ണാച്ചിയുടെ എനിക്കിഷ്ടപ്പെട്ട ചുരുക്കം ചില പാട്ടുകളിലൊന്ന്.

മമ്മൂട്ടിയുടെ ഡാൻസിനെപ്പറ്റി നോ കമന്റ്സ്.. കുട്ടിച്ചാത്തന്റെ ഉപദ്രവമുള്ള സ്ഥലമാണീ ബ്ലോഗ് ബ്ലോഗ് എന്ന് പറയുന്നത്.

ജര (കഥ)

2009-08-24T23:00:00.002-05:00

മൂക്കിനു കീഴെ തൂവെള്ള നിറത്തിൽ വളർന്നു നിന്നിരുന്ന അച്ഛന്റെ മീശ ഒരാഴ്ച കൊണ്ട് പൂർണമായും കറുത്തിരിക്കുന്നു. അച്ഛനെന്തോ സംഭവിക്കുന്നുണ്ടെന്ന് തീർച്ച. ചുണ്ടുകൾക്ക് ചുവപ്പു കൂടിയതും മുഖത്തെ ചുളിവുകൾക്ക് കുറവു വന്നതും എല്ലാം നേരത്തെ ശ്രദ്ധിക്കാഞ്ഞതല്ല.

നൂറ്റിനാല്പതിൽ എത്തി നിന്നിരുന്ന രക്തസമ്മർദ്ദം രണ്ടാഴ്ചയ്ക്കുള്ളിൽ സാധാരാണനിലയിലെത്തിയപ്പോൾ ആദ്യം അസ്വാ‍ഭാവികതയൊന്നും തോന്നിയിരുന്നില്ല.

അല്ലെങ്കിലും അച്ഛനെന്നും അതിശയിപ്പിച്ചിട്ടല്ലേയുള്ളൂ. ഇളയമ്മയെ ആദ്യമായി കണ്ട ദിവസം, പതിവു പോലെ അമ്മയുടെ രാത്രിഭക്ഷണത്തിൽ ഉറക്കഗുളിക ചേർത്തിട്ട് ഒന്നുമറിയാതെ കിടന്നുറങ്ങിയ അച്ഛന്റെ രക്തക്കുഴലുകളിലൂടെ ഒഴുകിയ രക്തത്തിനു ഒരിറ്റു വേഗത പോലും കൂടിയതായി തനിക്കറിയില്ല. “കൊലപാതകി” എന്ന് മുഖത്തു നോക്കി വിളിക്കാൻ ധൈര്യം കാണിച്ച ചേട്ടനെ, എന്നെന്നേക്കുമായി തെരുവിലേക്ക് വലിച്ചെറിയുമ്പോൾ മുഖത്തെ പേശികൾ പോലും അല്പമൊന്ന് വലിഞ്ഞു മുറുകിയതായി ഓർമയില്ല.

എന്താണ് ഒരിക്കലും അച്ഛനെ എതിർത്തൊന്നും പറയാതിരിക്കാൻ തനിക്ക് കഴിയാതെ പോയത്?
വൈകുന്നേരങ്ങളിൽ, ഓഫീസ് മുറിയിലെ ചുവന്ന വെൽ‌വെറ്റ് കസേരയിൽ തന്നെ മടിയിലിരുത്തി പരുത്ത വിരലുകൽ കൊണ്ട് കൈത്തണ്ടകളിലുഴിഞ്ഞ് അച്ഛനെന്നും പറയാണ്ടായിരുന്നു.

“നീയാണെന്റെ ഏകമകൻ. എന്റേതെല്ലാം നിന്റെയാണ്. നിന്റേതെല്ലാം എന്റേതും”

അച്ഛൻ ധനികനായിരുന്നു. എല്ലാ അർഥത്തിലും. പണം കൊണ്ട് നേടാവുന്നതെല്ലാം അച്ഛൻ നേടിയെടുത്തു. സ്വന്തമായി നടത്തുന്ന സ്കൂളിൽ നിന്നും തന്നെ ഏറെ പണം നിയമനങ്ങൾക്കായുള്ള കൈക്കൂലിയായി അച്ഛൻ സമ്പാദിച്ചിരുന്നു.

“മണി ഈസ് വാട് മണി ഡസ്”

അച്ഛൻ എപ്പോഴും പറയാറുള്ള വാക്കുകൾ തന്റെ മനസിന്റെ ഉള്ളറകളിൽ പോലും പതിഞ്ഞിരിക്കണം. അതു കൊണ്ടായിരിക്കണം അച്ഛനെ എതിർക്കാൻ ധൈര്യം കാണിച്ച് വീടു വിട്ടിറങ്ങിപ്പോയ ചേട്ടനെപ്പറ്റി ഭാമയോട് പറഞ്ഞപ്പോൾ “മണ്ടൻ” എന്നൊരു വിശേഷണം കൂടെ ചേർക്കാൻ തോന്നിയത്. അവൾക്കത് രസിച്ചില്ലെങ്കിലും.

ഇളയമ്മയും പോയ ശേഷം അച്ഛനിലും കണ്ടില്ലേ വാർദ്ധക്യത്തിന്റെ ചിഹ്നങ്ങൾ? തലയിലെ രോമങ്ങൾക്കിടയിൽ അവിടെയും ഇവിടെയും ഉയർന്നു നിന്ന വെള്ളിവരകളെ, ചായം തേച്ചു വീണ്ടും മിനുക്കിയെടുത്തെങ്കിലും, നെറ്റിയിൽ നിന്നു മുകളിലേക്ക് വിസ്താരം കൂടിക്കൊണ്ടിരുന്ന കഷണ്ടിയും, ചുളിവുകൾ അടിക്കടി കൂടി വന്നുകൊണ്ടിരുന്ന തൊലിയുമെല്ലാം, ഉറക്കെയുറക്കെ വിളിച്ചു പറഞ്ഞില്ലേ അച്ഛനും വൃദ്ധനായെന്ന്.

എന്നു മുതലാണ് അച്ഛൻ വീണ്ടും യുവത്വത്തിലേക്ക് തിരിച്ച് വരാൻ തുടങ്ങിയത്? ഭാമ വീട്ടിലെത്തിയ അന്നു മുതലാണെന്ന് തനിക്ക് വെറുതെ തോന്നുന്നതാവണം. ഭാമയുടെ കൈപിടിച്ച് ആദ്യമായി വീട്ടിൽ വന്നു കയറിയ നിമിഷത്തിൽ, വൃദ്ധന്റെ വെളിച്ചം മങ്ങിത്തുടങ്ങിയ കണ്ണുകളിൽ തിളക്കം വീണ്ടും പ്രത്യക്ഷപ്പെട്ടത് കണ്ടില്ലെന്ന് നടിക്കാനായിരുന്നു തനിക്കിഷ്ടം.

അനുരാഗത്തിന്റെ ആദ്യദിനങ്ങളിൽ, ഇഴുകിച്ചേരലിന്റെ നിമിഷങ്ങളിൽ, കിടപ്പറയിലെ ജനലിനപ്പുറം നിഴലുകൾ പലപ്പോഴും ഇളകുന്നതായി തോന്നിയിരുന്നു.

ഭാമ അസ്വസ്ഥയാ‍യിരുന്നു. ഇനിയും നേരെയാക്കാൻ തനിക്കു സമയം കണ്ടെത്താൻ കഴിയാത്തത് കാരണം ഇളകിയ കൊളുത്തുള്ള കുളിമുറിയിൽ, പഴയ ഉഷ ഫാനിന്റെ ശക്തിയിൽ ഇളകിയാടുന്ന കർട്ടനുകൾ ഉള്ള കിടപ്പുമുറിയിൽ, തീന്മേശയിൽ ഭക്ഷണം വിളമ്പുമ്പോൾ, അലക്കുമ്പോൾ, വസ്ത്രങ്ങൾ ഇസ്തിരിയിടുമ്പോൾ എല്ലാം അവൾ അസ്വസ്ഥയാവുന്നത് തനിക്കറിയാമായിരുന്നു.

നോട്ടങ്ങളിലുടെ, ചലനങ്ങളിലൂടെ ഒടുവിൽ സഹികെട്ട് വാക്കുകളിൽ കൂടെ അവൾ സൂചിപ്പിച്ചവയെല്ലാം കണ്ടില്ലെന്നും കേട്ടില്ലെന്നും നടിക്കുവാനേ തനിക്കു നിർ‌വാഹമുണ്ടായിരുന്നുള്ളൂ.

“ഗൌതമൻ.....”
അവളുടെ ശബ്ദത്തിൽ വെറുങ്ങലിപ്പ്.
മകളല്ലേ ഞാൻ?,...... അച്ഛന്റെ?”

ഒന്നും പറയാനില്ലായിരുന്നു തനിക്ക്.

വെളുത്തിരുന്ന അച്ഛന്റെ മീശ അനുദിനം കറുത്തു വരികയാണ്. ചായങ്ങൾ ഈയിടെയായി അച്ഛൻ ഉപയോഗിക്കാറില്ല്ലെന്ന് തീർച്ച. അല്ലെങ്കിലും ചായങ്ങൾ കൊണ്ടൊരിക്കലും മുഖത്തെ ചുളിവുകൾ മായില്ലല്ലോ. കൂനിത്തുടങ്ങിയ നട്ടെല്ല് വീണ്ടും നിവരില്ലല്ലോ.

സ്കൂളിലെ പുതിയ നിയമനത്തിന് കടലാസുകൾ ശരിയാക്കാൻ അച്ഛനു തന്നെ പോകാമായിരുന്നു. ടിക്കറ്റു ബുക്ക് ചെയ്ത ശേഷം നാളെത്തന്നെ പോകാൻ അച്ഛൻ ആജ്ഞാപനത്തിന്റെ സ്വരത്തിൽ പറഞ്ഞപ്പോൾ എതിർക്കാൻ ശക്തി പോരായിരുന്നു.

“ഉഡുപ്പിയിൽ മുറി ബുക്ക് ചെയ്തിട്ടുണ്ട്. രണ്ട് ദിവസം താമസിച്ച് എല്ലാം ശരിയാക്കിയിട്ട് തിരിച്ച് വന്നാൽ മതി”.

ശരിയെന്ന ഭാവത്തിൽ തല കുലുക്കി തിരിച്ച് നടക്കുമ്പോൾ കണ്ടു, ഭാമയുടെ കണ്ണിലെരിയുന്നതെല്ലാം. പുച്ഛം തന്നെയായിരിക്കണം. യാത്ര തുടങ്ങാനായി ബാഗിൽ തുണികൾ കുത്തിനിറയ്ക്കുമ്പോഴേക്കും പുച്ഛവും രോഷവുമെല്ലാം ദയനീയതയോ മറ്റോ ആയി മാറിയിരുന്നെങ്കിലും.

പോകരുതെന്ന് ഓരോ നോട്ടത്തിലൂടെയും അവൾ തന്നോട് പറയുന്നുണ്ടായിരുന്നു. ഇറങ്ങുമ്പോൾ അവളുടെ നഖങ്ങൾ എന്റെ കൈത്തണ്ടയെ ശക്തിയായി അള്ളിപ്പിടിക്കാൻ ശ്രമിക്കുന്നുണ്ടായിരുന്നു. നഖങ്ങൾ ആഴ്ന്നിറങ്ങിയ കൈത്തണ്ടയിൽ ശക്തമായ നീറ്റൽ!

തിരിച്ചെത്തിയ ശേഷം അവളുടെ കണ്ണുകളിലേക്ക് നോക്കാതിരിക്കാൻ ഞാൻ ശ്രമിച്ചു കൊണ്ടേയിരുന്നു. പക! എനിക്കറിയാം.

പക്ഷേ എന്നെ അത്ഭുതപ്പെടുത്തുമാറ് അവളുടെ മുഖത്ത് ഒരു തരം നിസ്സംഗത മാത്രമേ അവശേഷിച്ചിരുന്നുള്ളൂ.

രാത്രിയിൽ അവളുടെ ശരീരത്തെ തൊടാൻ പോലും ഭയന്നു പോയി. അവളുടെ മനസിൽ നിറഞ്ഞൊഴുകുന്ന വെറുപ്പിന്റെ ചൂട് അവളെ തൊടാതെ തന്നെ എന്നെ ചുട്ടുപൊള്ളിക്കുന്നുണ്ടായിരുന്നു.

എങ്ങോ നോക്കിക്കൊണ്ട് അവളുടെ ചുണ്ടുകൾ പതുക്കെ ശബ്ദിച്ചു.
“ഗൌതമൻ , ഒന്നു ചോദിച്ചോട്ടെ?“
എന്റെ അനുവാദത്തിനവൾ കാത്തു നിന്നില്ല.
“ആ പഴയ കഥയില്ലേ. പിതാവിനു തന്റെ യുവത്വം നൽകി പകരം ജരാനരകൾ ഏറ്റുവാങ്ങിയ പുത്രന്റെ കഥ.“
എവിടേയ്ക്കാണ് അവളുടെ ചിന്തകൾ പോകുന്നതെന്നറിയാമായിരുന്നെങ്കിലും മറുപടിയായി ചോദ്യഭാവത്തിലൊന്ന് മൂളാതിരിക്കാൻ കഴിഞ്ഞില്ല.
“എനിക്കൊരു സംശയം, പിതാവിനു യുവത്വം ദാനം ചെയ്ത പുത്രന് രാജ്യം പ്രതിഫലമായി ലഭിച്ചതാണോ അതോ രാജ്യം പ്രതിഫലമായി ഇച്ഛിച്ച പുത്രൻ യുവത്വം തന്റെ പിതാവിന് അടിയറവ് വെച്ചതോ?“

ഒരായിരം മുള്ളുകൾ തലച്ചോറിനകത്തെവിടെയൊക്കെയോ തറഞ്ഞു കയറി.

ഓടിപ്പിടഞ്ഞെഴുന്നേറ്റ് ബാത്ത്‌റൂമിലെ ഏകാന്തതയിലൊളിക്കാനാണ് തോന്നിയത്. ബാത്ത്‌റൂമിലെ അരണ്ട വെളിച്ചത്തിലും വ്യക്തമായി തന്നെ കണ്ടു. തന്റെ തലമുടികൾ വെളുത്തിരിക്കുന്നു!

ജീവിതവിജയവും മരമാക്രിയും

2009-08-05T22:15:00.000-05:00

പുറത്ത് നല്ല മഴ. റൂമിനകത്ത് ഇളം തണുപ്പ്. ചിക്കനും വീറ്റ് ദോശയും നർഗീസി കോഫ്തക്കാരൻ സ്നേഹത്തോടെ തന്നുവിട്ട അച്ചാറും കൂട്ടി തട്ടി ഒരു ഏമ്പക്കവും വിട്ടു. മനോഹരമായ കാലാവസ്ഥ. ലാപ്പിടോപ്പിയിൽ നിന്നും റഫിയുടെ ശബ്ദം.
“ആജ് മോസം ബഡാ ബയ്‌മാന് ഹേ ബഡാ”

ആഹാ.. സുഖം സ്വസ്ഥം സുന്ദരം.... ജീവിതം എത്ര സുന്ദരം? സിന്ദഗി കിത്നാ സുന്ദർ ഹേ? ലൈഫ് സോ ഗുഡ്. വാഴ്കൈ റൊമ്പ ... റൊമ്പ... റൊമ്പ... ആ എന്തരോ....

പെട്ടെന്നാണ് ഇടിത്തീ പോലെ മരമാക്രിയുടെ പോസ്റ്റ് കണ്ണിൽ‌പ്പെട്ടത്. ജീവിതവിജയം നേടുന്നതിന്റെ ഡഫനിഷം മാക്രി വിവരിച്ചിരിക്കുന്നു

എന്താണ് ജീവിതവിജയം?

ബ്യൂറോക്രസിയില്‍ ഇന്ത്യന്‍ സിവില്‍ സെര്‍വിസ്‌
എഞ്ചിനീയറിംഗ് എങ്കില്‍ ഐഐടി, കുറഞ്ഞത് എന്‍ഐടി (പഴയ ആര്‍ഈസി)
മെഡിസിന്‍ എങ്കില്‍ AIIMS, JIPMER, Vellore - ഇതില്‍ ഏതിലെങ്കിലും ഒന്ന്
ബ്രിട്ടനില്‍ ഓക്സ്ഫഡ്, അല്ലെങ്കില്‍ കേംബ്രിജ്‌
അമേരിക്കയില്‍ പോകുന്നവര്‍ ഏതെങ്കിലും ഐവി ലീഗ് സര്‍വകലാശാലകളില്‍/കോളജുകളില്‍ ഏതിലെങ്കിലും അഡ്മിഷന്‍ നേടിയിരിക്കണം (Ivy League - Columbia, Brown, Yale, Cornell, Dartmouth, Harvard, Princeton, Pennsylvania)
അമേരിക്കയില്‍ മെഡിസിന്‍ പഠനമാണ്‌ ഉദ്ദേശിക്കുന്നതെങ്കില്‍ ജോണ്‍ ഹോപ്കിന്‍സ് അല്ലെങ്കില്‍ മയോ

നശിച്ചു... ഇടിവെട്ടി... പണ്ടാരടങ്ങി.

ബ്യൂറോക്രസി പോയിട്ട് ഹിപ്പോക്രസി പോലും ഇല്ല

എഞ്ചിനീയറിംഗ്... തേങ്ങാക്കൊല. ഐഐടിയുടെ പടി പോലും കണ്ടിട്ടില്ല. എൻ.ഐ.ടി യിൽ രാഗം പരിപാടി കാണാൻ പോയിട്ടുണ്ട്.

മെഡിസിൻ അസുഖം വരുമ്പോൾ കഴിക്കാറുണ്ട്.

ബ്രിട്ടൻ കണ്ടിട്ടുണ്ട്. നമസ്തേ ലണ്ടൻ സിനിമക്കകത്ത്.

അമേരിക്കയിൽ വന്നത് വേസ്സ്റ്റ് ആയി... ഇപ്പറഞ്ഞ യൂണീവേഴ്ക്കിറ്റികളുടെ വെബ്സൈറ്റ് പോലും കണ്ടിട്ടില്ല.

അമേരിക്കയിൽ മെഡിസിൻ പഠനത്തിനു മയോ... മ###... എന്നെക്കൊണ്ടൊന്നും പറയിക്കണ്ട...

തീർന്നില്ലേ? ജീവിതം വേസ്റ്റ്... ഇനി ഞാനെന്തിനു ജീവിച്ചിരിക്കണം?...

ലാപ്പിടോപ്പിയിലെ പാട്ട് വേഗം മാറ്റി...
“യേ ദുനിയാ യേ മെഹഫിൽ മേരെ കാം കീ നഹീ മെരേ കാം കീ നഹീ...”

ഇനിയിപ്പോ ആത്മഹത്യ ചെയ്യാതെ മറ്റു വഴി ഒന്നുമില്ല. തോണിക്ക് തല വെക്കാം എന്നാ‍ണ് തീരുമാനം. പകരം പട്ടണത്തിൽ ഭൂതം തിയേറ്ററിൽ പോയി കണ്ടാലോ എന്നും ആലോചനയുണ്ട്.

ഏതായാലും മരിക്കും മുൻപേ ഒരു നല്ല കാര്യമെങ്കിലും ചെയ്തു മരിച്ചില്ലെങ്കിൽ എന്റെ ആത്മാവിനെങ്ങാനും നെഗറ്റീവ് എനർജി വന്നാലോ?
അതുകൊണ്ടാണ് പൊതുതാല്പര്യപ്രകാരം ജീവിതവിജയത്തിനുള്ള അളവുകോലും മാർഗങ്ങളും ബ്ലോഗ് വഴി പ്രസിദ്ധീകരിച്ചുകളയാം എന്നു കരുതിയത്.

മാക്രിയുടെ ഡഫനിഷനിൽ എല്ലാം വിജയം എന്നു പറയുന്നത് ഒരു എൻഡ് റിസൾറ്റ് ആണ്. ഉദാ: രാഷ്ട്രീയമാണെങ്കിൽ അമേരിക്കൻ പ്രസിഡന്റാവുക, ബ്ലോഗറാണെങ്കിൽ നൂറിനു മേലെ ഫോളോവേഴ്സ് ഉണ്ടാവുക അങ്ങനെയങ്ങനെ.

എന്നാൽ വിജയത്തെ ഒരു അവസാന റിസൾട്ട് ആയി ഒതുക്കാതെ കണ്ടിന്യുവസ് സ്കെയിലിൽ അളക്കാൻ ഉള്ള മാർഗം ആണ് താഴെ വിവരിച്ചിരിക്കുന്നത്.

1. എ.ൽ.കെ ജി ക്ലാസ് മുതൽ ഏതാണ്ട് മുപ്പത് കിലോ ഭാരമുള്ള ബാഗ് കൊണ്ട് പോകാൻ കഴിയുക.
2. ഒന്നാം ക്ലാസ് മുതൽ ക്ലാസിൽ ഒന്നാം റാങ്ക് മാത്രം.
3. യുവജനോത്സവങ്ങളിൽ കലാപ്രതിഭ/തിലകം എന്തെങ്കിലും ആവുക.
4.ഏതെങ്കിലും ഒരു റീയാലിറ്റി ഷോയിൽ പങ്കെടുക്കുക. പെർ‌ഫോർ‌മൻസിന് ശേഷം ഓടി വന്ന് കെട്ടിപ്പിടിക്കുന്ന ജഡ്ജസിനെക്കൊണ്ട് “ഈ മോനെ/മോളെ മക്കളായി കിട്ടിയ അച്ഛനും അമ്മയുമാണ് ലോകത്തിലെ ഏറ്റവും വലിയ ഭാഗ്യവാൻമാർ“ എന്ന് പറയിക്കുക. പറ്റിയാൽ മക്കളു പാട്ടു പാടുമ്പോൾ സ്റ്റേജിൽ അച്ഛനും അമ്മയും കൂടെ ഡാൻസ് കളിക്കുക. (പരിപാടി പ്രക്ഷേപണം ചെയ്യുന്ന ദിവസം ബന്ധുക്കളെയും സുഹൃത്തുക്കളെയും ഫോൺ വിളിച്ച് പറഞ്ഞിരിക്കണം. ടിവിയിലാണ് വരുന്നത്).
5. സ്പോർട്സിലാണ് കമ്പമെങ്കിൽ മിനിമം ഒരു പഞ്ചാബിയുടെ കൈയിൽ നിന്നെങ്കിലും ചെകിട്ടത്തടി വാങ്ങിച്ചിരിക്കണം.
6.പ്ലസ് റ്റൂവിനു സി.ബി.എസ്.സി സ്കൂളിൽ മാത്രം ചേർക്കുക.
7. തൃശ്ശൂര് എണ്ട്രൻസ് കോച്ചിംഗിനു ചേർക്കുക.
8. മെഡിസിനോ എഞ്ചിനീയറിംഗിനോ അഡ്മിഷൻ തരപ്പെടുത്തുക.
9. പിള്ളേര് കോളേജിൽ ഏതെങ്കിലും രാഷ്ട്രീയപ്പാർട്ടിയിൽ പ്രവർത്തിക്കാതെ പ്രത്യേകം ശ്രദ്ധിക്കുക.
10. പ്രേമിക്കുന്നത് ജീവിതവിജയത്തിനെ എപ്രകാരം പ്രതികൂലമായി ബാധിക്കുന്നു എന്ന് കുട്ടികളെ പ്രത്യേകം പറഞ്ഞ് മനസിലാക്കിക്കുക. ക്ലാസിൽ ആൺകുട്ടികളും പെണ്കുട്ടികളും ഒരേ ബെഞ്ചിൽ ഇരുന്നു പഠിക്കുന്നില്ല എന്ന് അദ്ധ്യാപകരോട് ചോദിച്ച് ഉറപ്പു വരുത്തേണ്ടതാണ്.
11. ഇനി എഞ്ചിനീയറിംഗ്/മെഡിസിൻ കിട്ടിയില്ലായെങ്കിൽ സിവിൽ സർവീസ് ഇത്യാദി ശ്രമിക്കാവുന്നതാണ്. എന്നാൽ ബി.എസ്.സി ഫിസിക്സ്, കെമിസ്ട്രി തുടങ്ങിയതൊന്നും യാതൊരു കാരണവശാലും പഠിക്കരുതെന്ന് പ്രത്യേകം പറയേണ്ടതില്ലല്ലോ.
12. കല്യാണം.:- അമേരിക്കയിലോ ലണ്ടനിലോ ഗ്രീൻ‌കാർഡോടു കൂടിയ ഡോക്ടർ/എഞ്ചിനീയർ. കല്യാണത്തിനു പെണ്ണു വരുന്നത് കണ്ടാൽ ഒര് സ്വർണക്കട നടന്ന് വരുന്നത് പോലെ ആവാൻ ശ്രദ്ധിക്കണം. ആൺകുട്ടികളാണെങ്കിൽ സ്ത്രീധനമായി മിനിമം ഒരു ബെൻസ്, പത്തേക്കർ ഭൂമി, വീട്, ഒരു പത്തു ലക്ഷം പോക്കറ്റ് മണി. ഇതിൽ ഒട്ടും കുറയരുത്. ജീവിതവിജയം കൈവിട്ട് പോകും.

13. എല്ലാം കഴിഞ്ഞ് കല്യാണം കഴിഞ്ഞ് പെൺകുട്ടികൾ ഉണ്ടാവാതെ കിട്ടിയാൽ പൂർത്തിയായി. സമ്പൂർണജീവിതവിജയം.

ജീവിതവിജയം അളക്കാനുള്ള ഈ മെട്രിക് ഇനി മുതൽ കാൽ‌വിൻ സ്കെയിൽ എന്നറിയപ്പെടുന്നതായിരിക്കും.

പോട്ടർ മാനിയ

2009-07-19T12:42:00.006-05:00

ഹൊ എന്തൊക്കെ ബഹളങ്ങൾ ആയിരുന്നു. സമാധാനം ആയിട്ട് ഒരു സിനിമ കാണാലോ എന്നു കരുതിയാ തിയേറ്ററിൽ ചെന്നത്. ഹരി പുത്തറും പകുതിച്ചോര രാജകുമാരനും.

എന്റെ പ്രിയപ്പെട്ട സീറ്റ് ആയ പുറകിൽ നിന്നും രണ്ടാമത്തെ റോയിൽ ചെന്നിരിക്കാൻ നോക്കിയപ്പോ ദേണ്ടേ സായിപ്പ് കലിപ്പ്.

“ദിസ് റോ ഈസ് ബുക്ഡ് ബൈ എ ഗ്രൂപ്പ് ഫോർ സ്പെഷൽ വ്യൂയിംഗ് സാർ” [ഡാ ചെക്കാ, കളിക്കാതെ മുന്നിലെങ്ങാൻ ചെന്നിരിക്ക്. ഇവിടെ ഇരിക്കാൻ ഉള്ള പ്രായം ആവുമ്പോ അറിയിക്കാം]

“ഓ. ഐം ആം ദ സോറി” [ നിന്നെ പിന്നെ എടുത്തോളാം ട്ടാ, നീ ഇന്ത്യേലോട്ട് വാ.. രജനീകാന്തിന്റെ അടുത്ത പടത്തിനു നിന്നെ ബ്ലാകിൽ പോലും തിയേറ്ററിൽ കയറ്റൂലാ...തിയേറ്ററിൽ നിന്റെ കണ്ണീരു വീഴുമെടാ കണ്ണീരു വീഴും.]

ഒരു മൂലക്ക് ചെന്നിരുന്നു. ദേ സ്പെഷ്യൽ റോയിൽ ബഹളം... സായിപ്പുമാരും മദാമ്മമാരും, ഹാരി പോട്ടർ കോസ്റ്റ്യൂം അണിഞ്ഞാണ് പടം കാണാൻ വന്നിരിക്കുന്നത്. എന്തൊക്കെ ആടയാഭരണങ്ങളാണ്. വിച്ച് ഓവർകോട്ട്, തൊപ്പി, കുപ്പി, വടി...

ഭാഗ്യം ബ്രൂം സ്റ്റിക് ഇല്ല...[കുറ്റിച്ചൂല് , കുറ്റിച്ചൂലേ]

കൂട്ടത്തിൽ ഇത്തിരി വൃത്തീം മെനേം ഉള്ള ഒരു മിനിസ്കർട്ടുകാരി മുന്നോട്ട് വന്നു. അവള് ആപ്റ്റിറ്റ്യൂഡ് കിസ്സ് തൊടങ്ങി. ശരിയുത്തരം പറേണോർക്ക് മിട്ടാ‍യി സമ്മാനം.

“സ്നെയ്പിന്റെ അച്ഛന്റേം അമ്മേന്റേ പേരെന്ത്?” (എന്തോന്ന്... മിസ്റ്റർ ആൻഡ് മിസ്സിസ് സ്നേയ്പ് എന്നാരിക്കും ഹല്ല പിന്നെ)

ഡംബിൾഡോർ ഫാമിലിൽ എത്ര കുട്ടികളുണ്ട്. [എന്തോന്ന് ഡോറ്? വാതിലൊനൊക്കെ കുട്ടികളാ‍]

“റോൺ ആദ്യമായി ഉപയൊഗിച്ച് സ്പെൽ ഏത്?” [റോൺ ആദ്യമായി പഠിച്ച സ്പെല്ലിംഗിന്റെ കാര്യമാണോ? “തറ” ന്നായിരിക്കും]

“ഹാരിയുടെ ബർത്ഡേ ഏത്? “ [ഹരിയുടെ ബർത്ഡേ ആണേൽ മെയ് പതിമൂന്ന്].

ഏതൊക്കെയോ സായിപ്പുമാരും മദാമ്മമാരും എന്തൊക്കെയോ ആൻസർ പറഞ്ഞു മിട്ടായീം വാങ്ങിപ്പോയി.. അറിയാവുന്ന വല്ല ചോദ്യോം ഉണ്ടാവും മിഠായീം കിട്ടും ന്നു കരുതിയ നമ്മള് അവസാനം ശശി.

ഡീ കൊച്ചേ നീയധികം നെഗളിക്കല്ലേ. നിനക്ക് ലുട്ടാപ്പിയുടെ അമ്മാവന്റെ പേരറിയോ? സൂത്രൻ ആദ്യായിട്ട് ഉപയോഗിച്ച സൂത്രം എന്താന്നറിയോ? രാജാവിന്റെ മകനിലെ മോഹൻലാലിനോട് പണ്ട് രാജുമോൻ ചോദിച്ചത് എന്താന്നറിയോ? ഒക്കെ പോട്ട് അക്കരക്കാഴ്ചയിലെ ഗ്രിഗറി എഴുതിയ ഇൻഷൂറൻസ് പശു എന്ന് കവിതേഡേ ലിറിക്ക് അറിയോ?

അവടെ ഒരു പോട്ടർ മാനിയ... ഓടിക്കോണം...

---
സിനിമ അതിനേക്കാളും ശശി... പോട്ടറിൽ ആകെക്കൂടെ ഇഷ്ടം ള്ളത് സ്നെയ്പിനെ ആരുന്നു.. അങ്ങേരെ പിടിച്ക് വോൾഡമോർട്ടിന്റെ ടീമാക്കി....
റൌളിംഗ് അമ്മച്ചീ മൂർദ്ദാബാ‍ദ്...

അലസം

2009-07-07T21:00:00.000-05:00

വിരസതയുടെ വിറുങ്ങലിപ്പുകൾക്കൊടുവിൽ

ഗുപ്തന്റെ വിരസം എന്ന പോസ്റ്റിനു ഒരു ഫോട്ടോറെസ്പോൺസ്

കിഷോർ കുമാറോ മുഹമ്മദ് റഫിയോ? - ഭാഗം രണ്ട്

2009-06-29T20:20:00.000-05:00

ആദ്യഭാഗം ഇവിടെ

എഴുപതുകളുടെ തുടക്കവും ആരാ‍ധനയും:
1969 ഇൽ ആണ് പിന്നീട് ഹിന്ദിസിനിമയുടെ ചരിത്രത്തിലെ നാഴികല്ലുകളിലൊന്നായി മാറിയാ “ആരാധന” യുടെ നിർമാണപ്രവർത്തനങ്ങൾ ആരംഭിക്കുന്നത്. എസ്.ഡി. ബർമൻ ആയിരുന്നു സംഗീതസംവിധായകൻ.

തന്റെ പ്രിയഗായകനായ റഫിയെക്കൊണ്ടാണ് എസ് ഡി ബർമൻ ആദ്യരണ്ട് ഡ്യുയറ്റ് റിക്കാർഡ് ചെയ്തത് (ഗായിക : ലതാ മങ്കേഷകർ ). ഹിന്ദി സിനിമാ സംഗീതത്തിലെ ഏറ്റവും മനോഹരങ്ങളായ രണ്ട് ഡ്യുയറ്റ് ഗാനങ്ങളായിരുന്നു അവയെന്ന് സമ്മതിക്കാതെ വയ്യ ( ബാഗോൻ മേ ബഹാർ ഹെ, ഗുൻ ഗുനാ രഹേ ഹേ ബവ്‌രേ).
എന്നാൽ ഈ രണ്ട് ഗാനങ്ങൾ റെക്കോർഡ് ചെയ്തു കഴിഞ്ഞപ്പോഴേക്കും എസ്.ഡി.ബർമൻ രോഗശയ്യയിലായി.

പിന്നീട് ആരാധനയുടെ സംഗീതസംവിധാനം ഏറ്റെടുത്തത് മകൻ ആർ.ഡി.ബർമൻ ആണ്. അദ്ദേഹം തന്റെ എക്കാലത്തെയും പ്രിയഗായകനെയാണ് പാട്ടുകൾക്കായി തിരഞ്ഞെടുത്തത് - കിഷോർ കുമാർ.
“രൂപ് തെരാ മസ്താനാ “, “മെരെ സപ്‌നോം കീ റാണീ കബ് “ എന്നീ ഗാനങ്ങൾ ഹിന്ദി സിനിമ അന്നോളം കണ്ടിട്ടുള്ളതിൽ വെച്ച് ഏറ്റവും വലിയ ഹിറ്റ് ഗാനങ്ങൾ ആയി മാറുകയായിരുന്നു. അതോടെ കിഷോർ കുമാറിന്റേയും റഫിയുടെയും കരിയറുകളിൽ വലിയ മാറ്റങ്ങൾ സംഭവിച്ചു. കിഷോറിനെ സംബന്ധിച്ചേടത്തോളം കരിയറിലെ ഒരു വലിയ വഴിത്തിരിവായി ആരാധന മാറിയെങ്കിൽ , റഫിയെന്ന സംഗീതചക്രവർത്തിയുടെ താഴോട്ടുള്ള വീഴ്ചയുടെ തുടക്കം കുറിക്കുകയായിരുന്നു ആരാധന.

“രൂപ് തെരാ മസ്താനാ” എന്ന ഗാനത്തിന് ആ വർഷത്തെ ഫിലിംഫെയർ അവാർഡും ലഭിക്കുകയുണ്ടായി ( ദൌർഭാഗ്യകരമെന്ന് പറയട്ടെ, ഹിന്ദി സിനിമാലോകം അന്നും ഇന്നും നാഷനൽ അവാർഡിനു മുകളിലായാണ് ഫിലിം ഫെയർ അവാർഡിനു നൽകുന്ന സ്ഥാനം).

എഴുപതുകളിലെ സൂപ്പർതാരമായി മാറിയ രാജേഷ് ഖന്നയ്ക്ക് ഏറ്റവും അനുയോജ്യമായ ശബ്ദം എന്ന വിശേഷണവും കിഷോറിനു ആരാധനയോടെ നേടിയെടുക്കാൻ കഴിഞ്ഞു.

സൂപ്പർസ്റ്റാറുകളുടെ ശബ്ദം:
അതത് കാലങ്ങളിലെ സൂപ്പർ താരങ്ങളുടെ ശബ്ദമാവാൻ കഴിയുക എന്നത് മിക്ക ഗായകരുടെയും കരിയറിനെ ഏറ്റവും കൂടുതൽ സ്വാധീനിക്കുന്ന ഘടകമാണെന്ന് വേണം പറയാൻ.

തന്റെ ശബ്ദത്തിനു ഏറ്റവും അനുയോജ്യമായ ശരീരഭാഷ പ്രേം നസീറിന്റേതാണെന്ന് യേശുദാസിനെക്കൊണ്ടും, തൊണ്ണൂറുകളിൽ മോഹൻലാലിന്റെ വ്യക്തിത്വത്തിനു ചേരാത്ത ശബ്ദമാണ് തന്റേതെന്ന ചിലരുടെ മുൻ‌വിധിയാണ് അക്കാലത്ത് തനിക്ക് അവസരങ്ങൾ കുറഞ്ഞുപോവാൻ കാരണം എന്ന് മലയാളം കണ്ട ഏറ്റവും മികച്ച ഗായകരിൽ ഒരാ‍ളായ വേണുഗോപാലിനെക്കൊണ്ടും പറയിപ്പിച്ചതും ഇതേ “സൂപ്പർ സ്റ്റാർ ഫാക്ടർ“ തന്നെയാവണം.

എഴുപതുകളിലെ സൂപ്പർതാരമായിരുന്ന രാജേഷ് ഖന്നയ്ക്ക് ഏറ്റവും അനുയോജ്യമായ ശബ്ദം എന്ന വിശേഷണം കിഷോർ കുമാറിന്റെ കരിയറിനെ കുറച്ചൊന്നുമല്ല സഹായിച്ചത്. (അൻപതുകളിലും അറുപതികളുടെ തുടക്കത്തിലും ദേവാനന്ദിനെ ശബ്ദമായിരുന്ന റഫിക്ക് ആ സ്ഥാനവും അറുപതുകളുടെ പകുതിയോടെ കിഷോർ കുമാറിനായി ഒഴിഞ്ഞു കൊടുക്കേണ്ടി വന്നു).

എഴുപതുകളുടെ അവസാനത്തോടെ രാജേഷ ഖന്നയുടെ “ചോക്ലേറ്റ് ഹീറോ” ഇമേജിൽ നിന്നും ബോളിവുഡ് അമിതാബ് ബച്ചന്റെ “ഗർജിക്കുന്ന യുവത്വ”മെന്ന ഇമേജിലേക്ക് ചുവടുമാറി. അതേ സമയം രാജേഷ് ഖന്നയുടെ ശബ്ദം എന്നതിൽ നിന്നും അമിതാബിന്റെ ശബ്ദം എന്ന സ്ഥാത്തേക്ക് മാ‍റ്റം നേടി കിഷോർ കുമാർ തന്റെ സ്ഥാ‍നം വിട്ടുകൊടുക്കാതിരിക്കുകയും ചെയ്തു (നമക് ഹലാൽ(1982) ലെ “ആജ് രപട് ജായേ തോ“ അമിതാബ് സ്വയം പാടിയതല്ലെന്ന് എങ്ങിനെ വിശ്വസിക്കാൻ സാധിക്കും?).

എഴുപതുകളിലെ കിഷോർ വസന്തം:
ആരാധനയ്ക്ക് ശേഷം അക്ഷരാർത്ഥത്തിൽ കിഷോർ ഹിന്ദിസിനിമാഗാനരംഗ അടക്കിവാഴുകയായിരുന്നു
.
എസ്.ഡി ബർമൻ :
ഫൂലോൻ കീ രംഗ് സേ , ഷോകിയോൻ മേ ഗോലാ ജായേ(പ്രേം പൂജാരി - 1969)
ആജ് മദ്‌ഹോഷ്, ഖിൽതേ ഹേ ഗുൽ , ഓ മെരീ ഷർമീലി ( ഷർമീലീ - 1971)
മീത് നാ മിലാ (അഭിമാൻ-1973)
പ്യാർ കേ ഇസ് ജുഗ്നൂ മേ (ജുഗ്നൂ)

ആർ.ഡി.ബർമൻ :
ഓ മാജി രേ (ഖുഷ്ബൂ - )
യേ ഷാം മസ്താനി, യേ ജോ മൊഹബ്ബത് ഹേ (കടീ പതംഗ് -1971)
കുച് തോ ലോഗ് കഹേംഗേ, ചിംഗാരീ കൊയീ (അമർ പ്രേം - 1972)
രാത് കലീ ഏക് (ബുഡ്ഡാ മിൽ ഗയാ -1971)
മുസാഫിർ ഹൂം യാരോ(പരിചയ് - 1972)
ദിയേ ജൽതേ ഹേ (നമക് ഹരാം -1973)
മേരീ ബീഗീ ബീഗീ സീ (അനാമിക -1973)
സിന്ദഗീ ഏക് സഫർ മേം (ആപ് കീ കസം -1974)
അഗർ തും നാ ഹൊതാ, ഹമേം തുംസേ പ്യാർ കിത്‌നാ(കുദ്‌റത്)
മേരേ നൈനാ സാവൻ ഭാഗോ (മെഹ്ബൂബാ)

മറ്റുള്ളവരുമായി :
ഓം ശാന്തി ഓം, സിന്ദഗീ കാ സഫർ, പൽ പൽ ദിൽ കേ പാസ് , മേരാ ജീവൻ കോരാ കാഗസ്, ഓ സാതീ രേ, ഖൈകേ പാൻ ബനാരസ്, നീലേ നീലേ അംബർ പർ, ഭൂൽ ഗയാ സബ്കുച് , ദിൽ ക്യാ കരേം, ചൂകർ മെരേ മൻ കോ, ചൽതേ ചൽതേ മെരേ യേ ഗീത് അങ്ങനെ അനേകം അനശ്വരഗാനങ്ങൾ!

റഫിയുടെ തിരിച്ചുവരവ്:
ആരാധനയ്ക്ക് ശേഷം പ്രഭ നഷ്ടപ്പെട്ട റഫി 1974 ഇൽ ഉഷാ ഖന്നയുടെ സംഗീതസംവിധാനത്തിൽ ഹവാസ്(1974) ഇൽ ഇരു തിരിച്ചു വരവ് നടത്തിയെങ്കിലും പഴയ പ്രതാപം വീണ്ടെടുക്കാൻ സാധിച്ചില്ല. വീണ്ടും 1977ഇൽ ആണ് റഫി “ക്യാ ഹുവാ തേരാ വാദാ” യിലൂടെ തന്റെ തിരിച്ചു വരവ് നടത്തിയത്. ആ ഗാനത്തിനു ഫിലിം ഫെയർ അവാർഡും ദേശീയ അവാർഡും ഒന്നിച്ചു നേടി ( റഫിയുടെ കരിയറിലെ വീഴ്ചയ്ക്കു കാരണമായ ആർ.ഡി.ബർമൻ , ക്യാ ഹുവാ തേരാ വാദാ” യിലൂടെ തന്റെ പാപം കഴുകിയെന്നു സ്വയം സമാധാനിച്ചിരിക്കാം).

റഫിയുടെ മികച്ച ഗാനങ്ങളുടെ പട്ടികയിൽ താഴേയാവും “ക്യാ ഹുവാ തേരാ” യുടെ സ്ഥാനം എങ്കിലും, പിന്നണിഗായകൻ എന്ന തന്റെ സ്ഥാനം വീണ്ടെടുക്കാൻ റഫിയെ ഈ ഗാനം വളരെയധികം സഹായിച്ചു.

അമർ അക്ബർ ആന്റണി(1977), ആപ്നാപൻ (1978), കുർ‌ബാനീ(1980), ദോസ്താനാ(1980), നസീബ്(1981), അബ്ദുള്ള(1980), ഷാൻ(1980), ആഷാ(1980) , സർഗം(1979) , കർസ് (1980)തുടങ്ങിയ സിനിമകളിൽ റഫി ആലപിച്ച ഗാനങ്ങളെല്ലാം അക്കാലത്തെ മികച്ച ഹിറ്റുകൾ ആയിരുന്നു.

ആസ്പാസ് ലെ “ഷാം ഫിർ ക്യൂൻ ഉദാസ് ഹേ” ആയിരുന്നു റഫിയുടെ ശബ്ദത്തിൽ റെക്കോർഡ് ചെയ്യപ്പെട്ട അവസാനഗാനം. 1980 ജൂലെ മുപ്പത്തി ഒന്നിനു ഹിന്ദി സിനിമയെ അടക്കി വാണ ആ “മാജിക്കൽ വോയ്സ്“ എന്നെന്നേക്കുമായി നിലച്ചു.

1987 ഇൽ ആയിരുന്നു കിഷോർ കുമാറിന്റെ മരണം. അങ്ങിനെ രണ്ട് സംഗീത ഇതിഹാസങ്ങൾ ഹിന്ദി സിനിമയെ വിട്ടു പിരിഞ്ഞു.

ഇതിഹാസ ഗായകർ :
സെമിക്ലാസിക്കൽ ഗാനങ്ങളിൽ റഫിയെ വെല്ലാൻ ആരുമുണ്ടായിരുന്നില്ല എന്നതാണ് സത്യം. ശബ്ദത്തിലെ സ്വതസിദ്ധമായ പുഞ്ചിരിച്ച് കൊണ്ട് പാടുന്ന ഭാവം പ്രസന്നഭാവത്തിലുള്ള പ്രണയഗാനങ്ങളെ മികച്ചതാക്കാൻ റഫിയെയും സഹായിച്ചു. അതേ സമയം അല്പം ദുഃഖഭാവം കലർന്ന പ്രണയഗാനങ്ങളിൽ കിഷോർ മികച്ചു നിന്നു. അത്തരം ഗാനങ്ങളിൽ എന്നും വെല്ലുവിളിയായി മുകേഷും ഉണ്ടായിരുന്നു.

സംഗത്തിലെ “യേ മേരാ പ്രേം പത്ര് പഡ്കർ “ എന്ന അപൂർ‌വസുന്ദര പ്രണയഗാനത്തിനോടൊപ്പം തന്നെ ഹിറ്റ് ചാർട്ടുകളിൽ മുകേഷ് പാടീയ “ദോസ്ത് ദോസ്ത്‌ നാ രഹാ”യും “ ഓ മേഹ്ബൂബാ”യും ഉണ്ടായിരുന്നു.

ലതാ മങ്കേഷ്കറോടൊപ്പം യുഗ്മഗാനങ്ങളിൽ ഏറ്റവും ചേർന്നു നിന്നതും പലപ്പോഴും കിഷോറിന്റെ ശബ്ദമായിരുന്നു എന്ന് വേണം പറയാൻ.

റഫി, ,കിഷോർ, മന്നാഡേ, സൈഗാൾ, മുകേഷ്, തലത് മഹമൂദ് തുടങ്ങിയ ഗായകരുടെ ശബ്ദങ്ങൾ എന്നും സംഗീതപ്രേമികളുടെ കാതുകളിൽ മുഴങ്ങിക്കൊണ്ടേയിരിക്കും. കാലം എത്ര കഴിഞ്ഞാലും.

കിഷോർ കുമാറോ മുഹമ്മദ് റഫിയോ?

2009-06-22T21:15:00.001-05:00

കിഷോർ കുമാറോ മുഹമ്മദ് റഫിയോ മികച്ച ഹിന്ദി സിനിമാ പിന്നണിഗായകൻ? ഞങ്ങൾ കോഴിക്കോട്ടുകാരെ വർഷങ്ങളായി അലട്ടിക്കൊണ്ടിരിക്കുന്ന ഒരു തർക്കവിഷയമാണ് കിഷോർ-റഫി താരതമ്യം.

മികച്ച സംഗീതസംവിധായകൻ ആര് എന്നു ചോദിച്ചാൽ ഒരു പക്ഷേ പണ്ട് ബാബുരാജ്, ഇടക്കാലത്ത് രവീന്ദ്രൻ ഇപ്പോൾ എ.ആർ റഹ്മാൻ എന്ന് ഉത്തരം നൽകാൻ അധികം ആലോചിക്കേണ്ടി വരില്ല. എന്നാൽ ഗായകരുടെ കാര്യത്തിൽ പണ്ടു മുതലേ “കാര്യം വിഷമസ്സിതി”.

റഫി നൈറ്റുകളും കിഷോർ കുമാർ സന്ധ്യകളും പണ്ടു മുതലേ കോഴിക്കോട്ടുകാരുടെ ആവേശമാണ്. മോഹൻലാൽ- മമ്മൂട്ടി ഫാൻസ് തർക്കത്തേക്കാളും വീറും വാശിയും മൂത്ത തർക്കങ്ങളാണ് കിഷോർ-റഫി ഫാൻസ് യുദ്ധങ്ങളിൽ ഉണ്ടാവാറ്.

ഹോസ്റ്റലിൽ താമസിച്ചു പഠിച്ചിരുന്ന കാലഘട്ടത്തിൽ ഒരു കൊച്ചു റേഡിയോ ആയിരുന്നു നേരം പോക്കാൻ പ്രധാനമായും ഒരു ഉപാധി. എല്ലാ ശനിയാഴ്ചകളിലോ മറ്റോ ആണെന്നു തോന്നുന്നു, അക്കാലത്ത് കോഴിക്കോട് ആകാശവാണി നിലയം പ്രക്ഷേപണം ചെയ്യുന്ന രസികൻ പരിപാടികളിൽ ഒരെണ്ണം പ്രശസ്തരായ ചിലർ അര മണിക്കൂർ നേരം അവർക്കിഷ്ടപ്പെട്ട ഗാനങ്ങളെക്കൂറിച്ച് വാതോരാതെ സംസാരിക്കുന്നു അവ കേൾപ്പിക്കുന്നു.

പ്രശസ്തരെല്ലാം നാല്പതു വയസിനു മുകളിൽ പ്രായം ഉള്ളവരായതു കൊണ്ടോ എന്തോ ഒന്നുകിൽ റഫിയുടെ ലോയൽ ഫാൻസ്, അല്ലെങ്കിൽ കിഷോറിന്റെ ലോയൽ ഫാൻസ് ആയിരിക്കും പരിപാടി അവതരിപ്പിക്കാൻ എത്തുന്നവരിൽ ഭൂരിഭാഗവും.

റഫി അൻപതികളിലേയും അറുപതുകളിലേയും ഏകാതിപധി:
നാല്പതുകളിൽ ചാൻസ് അന്വേഷിച്ച് ബോംബെയിൽ എത്തിയ റഫി എന്ന കൊച്ചുപയ്യൻ ആദ്യകാലങ്ങളിൽ ഹിന്ദി മ്യൂസിക് ലെജൻഡ് നൌഷാദിന്റെ ട്രൂപ്പിൽ കോറസ് പാടാൻ ആയിരുന്നു നിയോഗിക്കപ്പെട്ടത്. 1945ഇൽ പുറത്തു വന്ന “ഗാവോൻ കി ഗോരി” എന്ന സിനിമയിലെ “അജീ ദിൽ ഹോ ഖാബോൻ മേ” എന്ന ഗാനമാണ് റഫിയുടെതായി റിക്കോർഡ് ചെയ്യപ്പെട്ട ആദ്യഹിന്ദിഗാനം എന്നു കരുതിപ്പോരുന്നു. നൌഷാദ് , ശ്യാം സുന്ദർ , ഭഗത്‌റാം തുടങ്ങിയ സംഗീതസംവിധായകരുടെ നിരവധി സോളോ ഗാനങ്ങൾ ആയിടെ റഫി പാടുകയുണ്ടായി. ഹിന്ദി പിന്നണിഗാനരംഗത്ത് റഫി തന്റെ വരവറിയിക്കുകയായിരുന്നു.

1952 ഇൽ പുറത്തിറങ്ങിയ “ബൈജു ബാവ്‌രാ” എന്ന സിനിമയിലെ ഗാനങ്ങളാണ് റഫിയുടെ സംഗീതജീവിതത്തിലെ വഴിത്തിരിവായത്. നൌഷാദിന്റെ ഈണത്തിൽ വിരിഞ്ഞ “ഓ ദുനിയാ കേ രഖ്‌വാലേ” എന്ന ഒറ്റ ഗാനത്തോടെ റഫി എല്ലാവരുടെയും പ്രിയങ്കരനായി മാറി. തലത് മഹമൂദ് എന്ന തന്റെ പ്രിയ ഗായകനു പകരമായി നൌഷാദ് റഫിയിലൂടെ ഒരു പുതിയ ശബ്ദം കണ്ടെത്തുകയായിരുന്നു. അതിനു ശേഷം പുറത്തു വന്ന നൌഷാദിന്റേ ഏതാണ്ട് എല്ലാ ഗാനങ്ങളിലും റഫിയുടെ ശബ്ദം ഉണ്ടായിരുന്നു. (മൊത്തം 149 ഗാനങ്ങൾ, അതിൽ 81 സോളോ).

അൻപതുകളും അറുപതുകളും റഫിയുടെ സുവർണകാലഘട്ടം ആയിരുന്നു. എസ്.ഡി. ബർമൻ എന്ന വിഖ്യാതസംഗീതസംവിധായകൻ റഫിയുടെ തലതൊട്ടപ്പന്റെ സ്ഥാനം സ്വയം ഏറ്റെടുത്തു. ബർമനോടൊപ്പം റഫി സഹകരിച്ച “തേരെ ഘർ കേ സാമ്‌നേ”, “പ്യാസാ”, “കാഗസ് കാ ഫൂൽ” “ഗൈഡ്” തുടങ്ങിയ ചിത്രങ്ങളിലെ ഗാനങ്ങൾ അക്കാലത്തേ ഏറ്റവും വലിയ ഹിറ്റുകൾ ആയിരുന്നു. അക്കാലങ്ങളിലെ സൂപ്പർ സ്റ്റാർ ദേവാനന്ദിന് അനുയോജ്യമായ ശബ്ദം എന്ന വിശേഷണം റഫിയുടെ കരിയറിനെ കുറച്ചൊന്നുമല്ല സഹായിച്ചത്.

അക്കാലങ്ങളിൽ തന്റെ അഭിനയത്തിൽ കൂടുതൽ ശ്രദ്ധിച്ചിരുന്ന കിഷോർ കുമാറിനു വേണ്ടി പാടിയിരുന്നതും റഫിയായിരുന്നു എന്നത് രസകരമായ വസ്തുതയാണ്. ഒ.പി. നയ്യാറിന്റെ ഈണങ്ങളിൽ റഫിയും ആഷാ ബോസ്ലേയും ആലപിച്ച “നയാ ദൌർ”, “തുംസാ നഹീ ദേഖാ”, “കഷ്മീർ കീ കലീ” തുടങ്ങിയ ചിത്രങ്ങളിലെ ഗാനങ്ങളിൽ ഭൂരിഭാഗവും ഹിറ്റ് ചാർട്ടിൽ സ്ഥിരമായി ഇടം പിടിച്ചു.
സംഗീതസംവിധായകൻ രവി യുടേതായി പുറത്തിറങ്ങിയ “ബാബുൽ കീ ദുവായേൻ ലേതീ ജാ” (ചിത്രം: നീൽകമൽ”) എന്ന ഗാനത്തിനാണ് റഫിക്ക് ആദ്യമായി ദേശീയ അവാർഡ് ലഭിക്കുന്നത്. (അതിനു മുൻപേ ആദ്യത്തെ ഫിലിം ഫേർ അവാർഡ് ലഭിക്കുന്നതും രവിയുടെ തന്നെ ഗാനത്തിനാണ് - ചൌദ്‌വീൻ കാ ചാന്ദ് ഹോ ).

അറുപതുകളുടെ അവസാനത്തോട് കൂടി റഫിയുടേയും ലതാ മങ്കേഷ്കറുടെയും വ്യക്തി ബന്ധങ്ങൾക്കിടയിലും വിള്ളലുകൾ ഉണ്ടാവാൻ തുടങ്ങി. ഗായകരുടെ റോയൽറ്റി ശതമാനവുമായി ബന്ധപ്പെട്ട അഭിപ്രായവ്യത്യാസങ്ങളിൽ തുടങ്ങിയ തർക്കം ഒടുവിൽ ഗിന്നസ് ബുക് ഓഫ് റെക്കോർഡ്സിലെ ലതാ മങ്കേഷ്കറുടെ ഏറ്റവും കൂടുതൽ ( മുപ്പതിനായിരം) ഗാനങ്ങൾ റെക്കോഡ് ചെയ്ത ഗായിക എന്ന നേട്ടത്തെ ചോദ്യം ചെയ്തു കൊണ്ട് റഫി കത്തെഴുതുന്നതിൽ വരെ ചെന്നെത്തി. താനായിരുന്നു കൂടുതൽ ഗാനങ്ങൾ റെക്കോർഡ് ചെയ്തിട്ടുള്ളത് എന്നായിരുന്നു റഫിയുടെ അവകാശവാദം. ലതയുടെ പേരിനോട് കൂടെ റഫിയുടെ പേരിലും 28000 ത്തോളം ഗാനങ്ങൾ റെക്കോഡ് ചെയ്യപ്പെട്ടിട്ടുണ്ട് എന്ന് ഗിന്നസ് ബുക്ക് എഴിതിച്ചേർത്തു. (നീണ്ടു നിന്ന തർക്കങ്ങൾക്കവസാ‍നം 1991 ഇൽ ഗിന്നസ് ബുക്ക് രണ്ടു പേരുടെയും പേരുകൾ എടുത്ത് വെളിയിൽ കളഞ്ഞു. )

കിഷോർ കുമാർ - നടനിൽ നിന്നും ഗായകനിലേക്ക്:
അബാസ് കുമാർ ഗാംഗുലി അഥവാ കിഷോർ കുമാർ എന്ന ബഹുമുഖപ്രതിഭയും ബോബെയിൽ എത്തിച്ചേരുന്നത് നാല്പതുകളിൽ തന്നെയായിരുന്നു. റഫിയെപ്പോലെ ഒരു കോറസ് ഗായകനായി കരിയർ ആരംഭിച്ച കിഷോർ കുമാർ 1946 ഇൽ പുറത്തിറങ്ങിയ “ശിക്കാരി” എന്ന സിനിമയിൽ നായകന്റെ വേഷവും അണിഞ്ഞു. 49 ഇൽ പുറത്തിറങ്ങിയ “സിദ്ദീ” എന്ന സിനിമയിലെ “മർനേ കീ ദുവായേൻ ക്യൂൻ മാംഗൂ” എന്ന സോളോ ഗാനം ആലപിക്കാനും കിഷോർ കുമാറിനു സാധിച്ചു. അതോട് കൂടി കൂടുതൽ കൂടുതൽ അവസരങ്ങൾ കിഷോറിനെ തേടി എത്തിച്ചേരുകയായിരുന്നു.

ഒരു ഗായകൻ ആയിത്തീരുന്നത് സ്വപനം കണ്ടിരുന്ന കിഷോർ കുമാറിനെ തന്നെപ്പോലെ ഒരു നടൻ ആക്കാൻ ആയിരുന്നു ചേട്ടനായിരുന്ന അശോക് കുമാറിന് ആഗ്രഹം. “നൌൿ‌രീ (1954)”, “മുസാഫിർ(1957)“ തുടങ്ങിയ ചിത്രങ്ങളിൽ നായകന്റേ വേഷം ചെയ്തത് കിഷോർ കുമാർ ആയിരുന്നു.

കിഷോർ സംഗീതം ശാസ്ത്രീയമായി അഭ്യസിച്ചിട്ടില്ലെന്നറിഞ്ഞ സലീൽ ചൌധരി അദ്ദേഹത്തെക്കൊണ്ട് നൌൿ‌രീ യിലെ ഗാനം പാടിക്കുവാൻ ആദ്യം വിസമ്മതം പ്രകടിപ്പിച്ചു. എങ്കിലും പിന്നീട് കിഷോറിന്റെ ആലാപനശൈലി കേട്ട ശേഷം അദ്ദേഹം “ചോട്ടാ സാ സാഗർ ഹോഗാ” എന്ന ഗാനം കിഷോറിനു നൽകി.

തുടക്കത്തിലെ തിരിച്ചടികൾക്കു ശേഷം “അഭിനേതാവ്“ എന്ന രീതിയിൽ കിഷോർ പ്രശസ്തിയിലേക്കുയർന്നു. “ന്യൂ ഡൽഹി”, “ആഷാ”, “ചൽതീ കാ നാം ഗാഡീ” , “ജും‌രൂ”, “ഹാഫ് ടിക്കറ്റ്”, “പഡോസൻ” തുടങ്ങിയ സിനിമകളിലെ കോമഡി ഹീറോ ഇമേജ് കിഷോറിനെ സംബന്ധിച്ചേടത്തോളം വൻ വിജയങ്ങൾ ആയിരുന്നു.

ഇതിനിടയിലും തന്റെ ഗായകമോഹം കിഷോർ പൂർണമായും ഉപേക്ഷിച്ചിരുന്നില്ല. എസ്.ഡി.ബർമൻ ആണ് കിഷോറിലെ പ്രതിഭയെ ആ‍ദ്യാമായി തിരിച്ചറിഞ്ഞ സംഗീതസംവിധായകൻ. അതു വരെ ആലാപനത്തിൽ സൈഗാളിനെ അനുകരിച്ചിരുന്ന കിഷോർ കുമാറിനോട് സ്വന്തമായി ഒരു ശൈലി വളർത്തിയെടുക്കാൻ ആദ്യമായി ഉപദേശിച്ചതും ബർമൻ തന്നെയായിരുന്നു. അതിൻപ്രകാരം “യോഡ്‌ലിംഗ് “ എന്ന രീതി കിഷോർ കൂമാർ തന്റെ സ്വന്തം രീതിയായി വളർത്തി വികസിപ്പിച്ചെടുക്കുകയായിരുന്നു (യോഡ്‌ലിംഗ് ആദ്യമായി ഹിന്ദിഗാനങ്ങളിൽ അവതരിപ്പിച്ചത് റഫിയായിരുന്നു. പക്ഷേ കിഷോറിനോളം അതിൽ വിജയം കണ്ടെത്താൻ അദ്ദേഹത്തിനായില്ല.)..

യോഡ്‌ലിംഗ് ശൈലിയിൽ പുറത്തിറങ്ങിയ ഒട്ടേറെ ഹിറ്റ് ഗാനങ്ങൾ കിഷോറിന്റേതായി ഉണ്ട്. “സിന്ദഗീ ഏക് സഫർ ഹേ സുഹാനാ“ ( അന്ദാസ് - 1971) അവയിൽ പ്രശസ്തമായ ഒന്നാണ്.

ഗായകൻ എന്ന രീതിയിൽ വിജയം കൊയ്യുമ്പോഴും അക്കാലങ്ങളിൽ റഫിയുടെ നിഴലായി ഒതുങ്ങാൻ തന്നെയായിരുന്നു കിഷോറിന്റെ വിധി.

(തുടരും)

മീൻപിടിത്തം

2009-06-08T19:52:00.007-05:00

സീൻ ഒന്ന് :-
ഓസ്ട്രേലിയ.

നീണ്ട ചകിരി പോലുള്ള മുടിയും ചുണ്ടിൽ പാണ്ടു പോലെ സൺസ്ക്രീമും ഉള്ള ഒരു തടിയൻ കിടന്നുറങ്ങുന്നു.
അടുത്ത് ലേറ്റസ്റ്റ് ഐ-ഫോൺ.

കട് റ്റു
സീൻ രണ്ട്:-
ബിലാത്തി...

തേംസ് നദിക്കു മുകളിലൂടെ പാൻ ചെയ്യുന്ന ക്യാമറ.... ഒരു അപാർട്മെന്റിന്റെ ജനൽ... മേശമേൽ മുഖം വെച്ച് കിടങ്ങുന്ന കൊച്ചുത്രേസ്യ... ക്യാമറ വീണ്ടും ചലിക്കുന്നു... ശബ്ദബഹളങ്ങളാൽ നിറഞ്ഞ ഒരു സ്റ്റേഡിയത്തിനകത്തേക്ക്....

ക്രീസിൽ രണ്ട് കടും നീല ജഴ്സികൾ കാണാം... ബൌണ്ടറിലൈനിൽ നിന്നും ഒരു മഞ്ഞജഴ്സിക്കാരൻ പോക്കറ്റിൽ നിന്നും ആരും കാണാതെ ലേറ്റസ്റ്റ് മൊബൈൽ എടുക്കുന്നു...

നമ്പർ കുത്തുന്നു... ടിം ടും ടും ടിം ടിം ടും ടൂം ടൂം...

കട് റ്റു
സീൻ മൂന്ന് :-
സീൻ ഒന്നിൽ കണ്ട തടിയന്റെ മൊബൈൽ ശബ്ദിക്കുന്നു.

“ചുരാ ലിയാ ഹേ തുംനേ ജോ ദിൽകോ”

തടിയൻ ഉറക്കച്ചടവോടെ ഫോൺ എടുത്ത്...

“ഹല സൈമണ്ടൻ ഹിയർ...”

“അളിയാ... ഇത് ഞാ‍നാണ്ണാ ജെറ്റ്ലീ...”

“ഏ അണ്ണനാ... അണ്ണാ അപ്പോ മാച്ച് തീർന്നാ....”

“ഇല്ലഡേയ് ഇനീം അഞ്ച് പത്ത് ഓവറൂടെ ഒണ്ട്... കലിപ്പ് തന്നെ”

“അപ്പോ പിന്നെ ഈ നേരത്ത്...”

“ഡേയ് ഒരു പ്രധാനകാര്യം പറയാനാണ് വിളിച്ചത് “

“തള്ളണ്ണാ...”

“ഡേയ് നീ ഇനി മീൻ പിടിക്കാൻ എന്നാണ് പോണത്”

“മറ്റെന്നാൾ”

“തള്ളേ ഒരു മൂന്നു ടിക്കറ്റൂടെ വേണ്ടി വരും കെട്ടാ...”

“വോ ആരൊക്കെ അണ്ണാ...”

“വൊന്ന് ഞാൻ തന്നെ... പിന്നെ മൈക്കൽ പ്യൂണ്..

“ഏഹ് അപ്പോ നിങ്ങളിങ്ങ് പോരുവാണോ”

“തന്നേഡേ... ആ പയല് സംഗക്കാര ദോണ്ടെ എടുത്തിട്ട് കറ്റ മെതിക്കണ പോലല്ലേ ഓരോന്നിനെ എടുത്തിട്ട് പൊതുക്കുന്നത്... നമ്മടെ പിള്ളേർടെ ബൌളിംഗ് ഫിഗറ് കണ്ടാൽ നടനവിദ്വാൻ ഗോപുമോൻ വരെ ചമ്മിപ്പോവും ”

“വോ... സന്തോയമായണ്ണാ... അല്ലണ്ണാ അപ്പോ ആരാ ചൂണ്ടയിടാൻ വരണ മറ്റേയാൾ?”

“അത്.. അത്... മിക്കി റോണ്ടിംഗ്...”

“തള്ളേ മാണിക്യണ്ണനും ഒണ്ടാ... ഇത്തവണ നമ്മൾ കൊമ്പൻ സ്രാവിനെ തന്നെ പിടിക്കുമണ്ണാ...”

“വോ തന്നെ... പക്ഷേ ആരോടും ഇപ്പം പറേണ്ട... പത്രസമ്മേളനം ഒന്ന് കഴിഞ്ഞോട്ട്....”

“ഇതിലും കൂടെ തൊപ്പിയിട്ടാൽ പിന്നെ എന്തിരണ്ണാ പത്രക്കാരോട് പറയാൻ?”

“ട്വെന്റി - ട്വെന്റി ഒന്നും ക്രിക്കറ്റല്ലാ, ടെസ്റ്റാണ് ക്രിക്കറ്റ്.. ഇത് മൂന്നാം ലോകരാജ്യങ്ങളുടെ കളിയാണെന്ന് പിന്നെ നിങ്ങടമ്മാവൻ വന്നു പറയുമോ”

“ഓ അത് കത്തീലണ്ണാ.. പഷേങ്കിലു നമ്മള് ടെസ്റ്റിലും തോറ്റില്ലണ്ണാ?

“അത് മഹീന്ദ്രാ തോണിക്ക് ക്യാപ്റ്റൻസി സ്പിരിറ്റ് ഇല്ലാത്തോണ്ടാണെന്ന് മാണിക്യണ്ണൻ അന്നേ പറഞ്ഞല്ല് “

“അപ്പോ വൺ ഡേയിൽ ഒന്നാം സ്ഥാനം പോയതോ”

“ദേ നീ ഒരു മാതിരി അനിൽ ഗുവാസ്കരൻ സംസാരിക്കുമ്പോലെ സംസാരിക്കല്ല്... അതൊക്കെ നമ്മടെ സ്ട്രാറ്റജിയല്ലേ...”

“വോ നിങ്ങളണ്ണന്മാരുടെ ഒരു കാര്യം... എന്നാ വേഗം ഇങ്ങ് പോരീനണ്ണാ.. ഞാൻ ചൂണ്ട റെഡിയാക്കട്ട്...”

സൈമണ്ടൻ വലിച്ചെറിഞ്ഞ ഐ-ഫോൺ ജനലിലൂടെ കായലിൽ ചെന്നു വീണു.

ബ്ലും......

വരിമുറിപ്പാട്ടുകൾ

2009-05-27T20:20:00.003-05:00

“ജീവിതം സങ്കീർണമാവുന്നതിനൊപ്പം കവിതയും അത് ആവിഷ്കരിക്കുന്ന രീതികളും സങ്കീര്‍ണ്ണമാവും“

-വെള്ളെഴുത്ത്.

കവിതയ്ക്ക് പരിണാമം സംഭവിച്ചപ്പോഴും മാറ്റങ്ങളില്ലാത്തതായി നിലകൊള്ളുന്ന ഒന്നുണ്ട് - മലയാളിയുടെ സിനിമഗാനങ്ങൾ.

ആദ്യകാലസിനിമാഗാനങ്ങളിൽ മിക്കവയും കവിതയുടെ സ്വഭാവം അതേ പടി കാത്തു സൂക്ഷിക്കുന്നവയായിരുന്നു. ഗാനങ്ങളിൽ ഏറെയും മികച്ചതായിരുന്നുവെങ്കിലും പലപ്പോഴും കഥയ്ക്കോ കഥാപാത്രത്തിനോ സന്ദർഭത്തിനോ വഴങ്ങാത്ത വിധം അവ സിനിമകളിൽ മുഴച്ചു നിന്നു. നിലവാരമില്ലാത്ത കച്ചവടസിനിമകളിലെ ഗാനങ്ങൾ മാത്രം മലയാളിക്ക് അഭിമാനകരമായിത്തീർന്നു.

ഒരു വശത്ത് സാഹിത്യത്തിനും മറ്റു കലാരൂപങ്ങൾക്കും പരിണാമം സംഭവിച്ചു കൊണ്ടിരുന്നു. മാറ്റങ്ങൾ മലയാളസിനിമയിലും പ്രകടമായിരുന്നു. മലയാളസിനിമയിൽ ഗൌരവമായി സമീപിച്ച സം‌വിധായകരിൽ മിക്ക പേരും സംഗീതത്തെ കണ്ടില്ലെന്നു നടിച്ചു. സിനിമകളിൽ സംഗീതത്തെ ഉൾക്കൊള്ളാൻ സന്മനസ്സ് കാണിച്ച പദ്മരാജനെപ്പോലെയുള്ളവരാകട്ടെ സിനിമയിലെ മാറ്റങ്ങൾ ഗാനങ്ങളിൽ കൂടെ പ്രതിഫലിപ്പിക്കാൻ മനഃപ്പൂർവമോ അല്ലാതെയോ ശ്രമിച്ചുമില്ല.

അന്യഭാഷാചിത്രങ്ങളിലേയും സ്ഥിതി വ്യത്യസ്ഥമായിരുന്നില്ല. ഇളയരാജയുടേയും സലീൽ ചൌധരിയുടേയും ഈണങ്ങൾക്ക് യോജിച്ചത് പഴയ വൃത്തമൊപ്പിച്ചുള്ള കവിതയുടെ സാന്നിദ്ധ്യമാണെന്ന് അവരും തിരിച്ചറിഞ്ഞു.

ഈണങ്ങൾ പോലെ വരികളിലും ആധുനികതയുമായി ആദ്യമെത്തിയത് ഒരു പക്ഷേ റഹ്മാൻ തന്നെ ആവണം.

ആയുധ എഴുത്തിലെ ഇൻപയെന്ന നിരക്ഷരനായ ഗുണ്ടയുടെ ജീവിതത്തിനു പശ്ചാത്തലമായി നൽകിയ “ഡോൽഡോൽന” എന്ന ഗാനത്തിനു നിയതമായ വരികൾ ഇല്ലെന്നത് യാദൃശ്ചികമാവാൻ സാധ്യതയില്ല. അതേ ചിത്രത്തിലെ ജനഗണമന (ഹിന്ദിയിൽ - ധകലകബുക) എന്ന ഗാനവും , വരികളിലെ “സാധാരണത്വം” ഇല്ലായ്മയിലൂടെ ശ്രദ്ധിക്കപ്പെടുന്നതാണ്. എങ്കിലും ഭൂരിഭാഗം അവസരങ്ങളിലും ഗാനങ്ങൾക്ക് പഴയ ചട്ടക്കൂടുകൾക്കുള്ളിൽ നിന്നും പുറത്തു വരാൻ സാധിച്ചില്ല.

ഒന്നുകിൽ പഴയ അതേ ഫോർമാറ്റ് അല്ലെങ്കിൽ വെറും തട്ടുപൊളിപ്പൻ എന്ന രീതിയിലേക്ക് ഒതുങ്ങാൻ തന്നെയായിരുന്നു ഗാനങ്ങളുടെ വിധി. മറ്റു കലാരൂപങ്ങളിൽ ഇവോൾവ് ആയിക്കൊണ്ടിരുന്ന അബ്സ്ട്രാക്റ്റ് സങ്കേതങ്ങൾ എന്തു കൊണ്ടോ ഗാനരചനയിൽ മാത്രം പ്രതിഫലിച്ചില്ല.

തമിഴന്റെ കച്ചവടസിനിമകളിൽ ചില സ്ഫുരണങ്ങൾ ദൃശ്യമായിരുന്നു.

“ജൂലൈ പിറക്കും ജൂലൈ പിറക്കും
ജൂനിയറ്ക്കും സീനിയറ്ക്കും
കല്ലൂരി വാസം വന്താൽ റാഗിംഗ് നടക്കും”

എന്നു പാടാൻ തമിഴൻ ധൈര്യം കാണിച്ചെങ്കിലും വെറും ജനപ്രിയ മസാലകളിലേക്ക് ഒതുങ്ങിപ്പോവാൻ ആയിരുന്നു അവയുടേയും വിധി.
തമിഴനെ അനുകരിച്ച് കേരളത്തിൽ മുഴങ്ങിയ എസ്കോട്ടെല്ലോ ബിപി.എല്ലോ തുടങ്ങിയ ഗാനങ്ങൾ ആവട്ടെ എങ്ങുമെത്താതെ തകർന്ന് തരിപ്പണം ആവുകയാണുണ്ടായത്.

ജാസിഗിഫ്റ്റും ലജ്ജാവതിയും ഫോർ ദ പീപ്പിളും ഈണത്തിലും ആലാപനശൈലിയിലും ശബ്ദത്തിലും മാറി ചിന്തിക്കാൻ തയ്യാറായപ്പോഴും വരികളിൽ പഴയ വിട്ടു മാറാതെ കൂടിച്ചേന്നു തന്നെയിരുന്നു.

ഈണത്തിൽ പുതുമ കൊണ്ടുവരാൻ ധൈര്യം കാണിച്ച മനസുകൾക്ക് പക്ഷേ വരികളിൽ “മണിമാടം കെട്ടിയ കുട്ടിക്കാലവും, കുന്നോളം മാമ്പഴം അണ്ണാരക്കണ്ണനുമായി പങ്കുവെച്ച കഥകളും “ അനിവാര്യമായി തോന്നിയത് അസ്വാഭാവികമായി വിലയിരുത്തപ്പെട്ടില്ലെന്നതും മറ്റൊരൽഭുതം.

ഇതിനിടെ ബോളിവുഡിൽ വീണ്ടും റഹ്മാൻ “അപ്നീ തോ പാഠ്ശാലയുമായി“ എത്തി

"चेहरे की किताबें हे
हम वो पड़ने आते हे
ये सूरत तेरी मरी
mobile library
यारों की equation हे
row multiplication हे
जिसने भी कुल जीता हे
वो alpha हे theta हे"

വരികളിൽ ഒരു വ്യത്യസ്തത ബോളിവുഡ് ആദ്യമായി അറിയുകയായിരുന്നു. എങ്കിലും എന്തോ ഒരു അപൂർണത എവിടെയോ ബാക്കി കിടന്നു.

സംഗീതം വിഷയമായി 2008 ഇൽ പുറത്തിറങ്ങിയ ചിത്രമായിരുന്നു റോക് ഓൺ (Rock on).
ഫർഹാൻ അക്തർ നായക കഥാപാത്രത്തെ അവതരിപ്പിച്ച ചിത്രത്തിലെ സംഗീതം ശങ്കർ-എഹസാൻ-ലോയ് കൂട്ടുകെട്ടിന്റേതാണ്. വരികൾ എഴുതിയതാവട്ടെ ജാവേദ് അക്തറും.

(ബോളിവുഡിലെ ഏറ്റവും പ്രശസ്തമായ കുടുംബം ഒരു പക്ഷേ ബച്ചൻ കുടുംബം ആയിരിക്കും. അല്ലെങ്കിൽ കപൂർ കുടുംബം. പക്ഷേ ബോളിവുഡിലെ ഏറ്റവും പ്രതിഭാധനരായ കുടുംബം ഏതെന്ന് ചോദ്യത്തിനുത്തരം ജാവേദ് അക്തറിന്റെ കുടുംബം എന്നു തന്നെയാവണം.)

റോക്ക് ഓൺ ഇലെ “പിച്‌ലേ സാത് ദിനോം മേ“ എന്ന ഗാനത്തിന്റെ വ്യത്യസ്തമായ വരികൾ താഴെ.

मेरी laundry का एक bill
इक आधी पढ़ी novel
एक लड़की का phone number
मेरे काम का एक paper
मेरे , ताश से heart का king
मेरा , इक चांदी का ring
पिछले सात दिनों में मैंने खोया
कभी खुद पे हंसा मैं ,
और
कभी खुद पे रोया

present मिली एक गाडी
प्यारी थी मुझे बड़ी
mary jane का एक packet
मेरी denim की jacket
दो one-day match के passes
मेरे नए नए sunglasses
पिछले सात दिनों में मैंने खोया
कभी खुद पे हंसा मैं ,
और
कभी खुद पे रोया

कैसे , भूलूं , सातवा जो दिन आया
किसी ने , तुमसे , इक party में मिलवाया
कैसा , पल था , जिस पल मैंने तुमको पहली बार देखा था
हम जो मिले पहली बार
मैंने जाना क्या है प्यार
मैंने होश भी खोया दिल भी खोया
कभी खुद पे हंसा मैं ,
और
कभी खुद पे रोया
मैंने पिछले सात दिनों में
ये सब है , खोया ..

റോക് ഓൺ വെറുമൊരു തുടക്കം മാത്രമാണ്. വരാനിരിക്കുന്ന ഒരു വലിയ പരിണാമത്തിന്റെ വെറും ഒരു സൂചന. മാറ്റങ്ങൾ ഇനിയും വരാൻ ഇരിക്കുന്നതേയുള്ളൂ.

വരികളിൽ നഷ്ടപ്പെട്ട ആഖ്യാതത്തെയും യുവത്വത്തിന്റേയ്യും പുതുമയുടേയും ചടുലമാ‍യ താളങ്ങളെയും കുറിച്ചോർത്ത് നമുക്ക് വിഷമിച്ചിരിക്കാം... മാറ്റങ്ങളില്ലാതെ, പഴമയുടെ വക്താക്കളായി...
-----------------------------------------------
അപ്‌ഡേറ്റ് ഒന്ന് :-
കൂടുതൽ വായനക്ക്
1. അനോണി ആന്റണി.
2. ഡിങ്കൻ

കാറ്റത്ത്‌ തേങ്ങാക്കുലകള്‍ ആടുന്നതെപ്പോള്‍?

2009-05-06T20:05:00.004-05:00

ചോദ്യം :- കാറ്റത്ത്‌ തേങ്ങാക്കുലകള്‍ ആടുന്നതെപ്പോള്‍?

ഉത്തരം : - കര്‍ക്കടകമാസത്തില്‍

കാരണം:-
തുലാഭാരം എന്ന സിനിമയിലെ ഓമനത്തിങ്കളിലോണം പിറക്കുമ്പോള്‍ എന്ന ഗാനത്തിന്റെ വരികള്‍

വൃശ്ചിക മാസത്തില്‍ മാനത്തെ കുഞ്ഞിനു
വെള്ളോട്ട് പാത്രത്തില്‍ പാല്‍കഞ്ഞി
കണ്ണീരുപ്പിട്ടു കാണാത്ത വറ്റിട്ട് കര്‍ക്കടകത്തില്‍ കരിക്കാടി (കരിക്ക് ആടി)

ഞാനീ ഡിസ്ട്രിക്റ്റ് വിട്ടിരിക്കുന്നു

മൂവീ നോട്സ് - ഒന്ന്

2009-05-04T20:00:00.004-05:00

റിവ്യൂ എന്ന് വിളിക്കാന്‍ കഴിയില്ല...
കണ്ടു പോകുന്ന സിനിമകളില്‍ നല്ലതെന്നു തോന്നുന്നവയെക്കുറിച്ചുള്ള ചെറുവിവരണങ്ങള്‍ ഇവിടെ ചേര്‍ക്കുന്നു. ആര്‍ക്കെങ്കിലും ഉപകാരപ്രദമാവുകയാണെങ്കില്‍ എന്നു കരുതി....

സെന്‍ട്രല്‍ സ്റ്റേഷന്‍:

മോട്ടോര്‍ സൈക്കിള്‍ ഡയറീസ് എന്ന വിഖ്യാത സിനിമയുടെ സം‌ധായകന്‍ വാള്‍ട്ടര്‍ സലേസിന്റെ 1998 ഇല്‍ പുറത്തു വന്ന ചിത്രം. ആ വര്‍ഷത്തെ ഗോള്‍ഡന്‍ ഗ്ലോബ് പുരസ്കാരത്തിനര്‍ഹമായി..

ഭാഷ : പോര്‍ച്ചുഗീസ്
കഥ നടക്കുന്നത് : ബ്രസീല്‍
സം‌വിധാനം : വാള്‍ട്ടര്‍ സലേസ്
ഒറിജിനല്‍ ടൈറ്റില്‍ : Central do Brasil

പ്ലോട്ട് :
ദോറ റിയോ ഡീ ജനീറോയിലെ സെന്‍‌ട്രല്‍ സ്റ്റേഷനില്‍ ജോലി ചെയ്യുന്നു. നിരക്ഷരായവര്‍ക്കു വേണ്ടി കത്തെഴുതലാണ് ഒരു റിട്ടയേര്‍ഡ് ടീച്ചറും അവിവാഹിതയുമായ ദോറയുടേ തൊഴില്‍. ജീവിതത്തിലെ ദുരന്തങ്ങളില്‍ നിന്നും കഠിനഹൃദയായി തീര്‍ന്നിരിക്കുന്ന ദോറയ്ക്ക് സഹജീവികളോട് അല്പം പോലും സ്നേഹമില്ല. കത്തെഴുതാന്‍ അവള്‍ പണം ഈടാക്കുന്നുണ്ടെങ്കിലും കത്തുകള്‍ പോസ്റ്റ് ചെയ്യാതെ കീറിക്കളയുകയാണ് പതിവ്.

ജെസ്യൂ എന്ന ഒന്‍പതു വയസുകാരനുമായി ദോറയുടെ അരികിലെത്തുന്ന ഒരു സ്ത്രീ അവളുടെ ഭര്‍ത്താവിന് ദോറ മുഖാന്തരം കത്തുകളെഴുതുന്നു. ദോറയാകട്ടെ ആ കത്തുകളും പോസ്റ്റ് ചെയ്യാറില്ല. ഒരു ദിവസം ഒരു റോഡ് അപകടത്തില്‍ ജെസ്യൂ വിന്റെ അമ്മ കൊല്ലപ്പെടുന്നു.

ജെസ്യൂവിന്റെ സം‌രക്ഷണം ദോറ ഏറ്റെടുക്കുന്നു. അവനെ വിറ്റുകാശാക്കുകയാണ് ദോറയുടെ ലക്ഷ്യം. എന്നാല്‍ ആകസ്മികമായ ചില സംഭവങ്ങള്‍ അവരുടെ ജീവിതത്തില്‍ ഉണ്ടാവുന്നു. ജെസ്യൂവിന്റെ പിതാവിനെ കണ്ടെത്തി അവനെ ഏല്പിക്കാനായി ദോറയും ജെസ്യൂവും യാത്ര തിരിക്കുകയാണ്.

ഈ യാത്ര ഇരുവരുടെ ജീവിതത്തേയും മാറ്റിമറിക്കുന്നു. ജെസ്യൂവിന്റേയും ദോറയുടേയും മാനസിക സംഘര്‍ഷങ്ങളിലൂടെ സിനിമ മുന്നോട്ട് നീങ്ങുന്നു.

വാള്‍ട്ടര്‍ സലേസിന്റെ സം‌വിധാനമികവിന്റെ മികച്ച ഉദാഹരണമാണ് ഈ സിനിമ. ഓരോ ഷോട്ടും തികഞ്ഞ കൈയടക്കത്തൊടെയാണ് സലേസ് തിരഞ്ഞെടുത്തിരിക്കുന്നത്. കഥയുടെ മുറുക്കത്തിനനുസരിച്ചും കഥാപാത്രങ്ങളുടെ സംഘര്‍ഷങ്ങള്‍ പ്രേക്ഷകരിലേക്കെത്തിക്കുന്ന രീതിയിലും ഷോട്ടുകളും സീക്വന്‍സുകളും സം‌വിധായകന്‍ ഒരുക്കിയിരിക്കുന്നു.

എടുത്തു പറയേണ്ട രംഗങ്ങള്‍ :-

സെന്‍‌ട്രല്‍ സ്റ്റേഷനില്‍ ട്രെയിന്‍ എത്തുന്ന സമയത്ത് തിരക്കു വര്‍ധിക്കുന്നതും തിരക്കിനിടയിലൂടെ ദോറ ട്രെയിനില്‍ കയറിപ്പറ്റുന്നതും ചിത്രീകരിച്ചിരിക്കുന്നത്.

ദോറയോട് പിണങ്ങി മെഴ്കുതിരികളുമായി പ്രാര്‍ഥനാനിരതരായ ആള്‍ക്കൂട്ടത്തിനിടയിലേക്ക് ഓടിമറയുന്ന ജെസ്യൂവിനെ ദോറ പിന്തുടരുന്ന രംഗം.

IMDB Link ഇവിടെ

ട്രെയിലര്‍ താഴെ കാണാം:

കളര്‍ ഓഫ് പാരഡൈസ്‌ :

സം‌വിധാനം : മജീദ് മജീദി
ഭാഷ : പേര്‍ഷ്യന്‍
ഒറിജിനല്‍ ടൈറ്റില്‍ : Rang-e khoda

വിശദീകരണങ്ങള്‍ ആവശ്യമില്ലാത്ത സം‌വിധായകനും സിനിമയും. ടെഹ്റാന്‍ ഇന്‍സ്റ്റിറ്റ്യൂട്ടിലെ അന്ധവിദ്യാര്‍ത്ഥിയായ മൊഹമ്മദ് വേനലവധിക്കായി വീട്ടിലെത്തുന്നതോടെയാണ് കഥ തുടങ്ങുന്നത്. അമ്മ നേരത്തെ മരിച്ച മൊഹമ്മദിനു രണ്ട് സഹോദരിമാരും അച്ഛനും മുത്തശ്ശിയും ആണുള്ളത്. ഒരു രണ്ടാ വിവാഹത്തിനായി ഒരുങ്ങുന്ന മൊഹമ്മദിന്റെ അച്ഛന് മൊഹമ്മദ് ഒരു ഭാരമാണ്. ആ ഭാരം തന്റേ ജീവിതത്തില്‍ നിന്നും ഒഴിവാക്കാന്‍ അയാള്‍ ശ്രമിക്കുന്നതോടു കൂടി മൊഹമ്മദിന്റെ ജീവിതവും മാറിമറയുന്നു.

മനോഹരമായ തിരക്കഥ. അതിലേറേ മനോഹരമായ സം‌വിധാനം. മനോഹരമായ ഷോട്ടുകള്‍.

എടുത്തു പറയേണ്ട രംഗം :
ആശാരിപ്പണി പഠിക്കാന്‍ എന്ന വ്യാജേന മൊഹമ്മദിനെ ഒരു അന്ധനായ കാര്‍പെന്ററുടെ അരികില്‍ മൊഹമ്മദിന്റെ അച്ഛന്‍ ഏല്പ്പിക്കുന്നു. അവിടെ വെച്ച് മൊഹമ്മദ് കാര്‍പന്ററോട്:
“Our teacher says that God loves the blind more because they can’t see.
But I told him if it was so, He would not make us blind so that we can’t see Him.”

കാര്‍പന്റര്‍ : “God is not visible. He is everywhere. You can feel Him. You see Him through your fingertips.”

മൊഹമ്മദ് : “Now I reach out everywhere for God till the day my hands touch Him and tell Him everything, even all the secrets in my heart.”

ട്രെയിലര്‍ താഴെ കാണാം:

IMDB link ഇവിടെ

ഐ സ്റ്റില്‍ നോ വാട്ട് യൂ ഡിഡ് ഇന്‍ ലാസ്റ്റ് സമ്മര്‍:

ഐ നോ വാട്ട് യൂ ഡിഡ് ഇന്‍ ലാസ്റ്റ് സമ്മര്‍ എന്ന സിനിമയുടെ രണ്ടാം ഭാഗം. മികച്ച ത്രില്ലര്‍. ആദ്യഭാഗത്തോളം പ്രേക്ഷകരെ ത്രസിപ്പിക്കുന്നിലെങ്കിലും നല്ല ഒരു ത്രില്ലര്‍ തന്നെ.

സൈക്കോ:

ഒരു ആല്‍ഫ്രഡ് ഹിച്ച്കോക്ക് സൈക്കോളജിക്കല്‍ ക്രൈം ത്രില്ലര്‍. 1960 ഇല്‍ പുറത്തിറങ്ങിയ സിനിമ ഇന്നും പ്രേക്ഷകരെ ത്രസിപ്പിക്കും എന്നുറപ്പ്. ഹിച്ച്കോക്കിന്റെ സം‌വിധാനമികവിനാല്‍ ഭദ്രമായ തിരക്കഥ.

കൂടുതല്‍ വിവരങ്ങള്‍ വിക്കിയില്‍

ട്രെയിലര്‍ താഴെ കാണാം:

ഡേവിഡ്‌ ആറ്റന്‍ബറോ - വൈല്‍ഡ്‌ ലൈഫ്‌ സ്പെഷ്യല്‍:

BBC one ഇല്‍ പ്രക്ഷേപണം ചെയ്ത ഡൊക്യുമെന്ററി. മികച്ച ഫോട്ടൊഗ്രഫിയും ഡേവിഡ് ആറ്റന്‍ബറോയുടെ വിവരണവും കൊണ്ട് ശ്രദ്ധേയം. ഏറ്റവും മികച്ച മൂന്ന് എപ്പിസോഡുകള്‍ താഴെ.

ലെപാര്‍ഡ് - ഏജെന്റ് ഓഫ് ഡെവിള്‍
ഇന്‍ഫ്രാറെഡ് കാമറ ഉപയോഗിച്ച് അതു വരെ അജ്ഞാതമായിരുന്ന പുള്ളിപ്പുലിയുടെ ജീവിതം മറ നീക്കുന്നു.

ഈഗിള്‍ - മാസ്റ്റ്ര്‍ ഓഫ് ദ സ്കൈസ്
ഉജ്ജ്വലമായ ഏരിയല്‍ ഫോട്ടൊഗ്രാഫിയുടെ മകുടോദാഹരണം. പതിനഞ്ചു തരം പരുന്തുകളുടെ ജീവിതത്തിന്റെ അതിമനോഹരമായ ചിത്രീകരണം. മസ്റ്റ് വാച്ച്..

ഗ്രേറ്റ് നാചുറല്‍ വണ്ടേഴ്സ് ഓഫ് ദ വേള്‍ഡ്
പ്രകൃതി തീര്‍ത്ത അല്‍‌ഭുതക്കാഴ്ചകളുടെ വിവരണം.

കൂടുതല്‍ വിവരങ്ങള്‍ വിക്കിയില്‍

ഇറ്റ് ഹാപ്പന്‍ഡ് വണ്‍ നൈറ്റ്:

1934 ഇല്‍ പുറത്തിറങ്ങിയ ഒരു ഹോളിവുഡ് പ്രണയകഥ. മികച്ച സിനിമ ഉള്‍പ്പടെ ആ വര്‍ഷത്തെ അഞ്ച് അക്കാഡമി അവാര്‍ഡുകള്‍ കരസ്ഥമാക്കി. ഇന്നും പുതുമ നഷ്ടപ്പെടാത്ത ചിത്രം. ഒട്ടേറെ സിനിമകള്‍ പിന്നീട് ഇതേ രീതിയില്‍ പുറത്തിറങ്ങി. ( ദില്‍ ഹേ കി മാന്‍‌താ നഹി ഒരുദാഹരണം)

IMDB Link ഇവിടെ

പോളാര്‍ എക്സ്പ്രസ് :
ഇതേ പേരില്‍ പുറത്തിറങ്ങിയ കുട്ടികള്‍ക്കായുള്ള നോവലിന്റെ ആനിമേഷന്‍ .
മികച്ച അനിമേഷനും തിരക്കഥയും. ഒരു റോളര്‍ കോസ്റ്റര്‍ റൈഡുപോലെ കാഴ്ചക്കാരെ ത്രില്ലടിപ്പിക്കുന്ന സിനിമ. പ്രാധാന കഥാപാത്രത്തിലൊരാളായ ടിക്കറ്റ് ചെക്കറിന് ടോം ഹാങ്ക്സ് ശബ്ദം നല്‍കിയിട്ടുണ്ട്.

സാന്താക്ലോസ് മിത്തിനെ അടിസ്ഥാനമാക്കിയുള്ള ചിത്രം കുട്ടികളേയും മുതിര്‍ന്നവരേയും ഒരു പോലെ എന്റര്‍ടെയിന്‍ ചെയ്യും.

IMDB Link ഇവിടെ

ട്രെയിലര്‍ താഴെ കാണാം:

ഡോട്ട് ദി ഐ :
രസകരമായ ഒരു പ്രണയകഥ. ആദ്യന്തം നിറഞ്ഞു നില്‍ക്കുന്ന സസ്പെന്‍സ്. ചിത്രത്തിലുടനീളം ഉപയോഗിച്ചിരിക്കുന്ന ഇടയ്ക്കിടെ ഹാന്‍ഡിക്കാം ഫൂട്ടേജുകളിലേക്ക് വഴുതിവീഴുന്ന ചിത്രീകരണ രീതി അഭിനന്ദനം അര്‍ഹിക്കുന്നു. സസ്പന്‍സ് സിനിമകള്‍ ഇഷ്ടപ്പെടുന്നവര്‍ക്ക് ഈ സിനിമ ഇഷ്ടമാവാതിരിക്കില്ല

IMDB Link ഇവിടെ

ട്രെയിലര്‍ താഴെ കാണാം:

നന്ദി :
റോബി, വിന്‍സ്, പൊട്ടസ്ലേറ്റ് - സിനിമകളിലേക്കെത്തിച്ചതിന്

സിനിമാ ക്വിസ് ഗോമ്പറ്റീഷന്‍ - രണ്ട്

2009-04-29T22:00:00.001-05:00

ഹോള്‍ ടിക്കറ്റില്ലാഞ്ഞത് മൂലവും വൈകിയെത്തിയതു മൂലവും കൊണ്ടും കഴിഞ്ഞ പരീക്ഷയില്‍ പങ്കെടുക്കാന്‍ സാധിക്കാത്തവര്‍ക്കായി പുതിയ ചോദ്യപേപ്പര്‍. കഴിഞ്ഞ പരീക്ഷയില്‍ തോറ്റമ്പിയ സപ്ലി ടീമിനും ഇതില്‍ പങ്കെടുക്കാവുന്നതാണ്.

കേന്ദ്ര വിദ്യാഭ്യാസ കമ്മീഷന്റെ പുതിയ നിര്‍ദ്ദേശപ്രകാരം ഗണിതത്തിനും അനാലിറ്റിക്കല്‍ സ്കില്‍സിനും ഇത്തവണ കൂടുതല്‍ പ്രാധാന്യം നല്‍കിയിട്ടുണ്ട്.

ചോദ്യങ്ങളുടെ മാര്‍ക്ക് എത്ര എന്ന് നല്‍കിയിട്ടില്ല്ല. വിദ്യാഭ്യാസവകുപ്പില്‍ നിന്നും വിജയശതമാനം എത്ര വേണം എന്നുള്ള ഉത്തരവ് വന്ന ശേഷം തരാതരം പോലെ മാര്‍ക്കിടുന്നതായിരിക്കും. (ങ്ങള് അതൊന്നും ആലോചിച്ച് ബേജാറാവാണ്ട് പരീക്ഷ എഴ്തി കയ്ച്ചിലാവാന്‍ നോക്ക്)

നീല നിറത്തില്‍ എഴുതിയിരിക്കുന്നത് മൂല്യനിര്‍ണയം നടത്തുന്ന അദ്ധ്യാപകര്‍ക്കായുള്ള ഉത്തരസൂചികയാണ്. വിദ്യാര്‍ത്ഥികള്‍ ചോദ്യത്തില്‍ മാത്രം ശ്രദ്ധിക്കുക.

1. സാഗര്‍ ഏലിയാസ് ജാക്കിയുടെ രണ്ടു പിസ്ടളില്‍ കൊള്ളാവുന്ന ബുള്ളറ്റുകളുടെ എണ്ണം എത്ര?
a) നൂറു b ) മുന്നൂറു c) ആയിരത്തി ഒരുന്നൂറു d) പതിമൂവായിരം

2) "കൊച്ചി പഴേ കൊച്ചിയല്ലാന്നറിയാം... പക്ഷേ ______ പഴേ ______ തന്നെയാണ്" . വിട്ട ഭാഗം പൂരിപ്പിക്കുക
a) ബിലാല്‍ b) പേരാല്‍ c) അരയാല്‍ d) മഞ്ജുളാല്‍

3) റെഡ് ചില്ലീസില്‍ ഒമര്‍ എത്ര തവണ കാറിന്റെ വാതില്‍ അടച്ചു /തുറന്നു ?
a) മുപ്പത് b) അമ്പത് c) മിനുട്ടില്‍ രണ്ടു തവണ വെച്ച് d) അങ്ങനെ കണക്കൊന്നും ഇല്ല

4) ഇന്ത്യയില്‍ ഏറ്റവും കൂടുതല്‍ മഴ ലഭിക്കുന്ന പ്രദേശം ഏത്?
a) ചിറാപുഞ്ചി b) നാഗര്‍ കോവില്‍ c) ഹിന്ദിസിനിമാഗാനരംഗങ്ങളില്‍ d) അമല്‍ നീരദിന്റെ നായകന്‍ നില്‍ക്കുന്ന സ്ഥലങ്ങളില്‍

5)താഴെ പറയുന്ന സന്ദര്‍ഭങ്ങളില്‍ എന്തു സംഭവിക്കും എന്ന് ചുരുക്കി വിവരിക്കുക ?
a) "സുന്ദരിയും വിവാഹിതയുമായ ഒരു യുവതി ഒറ്റക്കിരിക്കുന്ന മുറിയിലേക്ക് ആകസ്മികമായി( എന്ന മട്ടില്‍) ഇമ്രാന്‍ ഹാഷ്മി കയറിച്ചെല്ലുന്നു."

b)" മമ്മൂട്ടി നോക്കിനില്‍ക്കെ റഹ്മാനും പദ്മപ്രിയയും ഡാന്‍സ് ചെയ്യുന്നു. "

6) സുരേഷ് ഗോപിയുടെ അടുത്ത സിനിമയിലെ റോള്‍?
a) പോലീസ് ഓഫീസര്‍ b) പോലീസ് ഓഫീസര്‍ c) പോലീസ് ഓഫീസര്‍ d) പോലീസ് ഓഫീസര്‍

7) താഴെ കൊടുത്തിരിക്കുന്ന കവിത ഏത് പാഠ ഭാഗത്തില്‍ നിന്നും എടുത്തിരിക്കുന്നു എന്ന് തിരിച്ചറിയുക.

"മനസിലൊരു പൂമാല
കൊരുത്തുവെച്ചതാരാണ്?
മണിച്ചിക്കലമാനോ പൂമീനോ?
വരണുണ്ടേ വിമാനച്ചിറകില്‍
സുല്‍ത്താന്‍മാര്‍ ഒത്തൊരുമിച്ചിരിക്കാന്‍
ആരാണാ ബീവി ഇതിലാരാണാ ഹൂറി?"

a) അച്ചുവിന്റെ ചിന്താവിഷയം b) ഇന്നത്തെ അമ്മ c) ടെര്‍മിനേറ്റര്‍ d) വണ്‍ ഫ്ല്യൂ ഓവര്‍ ദ കുക്കൂസ് നെസ്റ്റ്

8) ചോദ്യം ഏഴില്‍ പ്രതിപാദിച്ചിരിക്കുന്ന കവിതാ ശകലത്തിന്റെ വൃത്തം കണ്ടു പിടിച്ച ശേഷം ആശയം വ്യക്തമാക്കുക (ഒന്നറിഞ്ഞിട്ടു തന്നെ കാര്യം).

9) ഗ്രൂപ്പില്‍ നിന്നും കൂട്ടത്തില്‍ പെടാത്തത് എടുത്തെഴുതുക
( കവിയൂര്‍ പൊന്നമ്മ , കെ.പി.എ.സി. ലളിത , അടൂര്‍ പങ്കജം , കൊല്ലം തുളസി)

10) "ശാന്തമീ രാത്രിയില്‍ വാദ്യഘോഷാദികള്‍ കൊണ്ടുവാ" എന്ന് നായകന്‍ ഉറക്കെപ്പടിയിട്ടും ആരും ഒന്നു കൊണ്ടുവരാഞ്ഞത് എന്തുകൊണ്ട്?
(നായകന്‍ എങ്ങാനും ഡാന്‍സ് ചെയ്തു കളഞ്ഞാലോ?)

11) ബിന്ദുവിന് എന്തൊക്കെയാണ് വീട്ടില്‍ പണികള്‍ എന്ന് പത്തിരുന്നൂറ് വാക്കുകളില്‍ വിവരിക്കുക.

12) കമല്‍ ഹാസനും ഭാര്യയും കൂടെ ( ഏതെന്ന് ചോദിക്കരുത്) കടല്‍ക്കരയിലുടെ നടക്കാന്‍ ഇറങ്ങിയപ്പോള്‍ എതിരെ ഒരു കുരങ്ങനും നാലഞ്ച് ആനകളും നടന്നു വന്നു. അപ്പോള്‍ കമല്‍ പാടിയ പാട്ട്?

തെരേ മേരേ ബീച്ച് മേം, കൈസാ ഹേ യേ ബന്തര്‍ ? അഞ്ചാനാ....

സിനിമാ ക്വിസ് ഗോമ്പറ്റീഷന്‍

2009-04-08T22:15:00.001-05:00

ഇതാ നിങ്ങള്‍ക്ക് എല്ലാം വേണ്ടി ആവേശകരമായ ഒരു ഗോമ്പറ്റീഷന്‍ ചോദ്യപേപ്പര്‍ ...

പഴയ എസ്.എസ്.എല്‍.സി. പരീക്ഷയുടെ മാതൃകയില്‍ ആണ് ചോദ്യപേപ്പര്‍ തയ്യാറാക്കിയിരിക്കുന്നത്. ആകെ പതിനാലു ചോദ്യങ്ങള്‍ക്ക്. പരമാവധി ലഭിക്കാവുന്ന മാര്‍ക്ക് - അന്‍പത്. എല്ലാ ചോദ്യങ്ങള്‍ക്കും ഉത്തരം എഴുതാന്‍ ശ്രമിക്കുക.

ഒന്ന് മുതല്‍ അഞ്ച് വരെ ചോദ്യങ്ങള്‍ക്ക് ബ്രാക്കറ്റില്‍ നിന്നും ശരി ഉത്തരം തിരഞ്ഞെടുത്ത് എഴുതുക (ഓരോന്നിനും ഒരു മാര്‍ക്ക് വീതം )

1).-------- കണ്‍ നിറഞ്ഞു , ആ കണ്ണീരില്‍ ഞാന്‍ നനഞ്ഞു.... ആര്‍ക്കാണ് കണ്ണ് നിറഞ്ഞത്?

[എ) അമ്മമഴക്കാറിനു ബി) അംബാസിഡര്‍ കാറിനു സി) പ്രിമിയര്‍ പദ്മിനി കാറിനു ഇ) വോള്‍വോ ബസിനു ]

2) പറവൂര്‍ ഭരതന്റെ ജന്മനാട് ഏതു ?

[എ) പറവൂര്‍ ബി) പയ്യന്നൂര്‍ ക) ഗുരുവായു‌ര്‍ ഡി) സാന്‍ഫ്രാന്‍സിസ്കോ ]

3) ------- ഇവള്‍ സുന്ദരിയോ ദേവരംഭയോ മോഹിനിയോ? വിട്ട ഭാഗം പൂരിപ്പിക്കുക

[എ) ഇന്ദിരയോ ബി) സോണിയയോ സി) മനേകയോ ഡി) പ്രിയങ്കയോ ]

4) " ഒരു വിരല്‍ത്തുമ്പില്‍ എന്നെയും മറ് വിരല്‍ത്തുമ്പില്‍ ആണ്ട്ര്യുസിനെയും പിടിച്ച് നടക്കുമ്പോള്‍ അമ്മച്ചി പറയാറുള്ള ഒരു കഥയുണ്ട്, നിധി കാക്കുന്ന ഭുതത്താന്റെ കഥ." ഇത് ആരുടെ ഡയലോഗ് ആണ്?

[എ) ജോണ്‍ ഹോനായി ബി) ജോണ്‍ ഹോനായില്ല സി) ജോണ്‍ ഹോനാവും ഡി) ജോണ്‍ ഹോനായോ? ]

5) "ഹരിക്കുമ്പോഴും ഗുണിക്കുമ്പോഴും ഉത്തരം ശരി ആണെന്ന്‍ തോന്നിയാലും ഒന്നും കൂടെ ഹരിച്ചും ഗുണിച്ചും നോക്കുന്നത് നല്ലതല്ലേ? " ഡോക്ടര്‍ സണ്ണി ഇങ്ങനെ പറയാന്‍ കാരണം?

[എ) സണ്ണിക്ക് കണക്കറിയില്ല ബി) സണ്ണിക്ക് സയന്റിഫിക് കാല്‍ക്കുലേറ്റര്‍ ഇല്ല സി) സണ്ണിയ്ക്ക് ലോഗരിതം ടേബിള്‍ നോക്കാന്‍ അറിയില്ല ]

6 )ചേരും പടി ചേര്‍ക്കുക ( അഞ്ച് മാര്‍ക്ക് )

ഏഴു മുതല്‍ പതിനൊന്നു വരെ ചോദ്യങ്ങള്‍ക്ക് വിശദം ആയി ഉത്തരം എഴുതുക (രണ്ട് മാര്‍ക്ക് വീതം )

7) വിദ്യാ ബാലന് പല്ല് വേദന വന്നപ്പോള്‍ ഡോകടര്‍ പല്ലെല്ലാം പറിക്കേണ്ടി വരും എന്ന് പറഞ്ഞു. അപ്പോള്‍ വിദ്യ ഒരു പാടു പാടി. ഏതു പാട്ട് ?

"പല്‍ പല്‍ പല്‍ പല്‍ ഹര്‍ പല്‍

കൈസേ കടെഗാ പല്‍ ഹര്‍ പല്‍ ഹര്‍ പല്‍"

8) സൈഫ് അലി ഖാന്‍ വളിച്ച തമാശ പറഞ്ഞപ്പോള്‍ കരീന കപൂര്‍ പാടിയ പാട്ട് ?

"मेरे ज़िन्दगी में चली आई चली आई "

(മേരെ സിന്ദഗി മേ ചളി ആയി ചളി ആയി..)

9) ഉദിത് നാരായണന്‍ വെള്ളത്തില്‍ വീണപ്പോള്‍ പാടിയ പാട്ട്?

"മുജെ നീന്ത് നാ ആയെ ...... ഹോ. "

10) കാമുകി തന്റെ ലാപ്ടോപ് ഹാക്ക് ചെയ്തു എന്നറിഞ്ഞപ്പോള്‍ ഷാരുഖ് ഖാന്‍ പാടിയ പാട്ടേത്?

"തു ഹാക്കര്‍ യാ ക്രാക്കര്‍ തു ഹേ മേരി കിരണ്‍ ....."

11) "ഹു ഈസ് ദിസ് ജാക്കി? J-A-C-K-Y ജാക്കി ?" ആര് ആരോട് എപ്പോള്‍ എന്തിനു ചോദിച്ചു ?

12) താഴെ കൊടുത്ത കവിതാശകലത്തില്‍ നിന്നും അലങ്കാരങ്ങളെ തിരിച്ചറിയുക ( അഞ്ച് മാര്‍ക്ക്)

"ഡിങ്കിരി ഡിങ്കിരി ഡിങ്കിരി ഡിങ്കിരിപ്പട്ടാളം"

"ഡുമ്മക്ക് ഡുമ്മക്ക് ഡുമ്മക്ക് ഡുമ്മക്ക് ഡ്യൂക്കില് പട്ടാളം "

13) "നിറം" ത്തില്‍ കുഞ്ചാക്കൊയ്ക്കും ശാലിനിയ്ക്കും ഇടയില്‍ പ്രണയം ഉരുത്തിരിയാന്‍ ഉണ്ടായ സാഹചര്യങ്ങളെ കുറിച്ച് നൂറു വാക്കില്‍ കഴിയാതെ ഉപന്യസിക്കുക ( പത്ത് മാര്‍ക്ക്)

14) തുറുപ്പുഗുലാന് , മായാബസാര്‍ , പരുന്ത് എന്നീ പാഠഭാഗങ്ങളെ മുന്‍നിര്‍ത്തി "മമ്മുട്ടിയും നാട്യശാസ്ത്രവും" എന്നാ വിഷയത്തെക്കുറിച്ച് 200 വാക്കില്‍ കുറയാതെ ഉപന്യസിക്കുക ( പതിനഞ്ച് മാര്‍ക്ക് )

വിവിദ (ധ) വധം ആട്ടക്കഥ

2009-02-25T21:02:00.003-06:00

"മന്ത്രാഭിഷേകവും ശംഖാഭിഷേഖവും നവകാഭിഷേഖവും കഴിഞ്ഞാല്‍,
സുവര്‍ണകലശവും കളഭച്ചാര്‍ത്തും മലരുനിവേദ്യവും കഴിഞ്ഞാല്‍..
അടിയന്റെ വിശപ്പിനൊരരിമണി നല്‍കണേഗുരുവായൂര്‍ പരം പൊരുളേ..സകലചരാചരനഭസ്സേ..."

ഗുരുവായൂര്‍ ക്ഷേത്രമതിലകത്തു നിന്നും ദാസേട്ടന്റെ ശബ്ദത്തില്‍ മനോഹരമായ ഗാനം ഒഴുകിയെത്തുന്നു. മേല്‍മുണ്ടു മാത്രം ധരിച്ച് നഗ്‌നപാദനായി (ചുമലില്‍ ഒരു തോര്‍ത്ത് മുണ്ടും")അച്ഛനമ്മമാരുടെ കൂടെ അകത്തേക്ക് പ്രവേശിച്ചതും ക്ഷേത്രമണി ഉച്ചത്തില്‍ ശബ്ദിച്ചു... ആറു തവണ...

ചുറ്റും ജനപ്രവാഹമാണ്.

സമയം പോയതറിഞ്ഞില്ല... പ്രദക്ഷിണം വെയ്ക്കുമ്പോഴാണ് അതു ശ്രദ്ധിച്ചത്... പടിഞ്ഞാറേ നടയിലേ കോണ്‍ക്രീറ്റ് മേല്‍ക്കൂരയില്‍ ഒരിടത്ത് ഒരു ചെറിയ ദ്വാരം ചതുരത്തില്‍... ആകെ സംശയം ആയി... ഇതെന്താ സംഭവം? റെയിന്‍വാട്ടര്‍ ഹാര്‍‌വെസ്റ്റിംഗില്‍ ഈ ദേവസ്വക്കാര്‍ക്കും താല്പര്യം ഉണ്ടോ? കാലം പോയ പോക്കേ....

അങ്ങനെ വണ്ടര്‍ അടിച്ചു നില്‍ക്കുന്നത് കണ്ടപ്പോഴാണ് അമ്മ ആ കഥ പറഞ്ഞത്..

ശങ്കരാചാര്യര്‍ സന്യാസത്തിലേക്കുള്ള എണ്ട്രന്‍സ് പരീക്ഷ പാസ്സായി ഇരിക്കുന്ന കാലം. "മുതല" പ്രശനങ്ങള്‍ ഒക്കെ വന്നതു കാരണം അദ്ദേഹത്തിന്റെ അമ്മ ഗ്രീന്‍ സിഗ്‌നല്‍ കൊടുത്തിരിക്കുകയാണ്. പക്ഷേ ഓണ്‍ വണ്‍ കണ്ടീഷന്‍ ... അമ്മക്കു കാണേണം എന്നു തോന്നുമ്പോള്‍ ആള്‍ ഇവിടെ എത്തിയിരിക്കണം..

ശങ്കരാചാര്യര്‍ ആലോചിച്ചു. എന്താണൊരു വഴി? ഒരു ടെലിഫോണ്‍ കണക്ഷന്‍ എടുത്തു കൊടുക്കാം എന്നു വെച്ചാല്‍ അലക്സാണ്ടര്‍ ഗ്രഹാംബെല്‍ ജനിക്കാന്‍ ഇനിയും നൂറ്റാണ്ടുകള്‍ കാത്തിരിക്കേണ്ടി വരും. എന്നാല്‍ പിന്നെ ഒരു ടാറ്റാ ഇന്‍‌ഡിക്കോം ബ്രോഡ്ബാന്റ് ഇന്റര്‍നെറ്റ് കണക്ഷന്‍ എടുക്കാം എന്നു വെച്ചാല്‍ രത്തന്‍ ടാറ്റ പോയിട്ട് ജാംഷെഡ്ജി ടാറ്റ പോലും ഭൂജാതനായിട്ടില്ല.

അങ്ങിനെയാണ് അവസാനം രണ്ടു പേരും കൂടെ ടെലിപ്പതി മതി എന്നു തീരുമാനിച്ചത് ( ഫോര്‍ റഫറന്‍സ് - ടെലിപ്പതി :- ശക്തിമാനും ഗീതാ ബിശ്വാസും കമ്യൂണിക്കേറ്റ് ചെയ്യുന്ന സംഗതി... മുട്ടന്‍ ടെക്നോളജി ആണ് )

അമ്മ മനസില്‍ വിചാരിച്ചാല്‍ മതി, ശങ്കരാചാര്യര്‍ അറിഞ്ഞോളും...

കമ്മ്യൂണിക്കേഷന്‍ അങ്ങിനെയാണെങ്കില്‍ ട്രാന്‍സ്പോട്ടേഷന്‍ അതിലും അഡ്വാന്‍സ്ഡ് ആണ്. ആകാശമാര്‍‌ഗം ശങ്കരാചാര്യര്‍ പോവുന്നേ കണ്ടു കഴിഞ്ഞാല്‍ നമ്മുടെ പ്രതിരോധവകുപ്പ് മിസൈലുകളൂടെ പൃഥ്വി-അഗ്നി എന്ന പേരൊക്കെ മാറ്റി ശങ്കര്‍ എന്നിട്ടേനേ ....

അപ്പോള്‍ പറഞ്ഞു വന്നത് ഇങ്ങനെ പോണ പോക്കില്‍ ഗുരുവായൂര്‍ സെന്‍‌ട്രലില്‍ എത്തിയാല്‍ , അവിടെ ഒന്നു ലാന്‍‌ഡ് ചെയ്ത് ഗുരുവായൂരപ്പനെ തൊഴുത ശേഷമേ ശ്രീശങ്കരാചാര്യര്‍ അടുത്ത ഫ്ലൈറ്റ് പിടിക്ക പതിവുള്ളൂ...

അങ്ങനെ ഒരു ദിവസം അമ്മയെക്കാണാന്‍ ഉള്ള തിടുക്കത്തില്‍ പോവുകയാരുന്നു. ഗുരുവായൂര്‍ അമ്പലത്തിന്റെ എയര്‍ ബോര്‍ഡറില്‍ എത്തിയപ്പോള്‍ താഴെ ശ്രീഭൂതബലി നടക്കുന്നു. ഭഗവാനും ബിസി താനും ബിസി, എന്നാല്‍ പിന്നെ കാര്യം നടക്കട്ടെ എന്നു കരുതി ഒന്നു സ്മൈല്‍ മാത്രം ചെയ്ത് ഫുള്‍ ത്രോട്ടിലില്‍ പോവാന്‍ തുടങ്ങിയതും...ശങ്കരാചാര്യര്‍ നേരെ പടിഞ്ഞാറേ നടയില്‍ ക്രാഷ് ലാന്റ് ചെയ്തു...

"എന്താ ശങ്കരാ, നമ്മളെ ഒന്നും മൈന്‍ഡ് ഇല്ലല്ലേ" എന്ന് ഒരു അശരീരിയും ശങ്കരാചാര്യര്‍ മാത്രം കേട്ടു.

ശങ്കരാചാര്യര്‍ പിന്നെ അമാന്തിച്ചില്ല ചാടി എഴുന്നേറ്റ് ഉച്ചത്തില്‍ ഗോവിന്ദാഷ്ടകം അങ്ങു പാടി.ഗുരുവായൂരപ്പനും ഹാപ്പി ശങ്കരാചാര്യറും ഹാപ്പി....

അങ്ങിനെ ശങ്കരാചാര്യര്‍ "ധര്‍ത്തീപുത്ര്" ആയ സ്ഥലത്താണ് ചതുരത്തില്‍ ഒരു ഹോള്‍ ഇട്ടിരിക്കുന്നത്.

അല്ലാ അതിപ്പോള്‍ കഴിഞ്ഞിട്ട് കാലം എത്ര കഴിഞ്ഞു? ഇപ്പോള്‍ ഒരു ചതുരം അവിടെ സൃഷ്ടിച്ചതിന്റെ പിറകില്‍ എന്തായിരിക്കും ഉദ്ദേശം? ഇനി അഥവാ ഒന്നൂടെ വീഴുവാണേല്‍ റുഫീല്‍ കിടക്കണ്ട നേരെ താഴേക്കു പോന്നോട്ടെ എന്നായിരിക്കാം....

അച്ഛനും അമ്മയും ചില വഴിപാടും കാര്യങ്ങളുമൊക്കെയായി പല വഴി പോയി... ഞാന്‍ മെല്ലെ കിഴക്കേ നടയുടെ ഒരു ഭാഗത്ത് ചെന്നിരുന്നു.

തൊട്ടുമുന്‍പില്‍ ഒരു പതിനഞ്ചു-പതിനാറ് വയസുകാരിയായ ഒരു അതീവസുന്ദരിക്കൊച്ച്. ആളങ്ങനെ പതുക്കെ പതുക്കെ അടിപ്രദക്ഷിണം നടത്തുന്നു.

ഐശ്വര്യത്തിന്റെ നിറകുടമായ സുസ്മേരവദനത്തില്‍ "കരുണ ചെയവാന്‍ എന്ത് താമസം കൃഷ്ണാ? " എന്നൊരു ഭാവം പരിലസിച്ചിരിക്കുന്നു... ( അതല്ലേലും ആ പ്രായത്തില്‍ അങ്ങനെയാണ്‌. പെണ്‍കുട്ടികള്‍ക്ക് കൃഷ്ണന്‍ ഹീറോയും ആണ്‍കുട്ടികള്‍ക്ക് റോള്‍ മോഡലും )

ഈശ്വരാ എന്തൊരു തേജസാണ് ആ മുഖത്ത്! അടിവെച്ച് നീങ്ങുന്ന പാദപങ്കജങ്ങളില്‍ ചുറ്റിപ്പിണഞ്ഞു കിടക്കുന്ന സ്വര്‍‌ണപാദസരങ്ങള്‍ ! പുള്ളിക്കാരി എന്റെ സ്റ്റീല്‍ബോഡി കണ്ട് ഞെട്ടണ്ട എന്നു കരുതി മെല്ലെ ചുമലില്‍ കിടന്ന തോര്‍ത്ത് നേരെയാക്കി ഞാന്‍ അങ്ങനെ നോക്കിയിരിക്ക്യാണ്

"ഇടറിയ മാമനാദം മധുരിതമല്ലെന്നാലും,
ചരണപങ്കജങ്ങളില്‍ ഇവനുമഭയമരുളൂ നളിന നയനേ....." (പ്ലീസ്)

ഭാവിയില്‍ ഞങ്ങള്‍ ഒരുമിച്ചു വന്നു ദര്‍‌ശിക്കുന്നതും, ഞങ്ങടെ പിള്ളാര്‍ അവിടെ ഉരുളിയില്‍ കിടന്ന് മഞ്ചാടി വാരുന്നതും ഒക്കെ സ്വപ്നം കണ്ട് കണ്ട് ഇരിക്കുമ്പോള്‍ പെട്ടെന്നാണ് അച്ഛന്റെ ശബ്ദം കാതില്‍ പതിച്ചത്.

"ഡോ ,... കൃഷ്ണനാട്ടം കാണാന്‍ ഇന്ററസ്റ്റ് ഉണ്ടോടോ?"

"എന്താ?"

"ഇന്ന് രാത്രി കൃഷ്ണനാട്ടം ഉണ്ടാവും. ഉറക്കമൊഴിയാന്‍ പറ്റുമെങ്കില്‍ കാണാം."

പലവട്ടം ആലോചിച്ചു. രസമുള്ള പരിപാടിയാണ്. കഥകളീടെ അത്രേം ഗുമ്മില്ലെങ്കിലും രസിച്ച് കണ്ടിരിക്കാം. സംഗീതം ഒക്കെ ബഹുജോര്‍ ആയിരിക്കുകയും ചെയ്യും. പക്ഷേ ഉറക്കത്തിന്റെ കാര്യത്തില്‍ ഒരു കോമ്പ്രമൈസ് ....

തിരിച്ച് പാഞ്ചജന്യം ലോഡ്ജില്‍ എത്തിയപ്പോള്‍ അവിടെ ബോര്‍ഡില്‍ കണ്ടു ... "വിവിദവധം"... കഥ വായിച്ചിട്ടുണ്ട്. കളി കണ്ടിട്ടില്ല. എന്നാല്‍ ഇന്നു തന്നെ ആയേക്കാം.

അങ്ങനെ രാത്രി ഞങ്ങള്‍ എല്ലാവരും കൂടെ വിവിദനെ വധിക്കുന്നത് കാണാന്‍ ചെന്നിരുന്നു.
ആട്ടവിളക്കിന്റെ പ്രകാശത്തില്‍ കളി തുടങ്ങുകയായി.

ദൂരെ മാറി അയാളും ഉണ്ട്. പകലു കണ്ട പാദപങ്കജങ്ങള്‍ക്കുടമ... പകലു പകുതി നിര്‍ത്തിയ സ്വപ്നത്തിന്റെ രണ്ടാം പാര്‍ട് അവിടെ വച്ചു കണ്ടുതുടങ്ങി....

"ആയിരം സങ്കല്പങ്ങള്‍ തേരുകള്‍ തീര്‍ത്ത രാവില്‍
‍അര്‍ജ്ജുനനായ് ഞാന്‍ അവള്‍ ഉത്തരയായി..."

ഞാനിവിടെ കണ്ണുകള്‍ കൊണ്ട് കൃഷ്ണനാട്ടവും കഥകളിയും ഒരുമിച്ച് കളിക്യാണ്. അയാള്‍ക്കാണെങ്കില്‍ നമ്മളെ കണ്ട ഭാവമേയില്ല....

ആട്ടം അങ്ങനെ തകര്‍ക്കുകയാണ്. സംഗതി ഇങ്ങനെയാണ്. കേരളത്തിലെ എം.എല്‍.എ മാരുടെ അതേ തത്വചിന്തയില്‍ വിശ്വസിച്ചതു കൊണ്ടോ മറ്റോ, അധികാരത്തിലേറിയ ശേഷം ശ്രീകൃഷ്ണന്‍ സ്വന്തം നിയോജകമണ്ഢലമായ വൃന്ദാവനത്തിലോട്ട് ഒരു നാടമുറിക്കല്‍ കര്‍മത്തിനു പോലും ചെല്ലുക ഉണ്ടായിട്ടില്ല..

അങ്ങിനെ വിവിദന്‍ എന്നൊരു വാനരശ്രേഷ്ഠന്‍ അവിടെ ചില കലാപരിപാടികള്‍ നടത്തിയത് ഒരു അടിയന്തിരപ്രശ്നമായി മാറിയപ്പോഴാണ്, ബുഷ് കോണ്ടലീസാ റൈസിനെ അയക്കുമ്പോലെ, ബലരാമനെ വൃന്ദാവനത്തിലോട്ട് അയക്കാം എന്ന് കൃഷ്ണന്‍‌ കരുതിയത്...

അങ്ങനെ വൃന്ദാവനത്തിലെത്തിയ ബലരാമന്‍ അവിടെ പല പല കലാപരിപാടികള്‍ കാഴ്ച വെയ്ക്കുകയാണ്. മദിരയും മദിരാക്ഷിയും.....

ബലരാമന്‍ കൊള്ളാലോ? വിചാരിച്ച പോലെ അല്ല (എത്ര ഒക്കെ ആയാലും ശ്രീകൃഷ്ണന്റെ ചേട്ടനല്ലേ)
ഗുരവേ നമ: , ശിഷ്യപ്പെടുത്തിയാലും....
(അന്നത്തെക്കാലത്ത് ശ്രീരാമസേന ഇല്ലാഞ്ഞത് ബലരാംജീയുടെ ഭാഗ്യം. ഇല്ലേല്‍ ഓണ്‍ ദ സ്പോട്ട് എത്ര കല്യാണം കഴിക്കേണ്ടി വന്നേനെ.... ഹൊ)

കഥ നല്ല രസം പിടിച്ചു വരുന്നു. എങ്കിലും ഒരേ രംഗം ആടിയാടി തകര്‍ക്കുകയാണ്.
കള്ളിന്റെ മണം അടിച്ച് ആ വഴി നാചുറല്‍ ആയി വിവിദവാനരന്‍ എത്തുകയായി...
അപ്പുറത്ത് നമ്മുടെ നളിനാക്ഷി നമ്മളെ മൈന്‍ഡ് ചെയ്യുന്നില്ല. ഇപ്പുറത്ത് ബലരാമനും വിവിദനും ഒരു തരത്തിലും അടുക്കുന്നുമില്ല...

കണ്ണുകള്‍ പതുക്കെ അടഞ്ഞുതുടങ്ങുകയാണ്. പാതി ചിമ്മിയ മിഴികളില്‍ ആട്ടവിളക്കിന്റെ പ്രകാശം നക്ഷത്രരൂപങ്ങള്‍ തീര്‍ക്കുന്നു. പതുക്കെ പതുക്കെ...

":ഗ്ഘ്രാആ........"

ഒരു അലര്‍‌ച്ചയോടെ എന്റെ നേരേ ചാടിവീണ ഭീകരരൂപം കണ്ടതും " എന്റമ്മേ" എന്നു വിളിച്ച് ഞാന്‍ ഞെട്ടി ഉണര്‍ന്ന് അമ്മയെ കെട്ടിപ്പിടിച്ചതും ഓര്‍മയുണ്ട്.

സംഭവിച്ചതിതാണ്. വിവിദവാനരന്‍ ബലരാമന്റെ "കള്ളിനെ" എങ്ങനെ അപ്രോച് ചെയ്യാം എന്ന് ആലോചിച്ചിരിക്കുമ്പോള്‍ കാണികള്‍ക്കിടയില്‍ ഒരു ഇരുപത്തൊന്നാം നൂറ്റാണ്ടിന്റെ സന്തതി, സന്തതം കിടന്നുറങ്ങുന്നു. ഇമ്പ്രോവൈസേഷന്‍ ഇന്നിടത്ത് ഇങ്ങനെ എന്ന് ഭരതമുനി കൃത്യമായി പറഞ്ഞുവെച്ചിട്ടില്ലാത്തത് കൊണ്ട് എന്നാല്‍ ഇതു തന്നെ അവസരം എന്നു കരുതി പുള്ളി ആ പാവം പയ്യന്റെ നേരെ ഉച്ചത്തില്‍ അലറിവിളിച്ച് ചാടി അങ്ങു വീഴുന്നു....

കലികാലം! നമ്മടെ പാതി ജീവന്‍ അങ്ങു പോയി.... ശ്രീപദ്‌മനാഭന്‍ തുണ... ഇല്ലെങ്കില്‍ അന്നവിടെ വിവിദവധത്തോടൊപ്പം "വിവിധ" വധങ്ങള്‍ നടന്നേനെ....

സത്യം പറയാലോ ബാക്കിയുള്ള കളി മുഴുവന്‍ കണ്ണു മിഴിച്ചിരുന്നു കണ്ടു.... ഒരു സെക്കന്റ് ഒരു ഇമ പോലും ..ങേ ഹേ... വെട്ടിയിട്ടില്ല... ജെനുവിന്‍ താല്‍‌പര്യം കൊണ്ടാണ്... അല്ലാതെ പേടിച്ചിട്ടല്ല...

വേറേ എന്തു പറയാന്‍? കൃഷ്ണനാട്ടം കാണുന്ന പരിപാടി അന്നോടെ നിലച്ചെന്ന് പറഞ്ഞാല്‍ മതിയല്ലോ...

ഉരുകിയ മഞ്ഞുതുള്ളികള്‍ (കഥ)

2009-02-23T22:45:00.001-06:00

കുറച്ച് വര്‍ഷങ്ങള്‍ക്ക് മുന്‍പേ എഴുതിയതാണ്. പത്താം ക്ലാസില്‍ വച്ച്...

യൂണിക്കോഡല്ല.... സംഗതി മറ്റേ ഭീകരന്‍ ആണ്.

അച്ചടിമാധ്യമന്‍!
(പാവം ഒരു സ്കൂള്‍മാഗസിന്‍ ആണു കേട്ടോ)

+2 വിലെ മാഗസീനില്‍ പ്രസിദ്ധീകരിച്ചു....

മാഗസീനിന്റെ പിന്നണിയില്‍ പ്രവര്‍ത്തിച്ച എല്ലാവര്‍ക്കുമുള്ള എന്റെ നിസ്സീമമായ നന്ദി ഈയവസരത്തില്‍ ഒന്നു കൂടെ പറഞ്ഞുകൊള്ളട്ടേ...

ഓടോ:

എഴുതിയ പയ്യന്‍സിന്റെ ഫോട്ടോ കണ്ടിട്ട് അതാരാ എന്നൊന്നും ചോദിച്ചു കളയരുത്...

ക്ലിക്കി ക്ലിക്കി വലുതാക്കി വായിക്കൂ... :)

രസങ്ങളും തന്ത്രങ്ങളും

2009-02-16T21:29:00.008-06:00

പ്രൊലോഗ് :

കൈയിലിരിക്കുന്ന പേപ്പര്‍ മേശപ്പുറത്തേക്ക് അലക്ഷ്യമായി ഇട്ട ശേഷം ഓമനടീച്ചര്‍ എന്റെ നേരെ മുഖമുയര്‍ത്തി.

"ശ്രീഹറീ... വാട്ടിസ് ദ കെമിക്കള്‍ ഫോര്‍മുല ഓഫ് കലോമല്‍ ഇലക്ട്രോഡ്?"

അനന്തവും അനാദിയുമായ പ്രപഞ്ചത്തിലെ അനേകം താരപടലങ്ങള്‍ക്കിടയില്‍ എവിടെയോ ഉള്ള ഒരു സ്പൈറല്‍ ഗാലക്സിയിലെ ഒരു കുഞ്ഞുനക്ഷത്രകുടുംബത്തിലെ മൂന്നാമത്തെ ഗ്രഹത്തില്‍ അനേകം സ്പിഷീസുകള്‍ക്കിടയില്‍ ഒരു ജീവി മാത്രമായ മനുഷ്യന്റെ ജീവിതത്തില്‍ ഒരു കലോമല്‍ ഇലക്ട്രോഡിന്റെ പ്രസക്തി എന്തെന്നറിയാതെ ഞാന്‍ ചിന്താധീനനായി നിന്നു. ഉത്തരമില്ലാതെ..

രസങ്ങളും തന്ത്രങ്ങളും

ഹോട്ടല്‍ ന്യൂ കേരളായില്‍ നിന്നും ചൂടാറാത്ത പൊറോട്ടയും മത്തിക്കറിയും തട്ടി ഞാന്‍ തിരിച്ച് ക്ലാസിലേക്ക് നടന്നു. പോളിടെക്സ്നിക്കിന്റെ ഉപയോഗശൂന്യമായ വര്‍ക്ക്ഷോപ്പുകളില്‍ ഒന്നിലായിരുന്നു അന്നു ഞങ്ങളുടെ ക്ലാസ് റൂം. എന്നത്തേയും പോലെ ഉച്ചസമയത്ത് എല്ലാവരും അങ്ങിങ്ങായി ഇരുന്നു കൊച്ചുവര്‍ത്തമാനം പറയുകയാണ്.

ഒരു വശത്ത് സംഗീതസഭ കൂടിയിരിക്കുന്നു.

"ഒരു മുറി മാത്രം തുറക്കാതെ വെയ്ക്കാം ഞാന്‍ അതു ഗൂഢമെന്നുടെ ആരാമത്തില്‍..."

മീഞ്ചന്തക്കാരന്‍ രാഗേഷ് ( ഞങ്ങളുടെ സ്വന്തം ചന്തരാഗേഷ്... പതിനാറ് കഴിയാത്ത സുന്ദരന്‍ മുഖത്ത് ഇരുപത്താറിന്റെ മീശ കൊണ്ടു നടക്കുന്ന മീശരാഗേഷ്..) ഇരുന്നു ദേശ് രാഗത്തില്‍ തകര്‍ക്കുകയാണ്. അടുത്ത് കോഴിക്കോട്-മലപ്പുറം ബോര്‍ഡര്‍ സുതന്‍ ഷഫീഖ് ഇരുന്ന് താളം പിടിക്കുന്നു. തന്റെ സുന്ദരന്‍ പല്ലുകള്‍ മുപ്പത്തിരണ്ടും പുറത്തുകാട്ടി ഇസ്മായില്‍ ആയിക്കൊണ്ടാണ് താളം പിടി...

മുത്തശ്ശി പറയുന്ന ഫെയറിടെയില്‍ കഥ കേട്ട് അത്ഭുതപ്പെട്ടിരിക്കുന്ന നാലു വയസുകാരിയോടെ ഭാവഹാവാദികളോടെ ശില്പ രാഗവിസ്താരം ആസ്വദിക്കുന്നു. മിനിറ്റില്‍ നൂറ്റിരുപത് തവണ ഇമ വെട്ടിക്കൊണ്ട് ഗാനകോകിലം രുഗ്മിണിയും പാട്ടു കേള്‍ക്കുന്നവരുടെ കൂട്ടത്തിലുണ്ട്. മീശരാഗേഷിന്റെ സംഗതികളും സംഗതിയില്ലായമയുമെല്ലാം നോട് ചെയ്യുകയാവണം.... മിക്കവാറും അബന്റെ ദേശ് ഇന്നു വിദേശ് ആവും...

നേരെ ആ ഭാഗത്തു തന്നെ ചെന്നിരുന്നു.

"ശ്ശ്ശ് എന്തു പറ്റി?"

"ചന്ത റൊമാന്റിക് ആയെടാ...." ഷഫീഖ് എന്നോട് മന്ത്രിച്ചു.രാഗേഷിന്റെ പാട്ടു കേട്ട് ചുറ്റുമുള്ളവര്‍ അതിലേറേ റൊമാന്റിക് ആവുന്നു.. കുഴപ്പം ആവുമോ....

ദേ അപ്പുറത്ത് ചാക്കോ ഇരുന്നു സ്വപ്നം കാണുന്നു...

"എന്താടാ ചാക്കോ.. അമീര്‍ ഖാന്റെ സിനിമയൊന്നും ഇക്കൊല്ലം ഇറങ്ങാനില്ലാത്തതു കൊണ്ടാണോ ഇങ്ങനെ ഇരിക്കുന്നത്..."

"അല്ലളിയാ ഞാന്‍ ഓര്‍ക്കുവാരുന്നു...."

"എന്തര് ..."

"എനിക്കവളോട് ആദ്യമായി ഇഷ്ടം തോന്നുന്നത് എട്ടാം ക്ലാസില്‍ വച്ച്. അന്നവള്‍ നാലാം ക്ലാസില്‍...."

കളരിപരമ്പര ദൈവങ്ങളേ .... നാലാം ക്ലാസില്‍ വെച്ചേ പെണ്‍കുട്ടികള്‍ എല്ലാം ബുക്ഡ് ആയോ?
ഞാന്‍ അവനെ സമാധാനിപ്പിച്ചു.. സാരമില്ലഡാ അവളങ്ങ് ദൂരെയല്ലേ... പോരാത്തതിന് പ്ലസ് റ്റൂ... നാട്ടില്‍ പോവുമ്പോള്‍ കാണാമല്ലോ....

"അതു ശരിയാ അളിയാ പക്ഷേ ദില്‍ ഹേ കി മാന്‍‌താ നഹീ... മനസില്‍ കയറി ആരോ മാന്തുന്നതു പോലെ...."ചാക്കോ ആമീര്‍ ഡയലോഗ് പറയാന്‍ തുടങ്ങി.

കുഴപ്പമാണ്. ദില്‍ ഹേകി മാന്താ നഹിയില്‍ നിന്നും പാപ്പ കെഹ്തേ ഹെ വഴി അവസാനം രംഗീലയെത്തും മുന്‍പേ തടയണം....

ഞാന്‍ പതുക്കെ വിഷയം മാറ്റാന്‍ തുടങ്ങി....

"ഹിന്ദുസ്ഥാനി കളയളിയാ നമുക്ക് ജന്തുവരാളിയില്‍ ഒരു പിടി പിടിക്കാം"

"ജന്തുവരാളിയല്ലെഡാ പന്തുവരാളി..." ഷഫീഖ് എന്നെ തിരുത്തി...

ആണല്ലേ... എന്നാല്‍ അതു വേണ്ട ... നമുക്കു വല്ല വഞ്ചിപ്പാട്ടും പാടാം...

"ഒന്നാനാം ചൂണ്ടനേലമര‍ം പിടിക്കുന്ന
പൊന്നിലും പൊന്നായ തമ്പുരാനേ..
.ഉല്‍സവക്കാവിലും കരയോഗനാവിലും
ഒന്നാമനായുള്ള തമ്പുരാനേ...
നിന്നെത്തേടിത്തുഴഞ്ഞുവരുന്നൂ...
നിന്റെ ചെറുമീതന്‍ ചുരുളന്‍ വള്ളം...."

അവിചാരിതമായി രവീന്ദ്രസംഗിതം കടന്നുവന്നപ്പോള്‍ ശനിയ്യാഴച രാവിലെ ബാലരമ കണ്ട ഒന്നാം ക്ലാസുകാരിയെപ്പോലെ രുഗ്മിണി ചിരിച്ചു... അല്ലെങ്കിലും അതങ്ങനെയാണ് രവീന്ദ്രസംഗീതത്തിന്റെ കാര്യത്തില്‍ രണ്ടഭിപ്രായമില്ല ആര്‍ക്കും...

പാട്ടു കനക്കുന്നതിനിടയില്‍ എവിടോ നിന്നൊ അമൃത ഓടിയെത്തി...
"പൂത്താലം വലം കൈയിലേന്തീ വാസന്തം....
മധുമാരിയില്‍ സുമരാജിയില്‍
കാറ്റിന്‍തൂവല്‍ തഴുകീ കന്യാവനമിളകീ...."

പാട്ടു കേട്ടതും ഷഫീഖ് വയലന്റായി...
"എന്റെ പൊന്നമൃതേ എത്ര കാലാമായീ നീയീ പൂത്താലം വല്‍ം കൈയിലേന്തുന്നു... അതിനി ഇടത്തെ കൈയിലോട്ട് മാറ്റിപിടിച്ച് വേറേ വല്ല പാട്ടും പാട്..."

"ആരാ അവിടെ പാട്ടുപാടുന്നത്?" അമിതാബ് ബച്ചന്‍ മലയാളം പറയുന്നത് പോലെ ഘനഗംഭീരമായ ഒരു ശബ്ദം കേട്ട് എല്ലാവരുടേയും ശ്രദ്ധ ആ ഭാഗത്തേക്കായി...

ഒന്നേ നോക്കിയുള്ളൂ.... ഒരു ബാച്ചിന് മൊത്തമായി ആകെക്കൂടെയുള്ള സിക്സ് പാക്കാണ് വിപിന്‍....പലപ്പോഴും ക്ലാസില്‍ വല്ല കാര്യത്തിനും തിരിഞ്ഞു നോക്കിയ്യാല്‍ ആദ്യം കാണുന്നതവന്റെ ബൈസെപ്സ് ആണ്.... പണ്ടാരക്കലനാണെങ്കില്‍ ഹാഫ് സ്ലീവ് ഷര്‍ട്ട് ഇട്ടെ വരൂ....

ഇനിയിവിടെ മിക്കവാറും മ്യൂസിക് വിത്ത് ബോഡി മസില്‍സ് നടക്കും

"മെലഡി പാടണമെടാ മെലഡി..." വിപിന്‍ വികാരാധീനനായി....

"ഓമലാളെ കണ്ടൂ ഞാന്‍ പൂങ്കിനാവില്‍..."

"ഓമാലാളുടെ കാര്യം പറഞ്ഞപ്പോഴാ .. കെമിസ്ട്രി ലാബില്‍ കയറാന്‍ ടൈം ആയി...ഓമന ടീച്ചറ് എത്തും മുന്‍പേ കയറണം"

ഷഫീഖ് പറഞ്ഞു മുഴുമിക്കും മുന്‍പേ പലരും പല വഴിക്കോടി... ബാഗ്ഗിനുള്ളില്‍ നിന്നും ലാബ് യൂണിഫോം എടുത്ത് ഷഫീഖ് ബാത്ത് റൂമിലേക്കോടി... റെക്കോര്‍ഡ് എവിടെ വര്‍ക്ക് ബുക്ക് എവിടെ എന്നും പറഞ്ഞ് ശില്പ വേറൊരു വഴിക്കോടി.... മസിലു പെരുപ്പിച്ച് വിപിന്‍ ഫിസിക്സ് ലാബിലോട്ടോടി....

ഞാന്‍ ഒന്നമാന്തിച്ചു നിന്നു... ഒന്നാമതേ കെമിസ്ട്രി ലാബ്... എനിക്ക് എന്താ എന്നറിഞ്ഞൂട എട്ടാം ക്ലാസു മുതലേ കെമിസ്ട്രി വളരെ ഇഷ്ടമുള്ള സബ്ജക്റ്റാണ്. ഓക്സിജന്റെ വാലന്‍സി എത്രയാണെന്ന് ഉറക്കത്തില്‍ ചോദിച്ചാല്‍ പോലും ഞാന്‍ പറയും "പതിനാല്".. അതു കൊണ്ട് ലാബില്‍ ഭയങ്കര പെര്‍ഫോര്‍മന്‍സ് ആണ്.

പന്ത്രണ്ടാം ക്ലാസിലെ ലാബില്‍, ടെസ്റ്റ്യൂബില്‍ സൊലൂഷന്‍ ചൂടാക്കുമ്പോള്‍ ബുന്‍സന്‍ ബര്‍ണറിനു മുകളില്‍ ( തീക്കളി ആയതു കൊണ്ട് ആകെക്കൂടെ ഇഷ്ടമുള്ള ഒരു കാര്യം അതാണ് വല്ലതും ചൂടാക്കുക) ടെസ്റ്റ് റ്റ്യൂബ് 60 ഡിഗ്രി ചെരിച്ചു പിടിക്കണം എന്നു ഷാജിമാഷ് പറഞ്ഞത്‌ കേട്ട് അങ്ങനെ ചെയ്തതും, ഞാന്‍ ചൂടാക്കിക്കൊണ്ടിരുന്ന ടെസ്റ്റ് റ്റ്യൂബില്‍ നിന്നും കതിനക്കുറ്റിക്ക് തീ പിടിക്കുന്നതിന് തൊട്ട് മുന്‍പുള്ള ശബ്ദത്തോടെ എന്തോ ഒരു സംഭവം ആകാശത്തേക്ക് ഉയറ്ന്ന് പൊങ്ങിയതും, കൃത്യം അറുപത് ഡിഗ്രി ട്രാജക്റ്ററിയില്‍ സഞ്ചരിച്ച് ആകാശത്തില്‍ ഷാജിമാഷുടെ നേരെ തലയ്ക്കു മുകളില്‍‍ അത് മഴയായി പെയ്‌തതും ഒരു നിമിഷം ഓര്‍ത്തു പോയി....(നോ അതിശയോക്തി ഹിയര്‍)

രണ്ടാമത് ഓമനടീച്ചര്‍ക്ക് ക്ലാസില്‍ ആകെ കൂടെ ഒരിഷ്ടം ഉള്ളത് എന്നോടാണ്. മകരം മരങ്ങളിലോര്‍‌മ്മകള്‍ പൊഴിക്കുന്ന ഒരു സുന്ദരദിനത്തില്‍ , ക്ലാസുമുറികളില്‍ ഹോമിക്കപ്പെടുന്ന യുവത്വത്തിന്റെ നിരര്‍ഥകത ഓര്‍‌ത്ത് ഓമനടീച്ചറുടെ ഇലക്ക്ട്രോകെമിസ്ട്രി ക്ലാസില്‍ നിന്നും സ്കൂട്ടായി കൈരളി തീയേറ്ററില്‍ ഹാജര്‍ വെച്ച അന്നു മുതലാണ് ടീച്ചര്‍ക്കെന്നോട് അതികലശലായ ഇഷ്ടം വന്ന് തുടങ്ങിയത്. അന്ന് തീയേറ്ററില്‍ നിന്നും തിരിച്ച് വീട്ടില്‍ എത്തും മുന്‍പേ ഒരു ട്രങ്ക് കോള്‍ എന്നെ വീട്ടില്‍ വെയ്റ്റ് ചെയ്യുന്നുണ്ടായിരുന്നു....

അല്ലെങ്കില്‍ തന്നെ ഈ കെമിസ്ട്രി പഠിച്ചിട്ട് എന്ത് മലമറിക്കാനാ എന്ന് ഇത്രയും കാലമായിട്ടും എനിക്ക് മനസിലായിട്ടില്ല. സപ്പോസ് ഒരു ദിവസം രാവിലെ വീട്ടില്‍ അമ്മ ചായ ഉണ്ടാക്കാന്‍ നോക്കുമ്പോള്‍ വെള്ളം തീര്‍ന്നുപോയി എന്നു കരുതുക. അല്ലെങ്കില്‍ വെള്ളം കോരുന്ന ബക്കറ്റ് കിണറ്റില്‍ പോയി എന്ന്...

എന്നാല്‍ കെമിസ്ട്രി അറിയാലോ എന്നും പറഞ്ഞ് കൂറേ ഓക്സിജന്‍ മോളിക്യൂളിനേയും ഹൈഡ്രജന്‍ മോളിക്യൂളിനേയും ഓടിച്ചിട്ട് പിടിച്ച് വെള്ളം ഉണ്ടാക്കിക്കളയാം എന്നു കരുതിയാല്‍ നടക്കുമോ? കം‌പ്ലീറ്റ് വേസ്റ്റ് ഓഫ് ടൈം.....

വെറുതെയല്ല ഓള്‍ സയന്‍സ് ഈസ് ഐദര്‍ ഫിസിക്സ് ഓര്‍ സ്റ്റാമ്പ് കളക്റ്റിംഗ് എന്ന് കെമിസ്ട്രി വിദ്വാന്‍ റൂതര്‍ഫോര്‍‌ഡ് പറഞ്ഞു കളഞ്ഞത്...

മനസില്ലാമനസോടെയാണ് ലാബിലേക്ക് നടന്നു തുടങ്ങിയത്. വഴിക്ക് കോളേജ് ക്രിക്കറ്റ് ഗോപറ്റീഷന്‍ ഫൈനലില്‍ കെമിക്കല്‍ എഞ്ചിനീയറിംഗിനെ തോല്പിച്ച മെക്കാനിക്കല്‍ ഗഡികള്‍ ജാഥയായി മുദ്രാവാക്യം വിളിച്ചോണ്ട് പോവുന്നു...

"പിപ്പറ്റല്ലിത് ബ്യൂററ്റല്ലിത് ക്രിക്കറ്റാണേ കട്ടായം....."

മനസ് ഇത്തിരി ഒന്നു തണുത്തു. ഒരുത്തന്‍ പിപ്പറ്റിനേയും ബ്യൂററ്റിനേയും ചീത്ത വിളിക്കുന്നത് കേള്‍ക്കുമ്പോള്‍ എന്തൊരാശ്വാസം...

വിനമ്രിതശിരസ്കനായി ലാബിനുള്ളില്‍ കയറി. ഡെസ്കിലേക്ക് പൊവും മുന്‍പേ ഓമനടീച്ചറുടെ മേശയിലേക്ക് ഒന്നു നോക്കി.... വെള്ളത്തില്‍ വീണ പൊട്ടാസ്യം പോലെ എന്റെ നെഞ്ച് കത്തി.
ഇന്റേണല്‍ പരീക്ഷയുടേ ആന്‍സര്‍ ഷീറ്റുകള്‍.... എന്തൊക്കെ അക്രമമാണതില്‍
കാണിച്ചതെന്നാര്‍ക്കറിയാം...

ഓര്‍ഗാനിക് കെംസ്റ്റ്റിയില്‍ ഏതോ ഒരു ഒടുക്കത്തെ എസ്റ്ററിന്റെ മോളിക്യൂലാര്‍ സ്ട്രകചര്‍ വരക്കാനുള്ള ചോദ്യം ഓര്‍മ ഉണ്ട്.

കെമിസ്ട്റി എന്ന വിഷയത്തിലെ താല്പര്യമൊന്നു കാരണം വീട്ടിലെ ജനാലയുടെ കമ്പികള്‍ ബന്‍സീന്‍ റിംഗിന്റെ ആകൃതിയില്‍ പ്രത്യേകം ഡിസൈന്‍ ചെയ്യിച്ചാണ് അച്ഛന്‍ പണി കഴിപ്പിച്ചിരിക്കുന്നത് ( ലോകത്ത് വേറേ ഏതെങ്കിലും വീടിന്റെ ജനല്‍ക്കമ്പികള്‍ ബന്‍സീന്‍ റിംഗിന്റെ ഷേപ്പില്‍ ഉണ്ടോ എന്നെനിക്കറിയില്ല).

ഓര്‍മ വെച്ച കാലം മുതല്‍ ബന്‍സീന്‍ റിംഗ് കണ്ടു വളര്‍ന്ന എന്നോടാണോ കളി... തലങ്ങും വിലങ്ങും ഹെക്സാഗണുകള്‍... ഒന്നില്‍ നിന്നും മറ്റൊന്നിലേക്ക് അനേകം വാലന്‍സി വരകള്‍. ചിലയിടന്ന് സിംഗിള്‍ ബോണ്ട് ചിലയിടത്ത് ഡബിള്‍ ബോണ്ട്.... അതിപ്പോല്‍ ഇങ്ങനെ ഇന്നിടത്ത് എന്നൊന്നുമില്ല. എനിക്ക് തോന്നിയ പോലെ...

അങ്ങനെ ഒരു പക്ഷേ കെകൂലി പോലും തോല്‍ക്കുന്ന മോളിക്യുലാര്‍ സ്ട്രക്‌ചര്‍ ഉള്‍പ്പടെ അനേകം അബ്സ്ട്രാക്റ്റ് ആര്‍ട്ടുകള്‍ പരിലസിക്കുന്ന ഒരു ആന്‍സര്‍ പേപ്പറും അക്കൂട്ടത്തില്‍ കാണും.

എന്റെ ലാബ്മേറ്റ് ഗഡി ശ്രീലേഖ് പിപ്പറ്റും ബ്യൂററ്റും ഒക്കെ കഴുകുന്നു. മുന്‍പ് എന്റെ ലാബ് മേറ്റ് സൗമ്യയായിരുന്നു. അവളാണെങ്കില്‍ കുഴപ്പം ഇല്ല. ഒരു കോണീക്കല്‍ ഫ്ലാസ്ക്കില്‍ എന്റെങ്കിലും കുറേ ലിക്വിഡ് ഒക്കെ ഒഴിച്ച് ബ്യൂററ്റിന്റെ അടിയില്‍ മുന്‍സിപ്പല്‍ പൈപ്പിന്റെ അടിയില്‍ നിന്നും വെള്ളം പിടിക്കുന്നതു പോലെ വെച്ചിളക്കിക്കോളും. പകുതിസമയവും സ്വപ്നലോകത്തായതു കൊണ്ട് ബ്യൂററ്റിലെ സംഭവങ്ങള്‍ മൊത്തത്തിന്‍ കോണിക്കലെ ഫ്ലാസ്കിലായാലും പുള്ളിക്കാരി അറിയില്ല എന്നൊരു ഗുണമുണ്ട്.

മാഹിമോന്‍ അങ്ങനെയല്ല... സിന്‍സിയാറിറ്റി ഒക്കെ ഉള്ള കൂട്ടത്തില്‍ ആണ്.

മുന്‍പില്‍ സുഗുണ, മാഡം ക്യൂറിയെ തോല്പിച്ചേ അടങ്ങൂ എന്ന മട്ടില്‍ എന്തൊക്കെയോ ഇളക്കുന്നു , ഒഴിക്കുന്നു, മണത്തു നോക്കുന്നു... എന്തൊക്കെയാണോ എന്തോ....

"ശ്രീഹറീ......" ഓമനടീച്ചറുടെ ഘനഗംഭീരശബ്ദം ലാബോട്ടുക്കും മുഴങ്ങി. ആ വിളിയില്‍ തന്നെ എന്തൊരു സ്നേഹം!...

"ശ്രീഹറീ.... ഒന്നിങ്ങോട്ട് വരൂ...."

ഞാന്‍ ടിച്ചറുടെ മുന്നില്‍ സ്റ്റാന്‍ഡ് അറ്റ് ഈസ് ആയി... ടീച്ചറുടെ കൈയില്‍ , കൊലച്ചിലില്‍ കാക്ക തൂറീയത് പോലുള്ള ഹാന്‍ഡ് റൈറ്റിംഗില്‍ ഒരു ആന്‍സര്‍ പേപ്പര്‍... അതാരുടേത് എന്നൂഹിക്കാന്‍ എനിക്ക് ഫോറന്‍സിക് പരിശോധന നടത്തേണ്ട ആവശ്യം ഇല്ലായിരുന്നു....

"ശ്രീഹറീ... വാട്ടിസ് ദ കെമിക്കള്‍ ഫോര്‍മുല ഓഫ് കലോമല്‍ ഇലക്ട്രോഡ്?"

കാവിലമ്മേ .. പിതൃക്കളേ... ചതിച്ചോ? അതായിരുന്നു എക്സാമിലെ ആദ്യത്തെ കൊസ്റ്റയന്‍.... കലോമല്‍ എന്നാല്‍ മെര്‍‌ക്കുറിയും ക്ലോറിനും തമ്മിലുള്ള അവിശുദ്ധ ബന്ധത്തിലെ ജാരസന്തതി ആണെന്ന് മാത്രം അറിയാം. അതില്‍ മെറ്ക്കുറിയ്ക്കാണോ ക്ലോറിനാണോ കൂടുതല്‍ പങ്ക് എന്നൊക്കെ ചോദിച്ചാല്‍?

ഉത്തരമെഴുതുമ്പോള്‍ രണ്ടൂം മൂന്നും കല്പിച്ച് hg2cl എന്നെഴുതിയത് ഓര്‍മ ഉണ്ട്. അതല്ല എന്നുറപ്പായി( ഓ പിന്നെ hg യുടെ അടില്‍ രണ്ടോ ക്ലോറിന്റെ അടിയില്‍ മൂന്നോ എന്ന് നോക്കിയിട്ടല്ലേ ഇവിടെ സൂര്യനുദിക്കുന്നത്..)

"എച്,,,,,എച്,,,,, എച് ജി ടൂ സീ എല്‍ ടൂ...."

"എന്നിട്ടതൊന്നും അല്ലല്ലോ എക്സാമിനെഴുതിയത്?"

പറഞ്ഞ ഉത്തരം ശരി!.... തിരിച്ചു വീട്ടില്‍ പോവുന്ന വഴി ഒരു ലോട്ടറി എടുത്തേക്കാം...

"ക്ലാസിലൊന്നും കേറാത്തത് എല്ലാം അറിയാവുന്നത് കൊണ്ടാണെന്ന് ഞാന്‍ കരുതി..." ടീച്ചര്‍ എന്റെ ശവപ്പെട്ടിയിലേക്ക് ആണികള്‍ ഒന്നൊന്നായി അടിച്ചിറക്കുകയാണ്...

"ഇനിയെങ്കിലും ക്ലാസില്‍ ഒക്കെ കയറാന്‍ നോക്ക്... കലോമല്‍ ഇലക്ട്രോഡ് പോലും അറിയില്ലെങ്കില്‍ എങ്ങനയാ മാര്‍ക്ക് തരുന്നത്?"

ലാബിലുള്ള വിദ്യാര്‍ത്ഥികള്‍ ഒന്നടങ്കം എന്നെയാണ് ശ്രദ്ധിക്കുന്നത്. അഭിമാനത്തിന്റെ ആസിഡ് ലായനിയിലേക്ക് ഓമനടീച്ചറുടെ വാക്കുകള്‍ ആല്‍ക്കലിയെന്ന പോലെ ഇറ്റിവീഴുകയാണ്. ഹൃദയത്തിന്റെ അടിത്തട്ടില്‍ നിന്നും ഉയരുന്ന വേദന...

തിരിച്ചു നടക്കുമ്പോള്‍ ആരുടേയും കണ്ണുകളില്‍ നോക്കാതിരിക്കാന്‍ പ്രത്യേകം ശ്രദ്ധിച്ചു. മാഹിയോടൊപ്പം ടൈട്ടെറേഷന്‍ തുടരുമ്പോഴും മനസില്‍ അപമാനഭാരം വര്‍ദ്ധിച്ചുകൊണ്ടിരിക്കുകയായിരുന്നു....

"ഇന്നത്തെ റീഡിംഗ് കറക്ട് ആണ് 22.3 രണ്ടു തവണ തുടര്‍ച്ചയായി കിട്ടി..." മാഹിമോന്‍ സന്തോഷത്തോടെ പറഞ്ഞു...

അതെ ഇന്നത്തേ റീഡിംഗ് കറക്ട് ആണ്. കോണിക്കല്‍ ഫ്ലാസ്കില്‍ നിന്നും അവന്‍ ടൈട്രേറ്റ് ചെയ്ത ലായനിയില്‍ രണ്ടു തുള്ളി കണ്ണുനീര്‍ ചേര്‍ന്നത് ഒരുപക്ഷേ അവന്‍ അറിഞ്ഞു കാണില്ല....

എപ്പിലോഗ് :

എന്നിട്ടും ഞാന്‍ നന്നായില്ല!

മാജിക് ലാം‌പ് - റീലോഡഡ്

2009-02-12T21:45:00.000-06:00

അറ്റമില്ലാതെ പരന്നു കിടക്കുന്ന മണലാരണ്യത്തിന്റെ നടുവില്‍ , പഴുത്തു ചുവന്ന ഈന്തപ്പഴങ്ങള്‍ നിറഞ്ഞ പനയുടെ താഴെ , അഴുക്കുപുരണ്ട തന്റെ കുപ്പായക്കീശയില്‍ നിന്നും അലാദ്ദീന്‍ ഇനിയും തിളക്കം നഷ്ടപ്പെട്ടിട്ടില്ലാത്ത ഒരു പഴയ വിളക്ക് പുറത്തെടുത്തു.

സംഭവിക്കാന്‍ പോവുന്നത് എന്താണ് എന്നറിയാവുന്നത് കൊണ്ട് തന്നെ അവന്‍ ഒരു നിമിഷം സംശയിച്ചു നിന്ന ശേഷം വിളക്കില്‍ ഉരസാന്‍ തുടങ്ങി.

സ്മോക്ക് എഫക്റ്റ്......

വിളക്കില്‍ നിന്നും സുന്ദരനായ ഒരു ജീനി പുറത്തു ചാടി.

"ആലം‌പനാ..." .

തന്റെ പോണിടെയില്‍ ബെക്കാമിനെ പോലെ ആട്ടിക്കൊണ്ട് ജീനി സംസാരിച്ചു തുടങ്ങി.

"ആലം‌പന അല്ല ഈന്തപ്പന". അലാദ്ദീന്‍ നിഷ്കളങ്കമായി പറഞ്ഞു.

ജീനി ചിരിക്കണോ എന്ന് ഒരു നിമിഷം സംശയിച്ചു.

"ഇനി ഇത്തരം തമാശ പറഞ്ഞാല്‍ നിന്നെ ഞാന്‍ റിയാലിറ്റി ഷോയുടെ ജഡ്ജിയായി പോസ്റ്റ് ചെയ്യും. വാണിംഗ്‌ തന്നില്ലെന്നു വേണ്ട."

റിയാലിറ്റി ഷോ കണ്ട് കപ്പല്‍ കയറി നാട് വിട്ട സിന്ദ്‌ബാദ് ദ സെയിലറുടെ കാര്യം ഓര്‍ത്ത് അലാദ്ദീന്‍ നാക്കു കടിച്ചു പിടിച്ചു.

"കമിംഗ് റ്റു ദ പോയിന്റ്" ജീനി വീണ്ടും സംസാരിച്ചു തുടങ്ങി.

" എന്റെ വിളക്കിലെ സ്ക്രാച്ച് ആന്‍‌ഡ് വിന്‍ കോമ്പറ്റീഷനിലെ ഫസ്റ്റ് വിന്നര്‍ എന്ന പരിഗണനയില്‍ ഒരു ഓഫര്‍ തരാം. ജസ്റ്റ് മൂന്ന് വിഷസ്. നതിംഗ് മോര്‍ നതിംഗ് ലെസ്സ്."

അലാദ്ദീന്‍ ഒരു നിമിഷം ചിന്തിച്ചു നിന്നു.

" ചോദിച്ചാല്‍ എന്നെ ടീം ഇന്‍ഡ്യയുടെ കോച്ച് ഒന്നും ആക്കിക്കളയില്ലല്ലോ?" സംശയം പൂര്‍‌ണമായും വിട്ടുമാറാതെ അലാദ്ദീന്‍ ചോദിച്ചു.

"നഹി നഹി ആലം‌പനാ...."

"ഈ മണലാരണ്യത്തിന്റെ ഭാവി........ നമ്മുടേയും."

" സുന്ദരം, സുരഭിലം..... നഗരങ്ങള്‍, വികസനം, കൂറ്റന്‍ കെട്ടിടങ്ങള്‍. നാളെയുടെ ഇന്ധനത്തിനു വേണ്ടി ഏഴു കടലിനക്കരെ നിന്നും മനുഷ്യര്‍ ഇവിടെയെത്തും. രക്തച്ചൊരിച്ചിലുകള്‍ നിരന്തരം. നിന്റെയും എന്റെയും അസ്ഥികള്‍ നാളെ മനുഷ്യര്‍ കുഴിച്ചെടുത്ത് ഈ വിളക്കിലൊഴിച്ച് കത്തിക്കും. " ജീനി ഗദ്‌ഗദകണ്ഠന്‍ ആയി.

"നമ്മുടെ ഭാവിയെക്കുറിച്ച് പറഞ്ഞില്ല...." അലാദ്ദീന്‍ അക്ഷമനായി.

"നിന്റെയും എന്റെയും കഥ കാലഘട്ടങ്ങളെ അതിജീവിക്കും . അതിര്‍ത്തിവരമ്പുകള്‍ ഇല്ലാതെ അവ മനുഷ്യഹൃദയങ്ങളില്‍ കുടികൊള്ളൂം. "

"ബാക്കി പറയൂ"

" കഥകളില്‍ എന്റെ സൗന്ദര്യം നിനക്ക് നല്‍‌കപ്പെടും. നിന്റെ വൈരൂപ്യം എന്നില്‍ ആരോപിക്കപ്പെടും. കഥകളില്‍ എപ്പോഴും നായകന്‍ സുന്ദരനാവേണമല്ലോ."

ജീനിയുടെ കണ്ണുകളില്‍ അശ്രുബിന്ദു.

" കഥാന്ത്യത്തില്‍ വിജയം നിന്റേതായിരിക്കും. എനിക്ക് വിദൂഷകന്റെ വേഷമാവും. നീ വേട്ടക്കാരനും ഞാന്‍ വേട്ടമൃഗവും "

" മതി. ഇനി സെക്കന്റ് വിഷ്.... രാജകുമാരി."

ജീനി കൈകള്‍ ഉയര്‍ത്തി. മുല്ലപ്പൂവിന്റെ സുഗന്ധം അന്തരീക്ഷത്തില്‍ പടര്‍ന്നു. രാജകുമാരി ദൈന്യം നിറഞ്ഞ മിഴികളോടെ ജീനിയെ നോക്കി. ജീനി മുഖം തിരിച്ചു.

"ഇനി നിന്റെ അവസാനത്തെ ആഗ്രഹം കൂടെ ആവശ്യപ്പെടാം. എന്റെ മോചനത്തിന്റെ സമയവും അടുത്തു തുടങ്ങി."

" എന്റെ അവസാനത്തെ ആവശ്യം എന്തെന്നാല്‍"

അലാദ്ദീന്‍ ഒന്നു നിര്‍ത്തി. ജാസ്മിനെ നോക്കി കണ്ണിറുക്കിക്കാണിച്ച ശേഷം അവന്‍ തുടര്‍ന്നു.

"ഇനിയുള്ള കാലം നീ എന്റെ പരിചാരകനായി, എന്റെ ആഗ്രഹങ്ങളെല്ലാം സാധിച്ചു തന്ന് എന്റെ കൂടെ അടിമയായി..."

കഥാന്ത്യം മുന്‍‌കൂട്ടി അറിഞ്ഞിരുന്ന ജീനി കണ്ണുകള്‍ താഴ്ത്തി.

അലാദ്ദീന്‍ ചിരിച്ചു. വേട്ടക്കാരന്റെ ചിരി.

സൂര്യഗ്രഹണത്തിന്റെ ചിത്രങ്ങള്‍

2009-02-05T21:20:00.004-06:00

പ്രിയ സതീര്‍ഥ്യന്‍ ഫിലിപ്. പി. ജയിംസ് എടുത്ത സൂര്യഗ്രഹണത്തിന്റെ ഫോട്ടോകള്‍ ആണ് താഴെ.
മൂന്നു ഫോട്ടോകള്‍ - മൂന്നും മൂന്നു തരം ടെലിസ്കോപിന്റെ സഹായത്താല്‍ എടുത്തത്.ടെലിസ്കോപ് അടക്കമുള്ള ഒരുക്കങ്ങള്‍ ഡാര്‍ക്ക്‌നെസ്സില്‍ ആണ് സെറ്റ് അപ് ചെയ്യുന്നത്.

ഫോട്ടോകള്‍ എങ്ങിനെ എടുത്തു എന്നത് അവന്റെ തന്നെ വാക്കുകളില്‍:

"Three photos are from three different telescopes. Two of them viewing was from eye piece with filter in objective. Of these two, one was 6" cassigrean reflecting and other 6" refracting telescope.

Third one from 4" reflecting telescope with projection method. We move eyepiece and project the rays to a white screen. The telscope would be kept in a dark enclosure. "

ഫിലിപിന് എന്റെ ഹൃദയം നിറഞ്ഞ നന്ദി രേഖപ്പെടുത്തട്ടേ. ഫോട്ടോകള്‍ക്കും അറിവിനും.

സൂര്യഗ്രഹണത്തെക്കുറിച്ച് മുന്‍പ് ടോട്ടോചാന്‍ ഇട്ട പോസ്റ്റ് ഇവിടെ വായിക്കാം

അതു മഞ്ജരി ആയില്ല!!!

2009-02-03T21:04:00.005-06:00

അങ്ങനെ മഞ്ജരിയും പോയി. ഗായിക മഞ്ജരിയുടെ പ്രണയ കഥയും വായിച്ചു. ഒരു പ്രതീക്ഷ ഉണ്ടായിരുന്നതാണ്. അതും...

പാടാനുള്ള കഴിവ് ജന്മസിദ്ധമായി തന്നെ എനിക്ക് വളരെ "കൂടുതല്‍" ആയി ലഭിച്ചിരിക്കുന്നതു മൂലം ആവണം ഗായികമാരോട് പണ്ടേ ഒരു "ഇദ്" കൂടുതല്‍ ആണ്.പണ്ട് മേരീ ആവാസ് സുനോയില്‍ സുനീധീ ചൗഹാന്‍ പാടുന്നത് കേട്ടപ്പോഴാണ് ആദ്യമായി അങ്ങനെ ഒരു സംഭവം തുടങ്ങിയത്. നല്ല കൊച്ച്. എന്താ പാട്ട്! ലതാ മങ്കേഷ്കര്‍ ഒക്കെ കഷ്ടപ്പെട്ട് റീടേക്ക് എടുത്ത പാടുകള്‍ അല്ലേ കുഞ്ഞ് വഞ്ച്ചിപ്പാട്ട് പാടും പോലെ ഈസിയായി പാടിക്കളഞ്ഞത്? ഫൈനല്‍ എപിസോഡു വരെ മുഴുവന്‍ കണ്ടു തീര്‍ത്ത ശേഷം അത് അതിന്റെ വഴിക്കു പോയി... ഇപ്പോ "ബീഡി ജലൈലേയും, സജ്നാ ദീ വാരി വാരി" യും ഒക്കെ ആയി ഒരു വഴിക്ക്.

പ്രായം കുറഞ്ഞ ഗായികമാരെ ഒന്നും പിന്നെ അങ്ങനെ കാണാന്‍ കിട്ടിയില്ല. അങ്ങന്റെ ഇരിക്കുമ്പോഴാണ് നമ്മടെ ഗായത്രി ചേച്ചീടെ വരവ്. കാണാനും കൊള്ളാം. ആടയാഭരണങ്ങള്‍ ഒന്നുമില്ല. തനി ഫെമിനിസ്റ്റ് ലുക്.. ഒരുമാതിരി ഇഷ്ടം ആയി വന്നെങ്കിലും ക്ലച് പിടിച്ചില്ല. ചേച്ചി കെട്ടി പോവേം ചെയ്തു....

പിന്നെയാണ് ജ്യോത്സ്ന എന്നൊരു കക്ഷി പ്രത്യക്ഷപ്പെടുന്നത്. "സുഖമാണീ നിലാവ്" എന്നൊരു സോംഗ്. തരക്കേടില്ല. പാട്ടിനു വലിയ ഡെപ്ത് ഒന്നും ഇല്ല. എന്നാലും ആ പാട്ടിനകത്തെ ആലാപ് പുള്ളിക്കാരി സ്വന്തം കയ്യില്‍ നിന്നും എടുത്ത് അലക്കിയതാ എന്നറിഞ്ഞപ്പോ ന്യായമായും ഒരു ആരാധന തോന്നിപ്പോയി. എന്തു പറയാന്‍, ഗായികക്ക് തടി കൂടുകയും ആലാപനമികവ് ഇച്ചിരി കുറയുകയും ചെയ്ത ശേഷം അതും കെട്ടടങ്ങി...

ഇങ്ങനെ ഒക്കെ ജീവിതം അങ്ങ് പോയ്ക്കൊണ്ടിരുന്നപ്പോഴാണ് മഞ്ജരി സിനിമാ സ്റ്റൈല്‍ എന്‍‌ട്രി നടത്തിക്കളഞ്ഞത്. പണ്ടു തൊട്ടേ ഹിന്ദുസ്ഥാനിയോട് ഒരു "സോഫ്റ്റ് കോര്‍ണര്‍" ഉള്ളതാണ്. ഗസലും ഷായരിയും കാര്യങ്ങളും ഒക്കെ കേട്ടാല്‍ മനസ് ഒന്നാടും.അപ്പോഴല്ലേ ആള്‍ "മുകിലിന്‍ മകളേ" പാടിയത് കേള്‍ക്കാനിട വന്നത്. വീണു. ആദ്യം കേട്ടപ്പോള്‍ തന്നെ മലര്‍ന്നടിച്ച് വീണു(പിന്നെ എഴുന്നേറ്റിട്ടില്ല).

സ്റ്റൈല്‍ ....

ആളു കാണാനും സുന്ദരിയാണ് എനറിഞ്ഞപ്പോള്‍ ന്യായമായും ക്യൂപിഡിന്റെ വിളിയും വന്നു.

അങ്ങിനെയിരിക്കുമ്പോഴാണ് ഉണ്ണിമേനോന്‍ കോഴിക്കോട് കടപ്പുറത്തിനെ ഗാനകേളിയില്‍ ആറാടിക്കാനെത്തുന്നു എന്ന ന്യൂസ് കേട്ടത്.

ഉണ്ണി മേനോന്‍...

എന്താപാട്ട്.... പുതു വെള്ളൈ മഴയും, മിന്നലെപ്പിടിക്കുന്നതും, എന്ന വിലയെന്റെ അഴകും എത്ര വേണേലും കേട്ടിരുന്നോളാം... ഏകാന്ത ചന്ദ്രിക ലൂപിലിട്ട് കേള്‍ക്കാം...പക്ഷേ ഗാനമേള കേള്‍ക്കാന്‍ നമ്മള്‍ പോയതു തന്നെ.

ബട്...... ബട്... ബട്...

കൂടെ എത്തുന്ന ഫീമേയില്‍ വോയ്സ് ആരാ?

ആരാ?

യെസ് പിള്ളാരെ യൂ ഗസ്ഡ് ഇറ്റ് റൈറ്റ്.

....... മഞ്ജരി....

ഒട്ടും താമസിച്ചില്ല. ഹോസ്റ്റലീന്ന് മാഹി മോനെ പൊക്കി( ഗഡി ശ്രീലേഖ്... പഴയ റൂം മേറ്റ്... മാഹി എന്ന "കേരളക്കരയുടെ സ്വപനഭൂമിയില്‍" ജനിച്ചവന്‍.... ആ ഒരു കണ്‍സിഡറേഷനില്‍ മാത്രം എന്നെങ്കിലും ഒരു ജോണിവാക്കറോ ബ്ലാക് ലേബലോ തരപ്പെടും എന്നു കരുതി സീനിയേഴ്സ് റാഗ് ചെയ്യാതെ വിട്ടവന്‍... പക്ഷേ കള്ള് കൈ കൊണ്ട് തൊടാത്ത ശുദ്ധന്‍.... വടിയും ഏറും ഒരുമിച്ചാവില്ലല്ലോ... )

നേരെ ചെന്നത് ബാലുവിന്റെ ഹോസ്റ്റലില്‍ (MSS ബീച്ചില്‍ പോവും വഴിയാണ്)...കാര്യം പറഞ്ഞപ്പോള്‍ അവന് നാളേ ഗേറ്റ് എന്‍‌ട്രന്‍സ് എക്സാം ആണ് പഠിക്കണം പോലും!!!പിന്നേ മഞ്ജരി പാടാന്‍ വന്നപ്പോള്‍ അല്ലേ അവന്റെ ഒരു ഗേറ്റ്... അതും നാളെ രാവിലെ വരെ സമയമില്ലേ? നമ്മള്‍ക്കൊന്നും നാളെ എക്സാം ഇല്ലാത്ത പോലെ പഠിക്കണം എങ്കില്‍ തന്നെ സമയം എത്ര കിടക്കുന്നു? പരീക്ഷക്ക് മുന്‍പ് അര മണിക്കൂര്‍ സമയം പിന്നെ എന്തിനാ?പൊക്കിയെടുത്തോണ്ട് പോയി....

മേള ഇനിയും തുടങ്ങിയില്ല... കുറേ നേരം വടി പോലെ നിന്നു...

ബാലു : "ഡാ നാളെ എക്സാം ഉണ്ട്
"ഞാന്‍ : "മിണ്ടിപ്പോകരുത്"

അവസാനം തുടങ്ങിക്കിട്ടി...ഭക്തിഗാനം... ഉണ്ണി മേനോന്റെ പധനിസ.. നാളെ എക്സാം ഉള്ള പിള്ളേരാണ്... മഞ്ജരിയെ വിളിക്കിനെടാ....

ബാലു : "ഡാ നാളെ എക്സാം ഉണ്ട്"
ഞാന്‍ : "മിണ്ടിപ്പോകരുത്"

അവസാനം... അതാ ദൂരെ.. സ്റ്റേജിനു മുകളില്‍ ഒരു നേര്‍ത്ത പുള്ളിക്കുത്തു പോലെ മഞ്‍ജരി....

ബാലു : "ഡാ നാളെ എക്സാം ഉണ്ട്"
ഞാന്‍ ഒന്നും മിണ്ടിയില്ല.

ദേ മഞ്ജരി പാടുന്നു.. ആഹാ എന്തൊരു ശബ്ദം എന്തൊരു ആലാപനമാധുര്യം.... തിക്കിക്കയറി കുറേക്കൂടി അടുത്തു കണ്ടു...

ഞങ്ങളുടെ വിവാഹത്തിന്റെ ഡേറ്റ് ഒക്കെ അന്നേതാണ്ട് മനസില്‍ ഉറപ്പിച്ചെന്നാണ് ഓര്‍മ. ജൂണിലോ മറ്റോ ആയിരുന്നു. ആ എന്തു പറയാന്‍?

ഒരു അഭിനന്ദന എസ്.എം.എസ് ആണത്രേ നായകന്‍ ആള്‍ക്ക് ആദ്യം അയച്ചത്. അങ്ങിനെ പതുക്കെ പതുക്കെ അത്ര് പ്രണയമായി പോലും....

ഒരു വാക്ക്... ഒരു സൂചന തന്നിരുന്നെങ്കില്‍?
ഒരു 3315ഉം ഒരു എയര്‍ടെല്‍ കണക്ഷനും പൂത്തു ചിതലരിച്ച് കിടന്നിടുന്നതാണ്. എയര്‍‌ടെല്‍ ഒഴിച്ച് ഒരു മാക്രിക്കുഞ്ഞു പോലും മെസ്സേജ് അതിലോട്ടയക്കാറില്ല. പുറത്തോട്ട് മെസേജ് പോവുന്ന പതിവേ ഇല്ല.എത്ര എത്ര അഭിനന്ദന മെസ്സേജുകള്‍ ഞാന്‍ അയച്ചേനേ? അറ്റ് ലീസ്റ്റ് നാല് ഫോര്‍‌വേര്‍ഡ് എങ്കിലും...

നായകന്‍ റിംഗ് ടോണ്‍ ആയി കുറേക്കാലം ഇട്ടത് "ഒരു ചിരി കണ്ടാല്‍ " ആണു പോലും...

എന്റെ ചങ്കില്‍ കുത്തരുത്... എത്ര കാലം... എത്രയെത്ര കാലം ആ റിംഗ് ടോണ്‍ ഞാന്‍ കൊണ്ട് നടന്നു...ആ ഇനി പറഞ്ഞിട്ടെന്താ...

ബഡി ആസാനീ സേ ദില്‍ ലഗായേ ജാതേ ഹേ
ബഡി ആസാനീ സേ ദില്‍ ലഗായേ ജാതേ ഹേ...

ബഡീ മുശ്കില്‍ സേ വാദേ നിഭായേ ജാതേ ഹേ...

ലേ ജാതീ ഹേ മൊഹബ്ബത് ഉന്‍ രാഹോം പര്‍
‍ലേ ജാതീ ഹേ മൊഹബ്ബത് ഉന്‍ രാഹോം പര്‍

‍ജഹാന്‍ ദിയേ നഹി, ദില്‍ ജലായേ ജാതേ ഹേ....

(അശ്രു...)

ബാച്ചികളുടെ പാചക അന്തസ്സ് പുനസ്ഥാപിക്കപ്പെടുന്നു

2009-01-26T18:38:00.008-06:00

ബാച്ചികളുടെ പാചക അന്തസ്സ് പുന്‍സ്ഥാപിക്കുക എന്ന നമത് വാഴുവും കാലത്തിന്റെ ആഹ്വാനത്തില്‍ നിന്നും ഊര്‍ജ്ജം ഉള്‍ക്കൊണ്ടാണ് ഇത് ഇവിടെ പോസ്റ്റുന്നത്.

അതോടൊപ്പം കൊച്ചുത്രേസ്യാകൊച്ചിന്റെ " ഉള്ളതു പറയാലോ.. എനിക്കറിയാവുന്ന ബാച്ചിലേഴ്സൊക്കെ തലെദിവസത്തെ പിസയുടെ ബാക്കിയോ ബ്രെഡോ മാഗിയോ ഒക്കെ കഴിച്ചാണ്‌ ജീവിക്കാറുള്ളത്‌.അല്ലെങ്കില്‍ പിന്നെ അടുത്തു വല്ല ഹോട്ടലോ മറ്റോ വേണം. ലവന്മാര്‍ക്കൊക്കെയാണ്‌ കല്യാണം കഴിയുന്നതോടെ മണ്‍കലത്തിലുണ്ടാക്കിയ ചോറ്‌, അമ്മീലരച്ച ചമ്മന്തി, ചിരട്ടപ്പുട്ട്‌ തുടങ്ങിയ കോംപ്ലികേറ്റഡ്‌ വിഭവങ്ങളില്ലാതെ ജീവിക്കാന്‍ പറ്റാതാവുന്നത്‌." എന്ന വിവാദപരാമര്‍‌ശത്തോടുള്ള സ്വാഭാവികപ്രതികരണം കൂടെ ആകുന്നു ഇത്.

(ഇനി മുതല്‍ ബൂലോഗത്ത് പാചകക്കുറിപ്പ് മുതലായവ മതി എന്ന് സൂരജിന്റെ നിര്‍ദ്ദേശവും മറ്റൊരു പ്രചോദനം മാത്രം)

സുഹൃത്തക്കള്‍ക്കിടയില്‍ "ദ മോസ്റ്റ് എലിജിബിള്‍ ബാച്ചിലര്‍ ഓഫ് കേരള" എന്ന് അറിയപ്പെടുന്ന ( ഗേള്‍സ് ..നോട് ദ പോയിന്റ്) ഞാന്‍ തന്നെ ആവണമല്ലോ ബാച്ചികളുടെ പാചക അന്തസ്സ് പുനസ്ഥാപിക്കുന്നത്. ഇതാ നിങ്ങള്‍ക്കു മുന്നില്‍ വ്യതസ്തമാമൊരു പാചകക്കുറിപ്പ്.

(പ്രധാനമായും ബാചിലേഴ്സ്‌ ആയ ബോയ്സിനെ ഉദ്ദേശിച്ചാണ് ഈ പാചകക്കുറിപ്പ് തയ്യാറാക്കിയിരിക്കുന്നതെങ്കിലും, അല്ലാത്തവരും പരീക്ഷിച്ചു നോക്കുന്നതില്‍ തെറ്റില്ല).

സാമ്പാര്‍

ആദ്യമായി കുറച്ച് തുവരപ്പരിപ്പെടുത്ത് ഇച്ചിരി മഞ്ഞള്‍ ചേര്‍ത്ത് ഒരു സ്പൂണ്‍ എണ്ണയും തൂവി, പ്രഷര്‍ കുക്കറില്‍ വേവിക്കാന്‍ വയ്ക്കുക. ( കുക്കറില്‍ രണ്ട്‌ ഗ്ലാസ് വെള്ളം കൂടെ ഒഴിക്കാന്‍ മറക്കല്ല്. ഇല്ലെങ്കില്‍ വിവരം അറിയും). പരിപ്പവിടെക്കിടന്ന് വേവട്ടെ.

എന്നിട്ട് പോയി കമ്പ്യൂട്ടര്‍ ഓണ്‍ ചെയ്യുക. ഏതെങ്കിലും ശ്രുതിമധുരമായ ഗാനം മീഡിയപ്ലെയറില്‍ വയ്ക്കുന്നത് നന്ന്. "പഞ്ചായത്തിലെ വമ്പു പിറന്നവളാരിവളോ" മുതലായവ. നല്ല മെലഡിയാണെന്നത് മാത്രമല്ല ബാച്ചികളെ പുച്ഛിക്കുന്ന വനിതകളെക്കുറിച്ചോര്‍ത്ത് സ്വയം പ്രേരണ ഉള്‍ക്കൊള്ളാനും ഇത് സഹായിക്കും.

ഇനിയാണ് ശരിക്കുള്ള കലാപരിപാടികള്‍ ആരംഭിക്കുന്നത്. ആദ്യം പോയി വാതിലുകള്‍ എല്ലാം തുറന്നിടുക. നമ്മുടെ അനിര്‍‌വചനീയമായ പാചകകലയുടെ ബൈപ്രോഡക്റ്റായ കണ്ണില്‍ കുത്തുന്ന പുക പുറത്തു പോവാന്‍ വേണ്ടി മാത്രമല്ലത്. അത്യാവശ്യം വന്നാല്‍ നമുക്കു പെട്ടെന്ന് പുറത്തേക്കോടാന്‍ അല്ല മാറാന്‍ വേണ്ടീ കൂടെ ആണത്.

ഒരു വലിയ പാത്രത്തില്‍ മൂന്നാല് ടേബിള്‍ സ്പൂണ്‍ എണ്ണ ചൂടാക്കുക. അതങ്ങനെ വെട്ടിത്തിളക്കുമ്പോള്‍ കുറച്ച് കടുക് അതിലേക്കിടുക. എന്നിട്ട് സകല ദൈവങ്ങളെയും വിളിച്ച് രണ്ട് സ്റ്റെപ് പുറകോട്ട് മാറിനില്‍ക്കുക. കടുകെല്ലാം ടപേ ടപേ എന്ന് പൊട്ടിത്തുടങ്ങുമ്പോള്‍ രണ്ടോ മൂന്നോ വറ്റല്‍ മുളകും കൂടെ "സ്വാഹാ" എന്ന മന്ത്രത്തിനെ അകമ്പടിയോടെ പാത്രത്തിലേക്കിടാം.

ഇനി കുറച്ച് ഉള്ളി അരിഞ്ഞത് പാത്രത്തിലേക്കിടാം. പിന്നെ ഒരു സെക്കന്റ് അവിടെ നിന്നേക്കരുത്. തിരിഞ്ഞു നോക്കാതെ ഓടിക്കോണം. പുറകില്‍ നിന്ന് കാട്ടാനമറുത അലറുന്നതിനേക്കാളും ഭീകരമായ ചില ശബ്‌ദങ്ങള്‍ കേട്ടേക്കാം. മൈന്റ് ചെയ്യരുത്. കമ്പ്യൂട്ടറിന്റെ മുന്നില്‍ ചെന്നിരുന്ന്, താമരക്കുരുവിക്ക് തട്ട്‌കട എന്ന പാട്ട് ഉച്ചത്തില്‍ വെച്ചാല്‍ , അടുക്കളയിലെ ശബ്ദം കേട്ട് അയല്‍ക്കാര്‍ ഓടിവരുന്നത് ഒഴിവാക്കാം.

കുറച്ചു കഴിയുമ്പോല്‍ പാത്രത്തിലെ ശബ്ദം നിലക്കും. ഇനി കുഴപ്പമൊന്നുമുണ്ടാവില്ല എന്നുറപ്പായാല്‍, പതുക്കെ ആ വഴി പോയി റഫിജറേടറില്‍ കൈയിടുക. ആദ്യം കിട്ടുന്ന മുഴുത്ത രണ്ട് തക്കാളി എടൂക്കുക. കട് കട് കട് ആന്‍ഡ് പുട് ഇറ്റ് ഇന്‍സൈഡ് ദ പാത്രം. ഇപ്പോഴും ചില നിലവിളികള്‍ ഉയരും. എഗൈന്‍ മൈന്‍‌ഡ് ചെയ്യണ്ട. അതങ്ങനെ ഫ്രൈ ആവുമ്പോള്‍ ഒരു ചെറിയ ഉരുളക്കിഴങ്ങും മത്തന്റെ കഷണവും രണ്ട് വെണ്ടക്കായും എടുത്ത്, ബാച്ചി ബോയ്സിനെ കളിയാക്കുന്ന പെണ്‍കിടാങ്ങളും ക്ലാസിലെ കല്യാണം കഴിഞ്ഞ ഫ്രണ്ട്സും ഒക്കെയാണെന്ന് സങ്കല്‍‌പിച്ച് വെട്ടി വെട്ടി നുറുക്കുക. ( പാചകം കഴിയുമ്പോഴേക്കും വിശപ്പ് കൂടാനും ഇതു സഹായിക്കും എന്നൊരു ഗുണവും ഉണ്ട്). പുട് ദാറ്റ് ഓള്‍സോ ഇന്‍സൈഡ് ദ പാത്രം ആന്‍ഡ് ആഡ് സം വാട്ടര്‍( ഇത്തിരി വെള്ളം ഒഴിക്കണമെന്ന്).

ഒരു സ്പൂണ്‍ വാളമ്പുളി കലക്കിയത് അതിലോട്ടൊഴിച്ച് ആവശ്യത്തിന് ഉപ്പും ചേര്‍ത്ത്( പാചകക്കുറിപ്പെഴുതുന്നവരുടെ ശ്രദ്ധക്ക്. ഉപ്പിന്റെ കാര്യത്തില്‍ നമ്മള്‍ എപ്പോഴും ഡിപ്ലോമാറ്റിക് ആയ ഒരു സമീപനമേ സ്വീകരിക്കാവൂ. ഒന്നും തറപ്പിച്ചങ്ങ്‌ പറയരുത്. അളവൊക്കെ ഉണ്ടാക്കുന്നവന്റെ പാട്) , അതിനെ അതിന്റെ വഴിക്ക് വിട്ടേക്കുക. ഇനി കമ്പ്യൂട്ടറിന്റെ മുന്നില്‍ ചെന്നിരുന്ന്, ഭാരത് മാട്രിമോണിയോ എം ഫോര്‍ മാരിയോ തുറക്കാം. നിങ്ങളുടെ താല്‍‌പര്യമനുസരിച്ച് നല്ല പെണ്‍കിടാങ്ങളുടെ പോട്ടം കാണുകയോ, മാര്‍ക്കറ്റിലെ സ്കോപ് എന്തെല്ലാമെന്ന് ഗവേഷണം നടത്തുകയോ ആവാം.

അതിനിടയില്‍ ചെന്ന് കുറച്ചു സാമ്പാര്‍ മിക്സ് എടുത്ത് പാത്രത്തില്‍ നിക്ഷേപിക്കുക( "സ്വാഹാ" മന്ത്രം മറക്കണ്ട). ഒരു അഞ്ചു മിനുറ്റ് കൂടെ ഉണ്ട്. മനോരമ ഓണ്‍ലൈന്‍ തുറന്ന് പാര്‍‌വതി ഓമനക്കുട്ടന്‍ ചുവന്ന ഡ്രസ്സില്‍ ബീച്ചില്‍ നില്‍ക്കുന്ന ആ ഫോട്ടോ ഉണ്ടല്ലോ അത് ഓപ്പണ്‍ ചെയ്ത് അതിലേക്കും നോക്കി ഇരുന്നോണം. വിശപ്പങ്ങനെ കൂടിക്കൂടി വരും.

അപ്പോ പറഞ്ഞു വന്നത് ഇനി ഇതുകൊണ്ടൊന്നും നിങ്ങള്‍ തളരരുത്. നേരത്തെ വേവിച്ച പരിപ്പെടുത്ത് ഇടിച്ചു പിഴിഞ്ഞ് തിളക്കുന്ന കറിയിലേക്കൊഴിക്കുക. ഒന്നു ഇളക്കുകയും ചെയ്തേക്ക്. ഒരു എട്ട് മിനുട്ട്‌ അങ്ങനെ തിളക്കട്ടെ. അതിനു ശേഷം സ്റ്റൗവ് ഓഫാക്കാം. ഒരു സ്പൂണില്‍ ഇത്തിരി കോരി എടുത്ത് ഊതി തണുപ്പിച്ച ശേഷം ( തണുപ്പിച്ച ശേഷം മാത്രം ) നാവില്‍ വെച്ച് നോക്കുക. "എന്ത് രുചി എന്താ സ്വാദ്" എന്നൊരു ആത്മഗതവും തട്ടിയേക്കുക( സ്വാദ് എന്തു തന്നെയായാലും).

സാമ്പാര്‍ റെഡി!

ടോപ്പിംഗ്സ്:
എന്താ നിങ്ങള്‍ ആലോചിക്കുന്നത്? എന്തോ മറന്നല്ലോ അല്ലേ? എന്താ അത്? ഓര്‍ക്കുന്നില്ല? പിടി കിട്ടിയില്ല? അത് തന്നെ.

"കായം."

കായത്തിന് ഇംഗ്ലീഷില്‍ പറയുന്നത് " asafoetida " ( കായം... അതിനാണ്‌). അത് ഞാന്‍ ഗ്രോസെറി ഷോപ്പിലെ മദാമ്മയോട് പ്രൊനൗണ്‍സ് ചെയ്താല്‍, അവര്‍ കേള്‍ക്കുന്നതെന്തോ, ഞാന്‍ ഉദ്ദേശിച്ചതെന്തോ. അവസാനം കിട്ടുന്നതെന്തോ. ഇനി അവരുടെ ഭാഷയില്‍ അത് വല്ല തെറിയുമാണെങ്കില്‍ അതിനുള്ള ശിക്ഷ വേറേയും അനുഭവിക്കണം. തല്‍ക്കാലം ബാച്ചി സാമ്പാറില്‍ കായം വേണ്ട.

അപ്പോ സംഗതി പിടി കിട്ടിയല്ലോ? സാര്‍‌വലോക ബാച്ചികളേ നിങ്ങള്‍ കുക്ക് ചെയ്യുവിന്‍!

പ്രത്യേകശ്രദ്ധക്ക്:

നൂറു രൂപാ MO/DD അയക്കുന്നവര്‍ക്ക് "ജപ്പാനിയാ കുഹൂ കുഹൂ" തയ്യാറാക്കുന്ന റെസിപ്പീ(സചിത്രം) പോസ്റ്റല്‍ ആയി അയച്ചു തരുന്നതായിരിക്കും.

സ്ലം ഡോഗ് മില്യനയര്‍ നല്‍കുന്ന പാഠങ്ങള്‍

2008-12-30T19:06:00.001-06:00

പല ഭാഗത്തു നിന്നും മികച്ച റിവ്യൂകള്‍ വന്നത് കൊണ്ട് സ്ലം ഡോഗ് മില്യനയര്‍ കാണാം എന്നു കരുതി. കണ്ടപ്പോള്‍ അല്ലേ സംഗതികള്‍ പിടി കിട്ടിയത്. സിനിമ നല്‍കുന്ന സന്ദേശം ദേണ്ടെ താഴെ കൊടുത്തിരിക്കുന്നു.

പെണ്ണ്, പണം ഇതിനു വേണ്ടി നടക്കുന്ന വയലന്‍സിന്റെ മൊത്തക്കച്ചവടകേന്ദ്രം ആണ് ഇന്‍ഡ്യ.

പെണ്ണിനും പണത്തിനും വേണ്ടി സ്വന്തം സഹോദരനെ വരെ വഞ്ചിക്കാന്‍ മടിക്കാത്ത ജനങ്ങള്‍ ആണ് ഇവിടെയുള്ളത്.

ഏറ്റവും കൂടുതല്‍ ഇന്റര്‍‌നാഷനല്‍ സെഞ്ച്വറി നേടിയ സച്ചിന്‍ ആയിരിക്കും. പക്ഷേ ഫസ്റ്റ് ക്ലാസ് ക്രിക്കറ്റില്‍ സച്ചിന്‍ അല്ല. അതു പോലും ഇവിടത്തുകാര്‍ക്ക് അറിയില്ല. സച്ചിന്‍ സച്ചിന്‍ എന്നും പറഞ്ഞ് ഇരുന്നോളും

ക്രിക്കറ്റ് എന്നൊരു ഗേയിം ഉണ്ട്. അതു കാണാന്‍ ഇരിക്കുംബോള്‍ ശല്യപ്പെടുത്തിയാല്‍ അമ്മ പെങ്ങന്മാരെ വരെ വേണേല്‍ തല്ലിക്കളയും.

മദ്യത്തിലും മദിരാക്ഷിയിലും ഡിസ്കോ പരിപാടികളിലും ഒക്കെയായി മദിച്ചു നടക്കുന്നവന്മാരാണ് ഇവിടുത്തെ ജനങ്ങള്‍. ( ശാം ഹേ.. ജാം ഹേ.. ഓരോരോ പാട്ടേ...)

പാവപ്പെട്ട പിള്ളേരെ ഓടിച്ചിട്ടു തല്ലാന്‍ നടക്കുന്ന ക്രൂരന്മാരാണ് ഇവിടുത്തെ ലോക്കല്‍ പോലീസ്.

പക്ഷേ അങ്ങനെ ഏതേലും പോലീസ് ചെയ്താല്‍ പാവങ്ങളുടെ രക്ഷകനായി വെള്ളക്കാരുടെ പോലീസ് ഇവിടെ ഉണ്ട്.

ലോക്കല്‍ പോലീസിന്റെ തന്തക്കു വിളിക്കാന്‍ ലോക പോലീസ് മാത്രമേ ഇവിടുള്ളൂ.

പാവങ്ങള്‍ക്ക് ഒരു നൂറു രൂപ നോട്ട് വേണേല്‍ ഫ്രീ ആയി കൊടുക്കാനും ലോക പോലീസ് റെഡി.

ഇവിടുത്തെ സിനിമാ സൂപ്പര്‍സ്റ്റാറുകള്‍ ഒക്കെ ഫ്രോഡുകള്‍ ആണ്. സ്ക്രീനിനു മുന്നില്‍ ചിരിക്കുകയും പിന്നില്‍ കാലുവാരുകയും ചെയ്യുന്ന അലവലാതികള്‍.

ഇപ്പോ ലോകത്തിന്റെ സെന്റര്‍ ഇന്ത്യാ ആണെന്ന് ഇവന്മാര്‍ ധരിച്ചു വെച്ചിരിക്കുന്നു.

കമ്യൂണല്‍ വയലന്‍സ് ആവശ്യത്തിലേറെ.

പണ്ട് മുഗളന്മാര്‍ ഉണ്ടാക്കിയിട്ട താജ്‌മഹാലിനെക്കുറിച്ചൊക്കെ ഇല്ലാത്ത പൊങ്ങച്ചം പറഞ്ഞ് ടൂറിസം എന്നും പറഞ്ഞ് സായിപ്പന്മാരുടെ കാശ് അടിച്ചുമാറ്റല്‍ ഇവന്മാരുടെ സ്ഥിരം തൊഴിലാണ്.

കോള്‍ സെന്റര്‍ എന്നു പറഞ്ഞു വേറെ ഒരു തൊഴിലുണ്ട്. അവിടെയുള്ളവന്മാര്‍ക്ക് യാതൊരു വിവരവും ഇല്ല.

അവിടെ ചായ അടിക്കാന്‍ വരുന്നവര്‍ക്കു അരെ അതിലും വിവരം ഉണ്ട്.

കോള്‍ സെന്ററില്‍ വിളിക്കുന്ന പാവം വിദേശീയരെ ഇല്ലാത്ത കള്ളം പറഞ്ഞ് പറ്റിക്കുന്ന ഒരേര്‍പാടും ഉണ്ട്.

കലക്കി സം‌വിധായകന്‍/സ്ക്രിപ്റ്റ് റൈറ്റര്‍ ചേട്ടന്മാരേ. പോയിന്റ് നം‌ബര്‍ 6, 7 , 8 എന്നിവ ചൂണ്ടിക്കാണിക്കാന്‍ പ്രത്യേക സീന്‍ ഉള്‍പ്പെടുത്തിയത് കൊണ്ട് ഓസ്കാര്‍ ഉറപ്പായി. അഭിനയിക്കാനു സംഗീതം ഉണ്ടാക്കാനും ഇന്‍ഡ്യക്കാരെ തന്നെ വിളിച്ചത് കൊണ്ട്, നൂറു കോടി വരുന്ന ഇന്‍ഡ്യക്കാര്‍ സിനിമ കാണുകയും ചെയ്യും. മൊത്തത്തില്‍ ഏര്‍പ്പാട് ലാഭം തന്നെ. ഹോളിവുഡ് ഇന്‍‌ഡസ്ട്രിയെ ബോളിവുഡ് വെല്ലുവിളിക്കുമോ എന്ന പേടിയും വേണ്ടല്ലോ...

പിന്‍‌കുറിപ്പ് : എന്നെ തല്ലാന്‍ വരണ്ട. ഇതൊക്കെ സിനിമയില്‍ വരികള്‍ക്കിടയില്‍ കുത്തിനിറച്ചിരിക്കുന്ന കാര്യങ്ങളാ. സിനിമ കാണുമ്പോള്‍ ശ്രദ്ധിച്ചു കണ്ടാല്‍ മതി. മനസില്‍ നന്‍‌മയുള്ള ഒരു കഥാപാത്രം പോലുമില്ല സിനിമയില്‍ ( നായികയെ ഒരു അപവാദമായി ചൂണ്ടിക്കാട്ടാം. സ്ത്രീകള്‍ക്കെതിരെയുള്ള ചൂഷണങ്ങളില്‍ ഇരയുടെ ഭാഗം അഭിനയിക്കാനായി തീര്‍ത്ത വ്യക്തിത്വമില്ലാത്ത ഒരു കഥാപാത്രം. അബലയും നിരക്ഷരയും ചൂഷിതയുമായ ഒരു പാവം). പരസ്പരം ദ്രോഹിക്കുക, പാര വെക്കുക, ഉപദ്രവിക്കുക, ഇതൊക്കെയാണ് നായകന്റെ സഹോദരന്‍ മുതല്‍ ടിവി ഷോ അവതാരകര്‍ വരെയുള്ളവരുടെ സ്വഭാവമായി എടുത്തു കാട്ടിയിരിക്കുന്നത്. സഹോദരന്‍ വരെയൂള്ളവരെ ചൂഷണം ചെയ്യുകയും അതു വഴി സ്വയം നാശത്തിലേക്കെടുത്തു ചാടുകയും ചെയ്യുന്ന യുവത്വമാണ് ഇന്ത്യയുടെ മുഖമായി എടുത്തു കാട്ടിയിരിക്കുന്നത്.

വിമര്‍ശനങ്ങള്‍ക്കു നേരെ അസഹിഷ്ണുത കാട്ടേണം എന്നല്ല പറഞ്ഞുവരുന്നത്. മധുര്‍ ഭണ്ഡാരക്കര്‍ തുടങ്ങിയ സം‌വിധായകര്‍ സമൂഹത്തിനു നേരെ ഇത്തരം ചോദ്യങ്ങള്‍ ഉയര്‍ത്താറുണ്ട്. അവ നിശ്‌ചയമായും ആവശ്യമാണ്. പക്ഷേ മുഖ്യമായും വിദേശികളായ പ്രേക്ഷകരെ ഉദ്ദേശിച്ചു നിര്‍‌മിച്ച ഒരു ചിത്രത്തില്‍ നമ്മുടെ രാജ്യത്തിന്റെ മോശമായ മുഖം മാത്രം വരച്ചു കാണിക്കുന്നതില്‍ എതിര്‍പ്പുണ്ട്.

നമ്മുടേത് ഒരു പെര്‍‌ഫക്റ്റ് രാജ്യം ഒന്നുമല്ല. പക്ഷേ വെറും വയലന്‍സ് മാത്രമാണിവിടെ എന്ന രീതിയിലുള്ള ഒരു പ്രചരണവും അനുവദനീയമല്ല.

തള്ളിക്കളയുക ഈ സിനിമയെ...

പിന്‍‌കുറിപ്പ് നമ്പര്‍ റ്റൂ : നമസ്തേ ലണ്ടന്‍ സിനിമയില്‍, ബ്രിട്ടീഷുകാരന്‍ സായിപ്പിന്റെ മുഖത്തു നോക്കി ( അതും കത്രീന കൈഫിന്റെ മുന്നില്‍ വെച്ച്), " അക്ഷരങ്ങള്‍ അടിച്ചു കൂട്ടിയ പുസ്തകത്താളില്‍ നീ കണ്ട ഇന്‍‌ഡ്യ അല്ല സായിപ്പേ യഥാര്‍ത്ഥ ഇന്‍‌ഡ്യ" എന്നു അക്ഷയ് കുമാര്‍ പച്ച ഹിന്ദിയില്‍ വിളിച്ചു പറഞ്ഞ് അപമാനിച്ചതിന്റെ കെറുവു തീര്‍ക്കാന്‍ അല്ലേ അങ്ങ്‌ ഇംഗ്ലണ്ടില്‍ നിന്നും ഒരു സം‌വിധായകന്‍ ഇത്രേം ദൂരം വന്ന് ഈ സിനിമ പിടിച്ചത് എന്ന് എനിക്കു ബലമായ ഡൗട്ട് ഉണ്ട്. എന്തൊക്കെ പറഞ്ഞിട്ടെന്താ, ക്രിക്കറ്റില്‍ 5-0, 1-0.... ഹി ഹി ഹി....

അനുബന്ധം :പോയിന്റ് 6,7,8,9 ല്‍ പ്രതിപാദിച്ച സീന്‍ സിനിമ കാണാത്തവര്‍ക്കു വേണ്ടി താഴെ കൊടുക്കുന്നു.(ഓര്‍‌മയില്‍ നിന്നും എടുത്തെഴുതിയത്)

കഥാനായകന്‍( ചെറുപ്പം) ഒരു വിദേശീയരായ ഭാര്യാഭര്‍ത്താക്കന്മാരെ സ്ഥലങ്ങള്‍ കാണിക്കുന്നു. ഓടിയെത്തുന്ന ഒരു പോലീസുകാരന്‍ കഥാനായകനെ അടിച്ചു വീഴ്ത്തുന്നു. നിലത്തു വീണ നായകനെ ബൂട്ടു കൊണ്ട് ചവിട്ടുന്നു. അടി കൊള്ളുന്നതിനിടയിലും നായകന്‍ വിദേശികളെ നോക്കി

നായകന്‍ : " മാഡം, യൂ വാണ്ടഡ് റ്റു സീ ദ റിയല്‍ ഫേസ് ഓഫ് ഇന്‍ഡ്യ റൈറ്റ്? ഹിയര്‍ ഇറ്റ് ഈസ്".

വിദേശി വനിത : " ഓ മൈ സണ്‍ ഓ മൈ സണ്‍.... ദെന്‍ ഹിയര്‍ ഈസ് ദ റിയല്‍ ഫേസ് ഓഫ് അമേരിക്ക..."

(പോലീസുകാരനു നേരെ തിരിഞ്ഞ് )

" ബാസ്***ഡ്"

(ഈ ഡയലോഗ്ഗ് മ്യൂട്ടഡ് ആണ്. ചുണ്ടുകളുടെ അനക്കത്തില്‍ നിന്നും സംഭാഷണം പക്ഷേ വ്യക്തം)

വിദേശവനിതയുടെ ഭര്‍ത്താവ് പോക്കറ്റില്‍ നിന്നും കുറച്ചു പണം എടുത്ത് അടിയേറ്റു വീണ നായകന് നല്‍കി അവനെ ആശ്വസിപ്പിക്കുന്നു....

ഒരു പുതിയ തുടക്കം

2008-11-08T12:20:00.002-06:00

പ്രിയ കൂട്ടുകാരേ...

വീണ്ടൂം തുടങ്ങുകയാണ്. മുന്‍പു നല്‍കിയ പ്രോല്‍സാഹനങ്ങള്‍ തുടര്‍ന്നും പ്രതീക്ഷിക്കുന്നു...അഗ്രിഗേറ്റര്‍ വഴി ഇവിടെ എത്താന്‍ കഴിയുന്നുണ്ടെങ്കില്‍ ഒരു കമന്റ് വഴി അറിയിക്കുമല്ലോ.

സസ്നേഹം,
ഹരി